బంగారం మరింత తగ్గిందోచ్..
నాలుగైదు రోజుల నుంచి వరుసగా ధరల తగ్గుదల కనిపిస్తోంది. గత మూడు నెలలుగా అడ్డు అనేదే లేకుండా పెరిగిన బంగారం ధరలు ఇప్పుడు తగ్గుముఖం పడుతుండటం ఆహ్వానించదగ్గ పరిణామం....
పసిడి తగ్గుతోంది.. బంగారం బంగారం అనుకున్న సామాన్యులకు కొత్త ఆశలు కలిగిస్తోంది. తిరిగి మీ వద్దకే వస్తున్నానంటూ వేగంగా వస్తోంది. కరోనా సమయంలో పై..పైకి ఎగబాకిన గోల్డ్.. ఇప్పుడు రోజు రోజుకు పడిపోతోంది. బంగారం, వెండి ధరల తిరోగమనం కొనసాగుతున్నది.
గత నాలుగైదు రోజుల నుంచి వరుసగా ధరల తగ్గుదల కనిపిస్తోంది. గత మూడు నెలలుగా అడ్డు అనేదే లేకుండా పెరిగిన బంగారం ధరలు ఇప్పుడు తగ్గుముఖం పడుతుండటం ఆహ్వానించదగ్గ పరిణామం. బుధవారం నాటి ట్రేడ్లో 10 గ్రాముల బంగారం ధర రూ.210 తగ్గి రూ.51,963 వద్ద నిలిచింది. కిలో వెండి ధర సైతం రూ.1077 తగ్గి రూ.65,178కి చేరింది.
అంతర్జాతీయ మార్కెట్లలో ప్రతికూలతలు, రూపాయి మారకం విలువ మెరుగుపడటం బంగారం, వెండి ధరల తరుగుదలకు కారణమయ్యాయని బులియన్ మార్కెట్ నిపుణులు అంచనా వేస్తున్నారు. డాలర్తో రూపాయి మారకం విలువ మరో మూడు పైసలు మెరుగుపడి 74.30 వద్ద స్థిరపడింది. ఇక అంతర్జాతీయ మార్కెట్లో ఔన్స్ బంగారం ధర 1918 డాలర్ల వద్ద, ఔన్స్ వెండి ధర 26.45 డాలర్ల వద్ద ట్రేడయ్యింది. అయితే బంగారం ధర తగ్గినా అమ్మకాలు పెద్దగా లేవని వ్యాపారస్థులు అంటున్నారు.