Heart Health: చలికాలంలో గుండె ఆరోగ్యాన్ని ఎలా కాపాడుకోవాలి..?

చలికాలంలో ఉష్ణోగ్రతలు తగ్గిపోవడం వల్ల గుండె సంబంధిత సమస్యలు పెరుగుతాయని వైద్య నిపుణులు చెబుతున్నారు. వరల్డ్ హెల్త్ ఆర్గనైజేషన్ రిపోర్ట్ ప్రకారం.. వీటిలో ప్రధానంగా హార్ట్ ఎటాక్ కేసులు అధికంగా నమోదవుతున్నాయట. చలికాలంలో శరీరం శీతల ఉష్ణోగ్రతలకు అలవాటు పడే ప్రక్రియలో, రక్తనాళాలు కుదించుకోవడం ప్రారంభిస్తాయి. ఈ పరిస్థితి రక్త సరఫరాను అడ్డుకుని హార్ట్ బ్లాకేజీకి దారి తీస్తుంది.

హార్ట్ బ్లాకేజీ సంకేతాలు

హార్ట్ బ్లాకేజీ ముందే గుర్తించడానికి కొన్ని లక్షణాలు సహాయపడతాయి. ఛాతీ నొప్పి, ఛాతీపై ఒత్తిడి అనుభవించడం, శ్వాస తీసుకోవడంలో ఇబ్బంది పడటం వంటి లక్షణాలు కనిపిస్తాయి. వీటితో పాటు తేలికపాటి వ్యాయామం చేసినా శరీరం అలసిపోవడం, తలనొప్పి, మైకం వంటి సమస్యలు కూడా గమనించాల్సి ఉంటుంది.

ప్రాథమిక జాగ్రత్తలు

హార్ట్ బ్లాకేజీని నివారించడానికి జీవన విధానంలో కొన్ని మార్పులు చేసుకోవాలి. రెగ్యులర్‌గా వ్యాయామం చేయడం, పొగత్రాగడం, మద్యం తాగడం వంటి అలవాట్లకు దూరంగా ఉండడం ముఖ్యం. పౌష్టిక ఆహారం తీసుకోవడం, రోజువారీ జీవన విధానంలో ఆరోగ్యకరమైన అలవాట్లను కలపడం ద్వారా రిస్క్ తగ్గించవచ్చు.

వైద్య సహాయం అవసరం

హార్ట్ బ్లాకేజీ లక్షణాలు కనిపించిన వెంటనే వైద్యులను సంప్రదించడం చాలా ముఖ్యం. ఛాతీ నొప్పి సాధారణంగా గ్యాస్ సమస్య అని అనుకోకూడదు. నిర్లక్ష్యం చేస్తే హార్ట్ ఎటాక్ వచ్చే ప్రమాదం ఉంటుంది. కాబట్టి ఎలాంటి అనుమానాలు ఉన్నా వెంటనే పరీక్షలు చేయించుకోవాలి.

ఊపిరి సమస్యలు

నడక లేదా చిన్న పనులు చేసినప్పుడు ఊపిరి తీసుకోవడంలో ఇబ్బంది కలిగితే అది కూడా హార్ట్ బ్లాకేజీకి సంకేతమై ఉంటుంది. శరీరంలోని అలసటను తగ్గించడానికి సరైన జీవన విధానం అనుసరించడం చాలా అవసరం.

చలికాలంలో ప్రత్యేక జాగ్రత్తలు

చలికాలంలో హార్ట్ బ్లాకేజీ నివారణ కోసం వేడి దుస్తులు ధరించడం, హైడ్రేటెడ్‌గా ఉండటం, మానసిక ఒత్తిడిని తగ్గించడం వంటి చర్యలు తీసుకోవాలి. వారంలో కనీసం ఐదు రోజులు వ్యాయామం చేయడం ద్వారా గుండె ఆరోగ్యం మెరుగుపడుతుంది. క్రమం తప్పకుండా హార్ట్ చెకప్ చేయించుకుంటే ఆరోగ్యపరమైన సమస్యలను ముందుగానే నివారించవచ్చు.

(NOTE: ఇందులోని అంశాలు కేవలం అవగాహన కోసం మాత్రమే. నిపుణులు అందించిన సమాచారం ప్రకారం ఇక్కడ తెలియజేయడమైనది. ఆరోగ్యరీత్యా ఎలాంటి సమస్యలు ఉన్నానేరుగా వైద్య నిపుణులను సంప్రదించడం మంచిది)