Mango Production: మామిడి సాగులో దూసుకెళ్తున్న రాష్ట్రాలు.. తెలుగు రాష్ట్రాలది ఎన్నో స్థానం అంటే..

భారత్ కు మామిడి జాతీయపండు. దీన్ని పండ్లలో రారాజుగా పిలుస్తారు. మన దేశంలో అనేక రకాల రుచులు, ఆకారాలు, రంగులతో మామిడి పండ్లు అందుబాటులో ఉన్నాయి. ఒక్క మనదేశంలోనే 1500 రకాల మామిడి వెరైటీలు ఉన్నాయంటే నమ్మశక్యం కాదు. అందులోనూ ఒక్కో వెరైటీ ఒక్కో రకమైన రుచిని కలిగి ఉంటాయి. అల్ఫోన్సో, కేసర్, దశేరి, తోతాపురి, హిమసముద్ర, లంగ్రా, బేంగణపల్లి, జునగర్ మలక్ వంటివి భారతదేశంలో అత్యంత ప్రసిద్ధమైన మామిడి రకాలు. అయితే, మన దేశంలో మామిడి పండ్లను పండిస్తున్న రాష్ట్రాలలో ఇవి అగ్ర స్థానంలో ఉన్నాయి. వీటి సాగు, ఎగుమతులు దేశాన్ని మరింత సంపన్నం చేస్తున్నాయి. మరి వీటిలో తెలంగాణ, ఏపీ ఏ స్థానంలో ఉన్నాయి? మన దగ్గర వీటి వల్ల ఎంత బిజినెస్ అవుతుందో తెలుసుకుందాం..

ఉత్పత్తిలో అగ్రస్థానంలో ఉన్న రాష్ట్రాలు:

ఉత్తరప్రదేశ్: సుమారు 264.93 వేల హెక్టార్ల విస్తీర్ణంలో, 4540.23 వేల మెట్రిక్ టన్నుల ఉత్పత్తితో అగ్రస్థానంలో ఉంది.

ఆంధ్రప్రదేశ్: సుమారు 332.97 వేల హెక్టార్ల విస్తీర్ణంలో, 3163.32 వేల మెట్రిక్ టన్నుల ఉత్పత్తితో రెండవ స్థానంలో ఉంది.

కర్ణాటక: సుమారు 192.61 వేల హెక్టార్ల విస్తీర్ణంలో, 1829.21 వేల మెట్రిక్ టన్నుల ఉత్పత్తితో మూడవ స్థానంలో ఉంది.

తెలంగాణ: సుమారు 180.62 వేల హెక్టార్ల విస్తీర్ణంలో, 1681.6 వేల మెట్రిక్ టన్నుల ఉత్పత్తితో నాల్గవ స్థానంలో ఉంది.

బీహార్: సుమారు 150.64 వేల హెక్టార్ల విస్తీర్ణంలో, 1479.58 వేల మెట్రిక్ టన్నుల ఉత్పత్తితో ఐదవ స్థానంలో ఉంది.

గుజరాత్: సుమారు 153.18 వేల హెక్టార్ల విస్తీర్ణంలో, 1241.59 వేల మెట్రిక్ టన్నుల ఉత్పత్తితో ఆరవ స్థానంలో ఉంది.

తమిళనాడు: సుమారు 160.94 వేల హెక్టార్ల విస్తీర్ణంలో, 1156.99 వేల మెట్రిక్ టన్నుల ఉత్పత్తితో ఏడవ స్థానంలో ఉంది.

మామిడి ఎగుమతులు:

జాతీయ ఉద్యానవన బోర్డు ప్రకారం, 2002-03లో భారతదేశం మామిడి పండ్ల ఎగుమతులు సుమారు 45,000 టన్నులుగా అంచనా వేశారు. దీని విలువ రూ. 100 కోట్లు (రూ. 1 బిలియన్). తాజా మామిడి పండ్లు బంగ్లాదేశ్, యుఎఇ, సౌదీ అరేబియా, యూకేకు ఎగుమతి చేస్తున్నారు. అయితే మామిడి గుజ్జు యుఎఇ, సౌదీ అరేబియా, కువైట్, నెదర్లాండ్స్, యుఎస్ఎ యుకెలకు పంపుతున్నారు.