అడిగితే సిగరెట్ ఇవ్వలేదని… తుపాకీతో యువకుడిపై

దేశ రాజధానిలో తుపాకీ కల్చర్ రోజురోజుకు పెరిగిపోతోంది. అడగ్గానే సిగరెట్‌ ఇవ్వలేదని.. ఢిల్లీలో ఓ యువకుడిపై గుర్తు తెలియని వ్యక్తి కాల్పులు జరిపాడు. ఆమీర్‌ ఖాన్‌ అనే యువకుడు గురువారం రాత్రి 9.30 గంటల ప్రాంతంలో తన స్నేహితునితో కలిసి ఓ షాపింగ్‌మాల్‌ సమీపంలో నిల్చున్నాడు. ఆ సమయంలో ఇద్దరు దుండగులు ద్విచక్ర వాహనంపై అక్కడికి వచ్చారు. ఆమీర్‌ ఖాన్‌ను సిగరెట్‌ ఇవ్వమని అడగ్గా.. అందుకు అతను నిరాకరించడంతో ఇద్దరూ వాగ్వాదానికి దిగారు. ఇంతలో ఓ దుండగుడు తుపాకీ తీసి కాల్పులు జరిపాడు. అనంతరం ఇద్దరూ అక్కడి నుంచి పరారయ్యారు. ఆ యువకుడి ఛాతిలోకి తూటా దూసుకెళ్లడంతో తీవ్రంగా గాయపడ్డాడు. అతన్ని ఆస్పత్రికి తరలించారు. కాగా ఘటనపై కేసు నమోదు చేసిన పోలీసులు.. దుండగుల కోసం గాలిస్తున్నారు.