దాసరి కుటుంబంలో అన్నాదమ్ముల సవాల్

దివంగత దాసరి నారాయణ రావు కుటుంబంలో మరో చిచ్చు రాజుకుంది. ఇద్దరు కుమారుల మధ్య ఆస్తి వివాదం అగ్గి రాజేసింది. అన్నదమ్ముల మధ్య తలెత్తిన ఆస్తి గొడవలు దాడుల వరకు వెళ్లి.. అది పోలీస్ స్టేషన్‌కు చేరింది. పూర్తి వివరాలు పరిశీలంచగా..

దాసరి నారాయణ రావు చిన్న కొడుకు అరుణ్‌పై పెద్ద కుమారుడు ప్రభు పోలీసులకు ఫిర్యాదు చేశాడు. ఈనెల 24న రాత్రి 10 గంటల సమయంలో దాసరి అరుణ్ కుమార్.. తన ఇంట్లోకి చొరబడి తమపై దాడి చేశాడని ప్రభు ఆరోపించారు. తాగి మైకంలో నోటికి వచ్చినట్లుగా తిడుతూ.. తమపై చేయి చేసుకున్నారంటూ పోలీసులకు ఫిర్యాదు చేశారు. అర్ధరాత్రి ఇంట్లోకి ప్రవేశించి మా నాన్న బీరువా ఓపెన్ చేసేందుకు ప్రయత్నించారని, అడ్డుకున్న తమపై దాడికి దిగినట్లు చెప్పారు. ఇదేంటని ప్రశ్నిస్తే.. రౌడీలతో బెదిరిస్తున్నారని అన్నారు. ఈ దాడిలో దాసరి అరుణ్ కుమార్, అతడి కారు డ్రైవర్ ఇద్దరు గేటు దూకి లోపలికి ప్రవేశించారని, మరికొంతమంది గేటు బయటే ఉన్నట్లుగా ఫిర్యాదులో పేర్కొన్నారు. ఆస్తి కోసమే తమ తమ్ముడు అరుణ్ కుమార్ తనను వేధిస్తున్నాడని దాసరి ప్రభు జూబ్లీ హిల్స్ పీఎస్ లో ఫిర్యాదు చేశారు.

దాసరి అరుణ్ వెనుక ఉన్న కొందరు పెద్ద మనుషులే తమపై ఇలా దాడులు చేసేలా ప్రేరేపిస్తున్నారంటూ ప్రభు పలువురిపై అనుమానాలు వ్యక్తం చేశారు. దాసరి నారాయణ రావు..ఇంటిని తన మనవరాలి పేరుపై రాశారని ప్రభు అంటున్నారు. మా నాన్న వీలునామా ప్రకారం ఇల్లు తన కూతురికే దక్కుతుందని చెప్పారు. తమ ఇంట్లో నెలకొన్న పరిస్థితులపై మురళీ మోహన్, మోహన్ బాబు వంటి తదితరులను కలిసి వివరించానన్నారు. ఇండస్ట్రీ పెద్దలు ఇప్పటికైన ముందుకు వచ్చి తమకు న్యాయం చేయాలని కోరుతున్నారు. ఇద్దరినీ కూర్చోబెట్టి ఆస్తి పంపకాలు జరిపించాలని కోరుతున్నారు.

దాసరి నారాయణ రావు సంబంధించిన అనేక ఆస్తులపై సరైన లెక్కలు, పత్రాలు లేవని దాసరి ప్రభు అన్నారు. రోడ్ నెం. 44 సినీ మీడియా కాంప్లెక్స్..ను బలవంతంగా అమ్మేశారని చెప్పారు. దాసరి ఫామ్ హౌజ్ ను 3 ఎకరాలు మినహా మిగతాదంతా అమ్మేశారని ఆ డబ్బులు ఏవీ ఇంకా లెక్క తేలలేదన్నారు. చందానగర్ లోని 33 అపార్ట్ మెంట్లకు సంబంధించి ఎటువంటి క్లారిటీ లేదని అన్నారు.

ఏదేమైనప్పటికీ సినీ పరిశ్రమకు పెద్ద దిక్కుగా నిలిచిన దాసరి నారాయణ రావు ఫ్యామిలీలో రాజుకున్న వివాదం చినికి చినికి గాలివానలా మారింది. ఆయన కుటుంబంలో నెలకొంటున్న వివాదాలు ఆయన ప్రతిష్టకు మచ్చతెచ్చేలా మారాయని దాసరి అభిమానులు, పలువురు సినీ ప్రముఖులు అభిప్రాయం వ్యక్తం చేస్తున్నారు.