ఈ మొక్క కనిపిస్తే అస్సలు వదలొద్దు..! ఎందుకంటే..?

మన ఇంటి చుట్టూ సాధారణంగా పెరిగే కుప్పింటాకు మొక్క, దీనిని ప్రాంతాన్ని బట్టి హరిత మంజరి లేదా మురిపిండి అని కూడా పిలుస్తారు. అపారమైన ఔషధ గుణాలు కలిగిన ఒక అద్భుత వనమూలిక. యూఫోర్బియేసి కుటుంబానికి చెందిన ఈ మొక్క శాస్త్రీయ నామం అకాలిఫా ఇండికా. ఆంగ్లంలో దీనిని ఇండియన్ అకాలిఫా, ఇండియన్ మెర్క్యురి, ఇండియన్ కాఫర్ లీఫ్ లేదా ఇండియన్ నేటిల్ అని కూడా వ్యవహరిస్తారు. దీని ప్రత్యేకత కప్పాకారంలో ఉండే పుష్పగుచ్చం. ఈ మొక్కను పూర్వం నుంచి భారతీయ సంప్రదాయ వైద్యంలో, తమిళుల సిద్ధ వైద్యంలో ఉపయోగిస్తున్నారు. అంతేకాకుండా, పశ్చిమ తూర్పు ఆఫ్రికాలో కూడా ఇది ఒక గొప్ప ఔషధిగా ప్రసిద్ధి చెందింది. ఈ ఆధునిక కాలంలో కూడా వైద్యులు దీనిని వాడమని సిఫార్సు చేయడం కుప్పింటాకు గొప్పతనాన్ని చాటుతుంది.

ప్రధాన ఆరోగ్య ప్రయోజనాలు:

కండరాల నొప్పులు: కుప్పింటాకు తాజా ఆకులను శుభ్రం చేసి రసం తీయాలి. ఈ రసానికి సమానంగా నువ్వుల నూనె కలిపి నీరు ఆవిరి అయ్యే వరకు సన్నటి మంటపై మరిగించి నిల్వ చేసుకోవాలి. కండరాల నొప్పి ఉన్నప్పుడు ఈ నూనెను గోరువెచ్చగా చేసి నొప్పి ఉన్న ప్రదేశంలో రాస్తే ఉపశమనం లభిస్తుంది.

తలనొప్పి: అధిక ఒత్తిడి లేదా ఇతర కారణాల వల్ల వచ్చే తలనొప్పికి, ఈ మొక్క రసాన్ని నుదిటికి రాసి కొంతసేపు విశ్రాంతి తీసుకుంటే తగ్గుతుంది.

చర్మ సౌందర్యం: పూర్వం నుంచి చర్మ సౌందర్యానికి ఈ మొక్కను ఉపయోగించేవారు. ఆకులను మెత్తగా పేస్ట్ చేసి పసుపు కలిపి ముఖానికి అప్లై చేసి పావుగంట తర్వాత చల్లటి నీటితో కడుక్కుంటే ముఖం తెల్లగా, కాంతివంతంగా మారుతుంది. ఇది మొటిమలు, నల్లటి మచ్చలను తగ్గించి, అవాంఛిత రోమాలను కూడా తొలగించడంలో సహాయపడుతుంది.

జీర్ణ, శ్వాసకోశ సమస్యలు: విరోచనం సాఫీగా అవ్వడానికి, శ్వాసకోశ సమస్యలు, కఫం తగ్గించడానికి దీని తాజా ఆకులను రాత్రి గ్లాసు నీటిలో వేసి ఉదయం వడకట్టుకుని రెండు స్పూన్ల మోతాదుగా తాగాలి. అధికంగా తీసుకోకూడదు, వాంతులు అయ్యే అవకాశం ఉంది.

దంత ఆరోగ్యానికి: కుప్పింటాకు వేరుతో దంతాలు తోమితే తెల్లగా, దృఢంగా మారతాయి. ఇది చిగుళ్ల నుండి రక్తం కారడాన్ని ఆపి, చిగుళ్లను గట్టిపరుస్తుంది. ఈ ప్రక్రియ సమస్త దంత సమస్యలను నివారిస్తుంది. ఆకుల రసంలో ఉప్పు కలిపి తోమినా ఇదే ప్రయోజనం.

యాంటీ బాక్టీరియల్, యాంటీ ఇన్ఫ్లమేటరీ గుణాలు: కుప్పింటాకు యాంటీ బాక్టీరియల్, యాంటీ ఇన్ఫ్లమేటరీ ధర్మాలను కలిగి ఉంటుంది. ఇది చర్మ వ్యాధులకు దివ్యౌషధంలా పనిచేస్తుంది. ఆకు పసరులో నిమ్మరసం కలిపి గజ్జి, తామర, దురదలపై రాస్తే తగ్గుతాయి.

విష కీటకాల కాటు: పాముకాటు, తేలుకాటు, కాళ్ళజెర్రి కాటు లేదా కందిరేగ కరిచిన చోట కుప్పింటాకులను ముద్దగా నూరి కాటు ప్రదేశంలో కడితే విషం విరిగిపోతుంది.

మొలల సమస్య: ఈ ఆకులను సేకరించి ఎండించి పొడి చేసుకోవాలి. దీనికి సమానంగా తులసి ఆకుల పొడి కలిపి నిల్వ చేసుకోవాలి. ఈ మిశ్రమాన్ని మూడు వేళ్లతో తీసుకుంటే ఎంత వస్తుందో, అంత మోతాదులో రెండుసార్లు నెయ్యి కలిపి తీసుకుంటే మొలల సమస్య తగ్గుతుంది.

పొట్ట ఇన్ఫెక్షన్లు, నులిపురుగులు: పొట్ట సంబంధిత ఇన్ఫెక్షన్లు ఉంటే, ఆకులను మరియు చిన్న ఉల్లిపాయ రెబ్బలను కలిపి పేస్ట్ చేసి, అన్నంతో కలిపి తింటే తగ్గుతాయి. ఆకులతో కూర వండుకొని మితంగా తింటే కడుపులోని నులిపురుగులు పోతాయి.

పిప్పి పన్ను:  పిప్పి పన్నుతో బాధపడేవారు వీటి ఆకులను నలిపి పిప్పిపన్ను ప్రదేశంలో పెడితే క్రిమి నశించి బాధ తగ్గుతుంది.

గోరుచుట్టు: కుప్పింటాకులకు పసుపు కలిపి ముద్దగా నూరి గోరుచుట్టుపై వేసి కట్టుకడితే నయమవుతుంది.

చుండ్రు: ఈ ఆకుల రసంలో వేపాకుల రసం సమంగా కలిపి తలపై అప్లై చేసి అరగంట తర్వాత తలస్నానం చేస్తే చుండ్రు సమస్య తగ్గుతుంది.

జలుబు, దగ్గు: గుప్పెడు కుప్పింటాకులను శుభ్రం చేసి గ్లాసు నీటిలో వేసి సగం అయ్యేవరకు మరిగించాలి. చల్లారాక ఈ నీటిని పావు కప్పు మోతాదుగా తాగితే జలుబు, దగ్గు తగ్గుతాయి.

నల్ల మచ్చలు, కీళ్లనొప్పులు: మోచేతి నలుపులు, కంటికింద నల్లటి వలయాలు, చంకలలో నలుపులు ఉన్నచోట ఈ మొక్క ఆకుల రసంలో నిమ్మరసం కలిపి రాస్తే నలుపులు పోతాయి. ఆకుల రసంలో ఉప్పు కలిపి కీళ్లనొప్పి ప్రదేశంలో రాస్తుంటే నొప్పి తగ్గుతుంది.

గాయాలు, చర్మపు మంట: గాయాలు, పుండ్లపై ఈ ఆకుల రసాన్ని పిండితే త్వరగా తగ్గుతాయి. చర్మం మంటగా ఉన్నప్పుడు, వేడి కురుపులు, పురుగులు కుట్టిన ప్రదేశంలో తాజా ఆకుల పేస్ట్‌ను అప్లై చేస్తే ఉపశమనం లభిస్తుంది.

ముఖ్య గమనిక: ఈ మొక్కను ఔషధంలా మోతాదుగా మాత్రమే వాడాలి. అధికంగా తీసుకోకూడదు. పిల్లల కోసం ఎదురుచూసేవారు, గర్భిణీ స్త్రీలు కొన్ని ప్రయోజనాలకు దూరంగా ఉండాలి. మీకు తెలియకపోతే నిపుణుల సలహా ప్రకారం వారి సమక్షంలో చేయడం మంచిది.