మనమెంతో ఇష్టంగా తినే ఈ చేపలు పిల్లలకు నోటి నుంచి జన్మనిస్తాయా?

సముద్ర జీవులు, మంచినీటి చేపలకు సంబంధించిన ఆసక్తికర విషయాలు సోషల్ మీడియాలో తరచూ వైరల్ అవుతుంటాయి. అలాంటి వాటిలో తిలాపియా (Tilapia) చేప గురించి ఒక విషయం చాలామందిని ఆశ్చర్యానికి గురిచేస్తోంది. తిలాపియా చేప నోటి నుంచే పిల్లలకు జన్మనిస్తుంది అనే ప్రచారం తరచూ వినిపిస్తుంది. ఇది నిజమేనా? లేక కేవలం అపోహేనా? అనేది ఇప్పుడు తెలుసుకునే ప్రయత్నం చేద్దాం..

నోటి నుంచి పిల్లలు పుట్టవు.. కానీ నోట్లోనే పెరుగుతాయి

తిలాపియా చేపలు నోటి ద్వారా పిల్లలకు జన్మనివ్వవు. అయితే గుడ్ల నుంచి బయటకు వచ్చిన చిన్న చేప పిల్లలను కొంతకాలం పాటు తమ నోట్లోనే సంరక్షిస్తాయి. ఈ ప్రత్యేక లక్షణాన్ని శాస్త్రీయంగా మౌత్ బ్రూడింగ్ అని పిలుస్తారు. ఆడ తిలాపియా చేప గుడ్లు పెట్టిన తర్వాత, వాటిని తన నోటిలోకి తీసుకుంటుంది. మగ చేప విడుదల చేసే వీర్యకణాల ద్వారా గుడ్లు ఫలదీకరణం చెందుతాయి. అనంతరం గుడ్లు తల్లి చేప నోటిలోనే సురక్షితంగా అభివృద్ధి చెందుతాయి. కొన్ని రోజులకు పిల్లలు బయటకు వచ్చినా, ప్రమాదం అనిపిస్తే మళ్లీ తల్లి నోటిలోకి వెళ్లి దాక్కుంటాయి.

ప్రకృతి ఇచ్చిన అద్భుత రక్షణ వ్యవస్థ

చిన్న చేప పిల్లలను ఇతర చేపలు తినే ప్రమాదం ఎక్కువగా ఉంటుంది. అందుకే టిలాపియా చేప ప్రకృతి ప్రసాదించిన ఈ ప్రత్యేక రక్షణ విధానాన్ని అనుసరిస్తుంది. నోటిలో ఉండే పిల్లలకు బయట శత్రువుల నుంచి రక్షణ లభిస్తుంది. దీంతో వాటి మనుగడ అవకాశాలు కూడా పెరుగుతాయి. ఈ సమయంలో తల్లి చేప చాలా తక్కువ ఆహారం తీసుకుంటుంది లేదా కొన్ని రోజుల పాటు పూర్తిగా ఆహారం తీసుకోకుండా పిల్లలను సంరక్షిస్తుందని మత్స్యశాస్త్ర నిపుణులు చెబుతున్నారు.

వైరల్ వీడియోల వెనుక ఇదే కారణం

సోషల్ మీడియాలో తిలాపియా చేప నోటి నుంచి ఒక్కసారిగా వందలాది పిల్లలు బయటకు వస్తున్న వీడియోలు తరచూ కనిపిస్తుంటాయి. వీటిని చూసి చాలామంది “చేప నోటి నుంచే పిల్లలకు జన్మనిచ్చింది” అని భావిస్తారు. కానీ వాస్తవానికి అవి అప్పటికే గుడ్ల నుంచి బయటకు వచ్చిన పిల్లలే. ప్రమాదం తగ్గిన తర్వాత తల్లి చేప వాటిని నోటి నుంచి బయటకు వదులుతుంది. అందుకే ఆ దృశ్యం చూసిన వారికి చేప నోటి నుంచే పిల్లలు పుట్టినట్లు అనిపిస్తుంది.

ప్రపంచంలో మరికొన్ని చేపల్లో కూడా ఇదే లక్షణం

తిలాపియా మాత్రమే కాదు, కొన్ని రకాల సిచ్లిడ్ (Cichlid) చేపలు, కార్డినల్ ఫిష్ వంటి జాతుల్లో కూడా మౌత్ బ్రూడింగ్ లక్షణం కనిపిస్తుంది. అయితే ప్రతి చేప ఈ విధానాన్ని అనుసరించదు. ఇది కొన్ని ప్రత్యేక జాతులకు మాత్రమే పరిమితమైన సహజ రక్షణ పద్ధతి. మత్స్యశాస్త్ర నిపుణుల ప్రకారం.. తిలాపియా చేప నోటి నుంచి పిల్లలకు జన్మనివ్వదు. గుడ్లు, చిన్న చేప పిల్లలను శత్రువుల నుంచి కాపాడేందుకు మాత్రమే నోటిలో ఉంచుతుంది. అందువల్ల సోషల్ మీడియాలో కనిపించే వీడియోలను చూసి “నోటి నుంచే పిల్లలు పుడతాయి” అనే ప్రచారాన్ని నిజమని నమ్మకూడదని సూచిస్తున్నారు. ప్రకృతి జీవులకు అందించిన అద్భుతమైన సంరక్షణ పద్ధతుల్లో తిలాపియా చేప మౌత్ బ్రూడింగ్ ఒకటి. ఇది జీవుల మనుగడ కోసం ప్రకృతి రూపొందించిన విశిష్టమైన జీవశాస్త్ర వ్యవస్థగా శాస్త్రవేత్తలు పేర్కొంటున్నారు.