‘ఆమె ఓ హిపోక్రైట్’, జయా బచ్చన్ పై తెలంగాణ బీజేపీ ఫైర్

బాలీవుడ్ లో డ్రగ్ మహమ్మారిపై లోక్ సభలో గళమెత్తిన బీజేపీ ఎంపీ రవి కిషన్ మీద సమాజ్ వాదీ పార్టీ ఎంపీ, మాజీ నటి కూడా అయిన జయాబచ్చన్ ధ్వజమెత్తడాన్ని తెలంగాణ బీజేపీ తీవ్రంగా ఖండించింది. ఆమె రాజ్యసభలో ఓ ‘పూర్తి స్థాయి హిపోక్రైట్’ లా  మారినట్టు కనిపిస్తోందని ఈ పార్టీ అధికార ప్రతినిధి కె.కృష్ణసాగర రావు విమర్శించారు. బాలీవుడ్ లో డ్రగ్స్ వాడకం ఉన్నా ఆమె పట్టించుకోకుండా ఒక పార్లమెంటేరియన్ గా బాధ్యతా రాహిత్యంగా వ్యవహరించారని ఆయన ఆరోపించారు. దేశంలో యువత భవిష్యత్తును, ఆమె ఉన్న సినీ పరిశ్రమలోనే అనేకమంది నటీనటుల  కెరీర్లను నాశనం చేస్తున్న డ్రగ్స్ సమస్యపై  ఆమె ఇలా మాట్లాడడం సహేతుకం కాదన్నారు. ఆమె వ్యాఖ్యలు సిగ్గుచేటన్నారు. బాలీవుడ్ ప్రతిష్టను దిగజార్చడానికి కుట్ర జరుగుతోందంటూ జయాబచ్చన్ రాజ్యసభలో నోటీసు ఇవ్వడం ఎంతో శోచనీయమని కృష్ణసాగరరావు దుయ్యబట్టారు. బాలీవుడ్, టాలీవుడ్, శాండల్ వుడ్ లలో అనేకమంది పేర్లను ఎన్సీబీ విడుదల చేయడానికి సిధ్దంగా ఉందని ఆయన చెప్పారు.