Black Garlic: సర్వ రోగ నివారిణి నల్ల వెల్లుల్లి.. ఈ నల్లటి పదార్థం వెనుక ఉన్న రహస్యం ఏంటి?

మన వంటింట్లో అల్లం వెల్లుల్లి పేస్ట్ లేనిదే ఏ కూర పూర్తి కాదు. వెల్లుల్లి అనగానే మనకు వెంటనే మెరిసే తెల్లటి రెబ్బలు గుర్తొస్తాయి. కానీ, ఇప్పుడు మార్కెట్లో ‘నల్ల వెల్లుల్లి’ అందరినీ ఆకర్షిస్తోంది. ఇది ఏదో కృత్రిమంగా రంగు వేసిన పదార్థం కాదు.. అలాగని ఇది ఒక కొత్త రకమైన మొక్క కూడా కాదు. మనం నిత్యం వాడే సాధారణ వెల్లుల్లి నుండే దీనిని తయారు చేస్తారు. దీని రంగు, రుచి, వాసన అన్నీ తెల్ల వెల్లుల్లికి భిన్నంగా ఉంటాయి. ఒకసారి దీనిని వాడితే ఇక తెల్ల వెల్లుల్లిని పక్కన పెట్టేస్తారట! అసలు ఈ నల్ల వెల్లుల్లి ఎలా తయారవుతుంది? ఇందులో ఉన్న ఆ అద్భుత శక్తులేంటో తెలుసుకుందాం..

ఎలా తయారు చేస్తారు..

తెల్ల వెల్లుల్లిని కొన్ని వారాల పాటు నిర్దిష్టమైన ఉష్ణోగ్రత మరియు తేమ ఉన్న గదుల్లో ఉంచడం ద్వారా ఈ నల్ల వెల్లుల్లి తయారవుతుంది. దీనినే ‘ఫర్మెంటేషన్’ (పులియబెట్టడం) ప్రక్రియ అని అంటారు. ఈ సమయంలో వెల్లుల్లిలోని రసాయనాలు మారిపోవడంతో అవి నల్లగా మారుతాయి. తెల్ల వెల్లుల్లిలా ఘాటుగా ఉండదు. ఇది చాలా మెత్తగా, తీపి, పులుపు కలిసిన రుచితో ఉంటుంది. తిన్న తర్వాత నోటి నుండి వచ్చే ఆ ఘాటైన వెల్లుల్లి వాసన ఇందులో అస్సలు ఉండదు.

ఆరోగ్య ప్రయోజనాలు..

తెల్ల వెల్లుల్లి కంటే నల్ల వెల్లుల్లిలో పోషకాలు, యాంటీ ఆక్సిడెంట్లు రెండు రెట్లు ఎక్కువగా ఉంటాయి. ఇది శరీరంలోని చెడు కొలెస్ట్రాల్‌ను తగ్గించి, రక్త ప్రసరణను మెరుగుపరుస్తుంది. తద్వారా గుండెపోటు ప్రమాదాన్ని తగ్గిస్తుంది. ఇందులో ఉండే యాంటీ కార్సినోజెనిక్ గుణాలు క్యాన్సర్ కణాల వృద్ధిని అడ్డుకుంటాయని పరిశోధనలు చెబుతున్నాయి. ఇన్ఫెక్షన్లు, అలర్జీల బారి నుండి శరీరాన్ని రక్షించడానికి ఇది ఒక సహజ సిద్ధమైన ఔషధంగా పనిచేస్తుంది. రక్తంలోని చక్కెర స్థాయిలను నియంత్రించడంలో ఇది కీలక పాత్ర పోషిస్తుంది.

దీనిని నేరుగా కూడా తినవచ్చు లేదా సాస్‌లు, సలాడ్లు మరియు పిజ్జాలపై టాపింగ్‌గా వాడుకోవచ్చు. విదేశాల్లో దీనిని సూప్‌లు, మాంసాహార వంటకాల్లో రుచి కోసం ఎక్కువగా ఉపయోగిస్తుంటారు. మన దేశంలో కూడా దీని ప్రాముఖ్యత ఇప్పుడు నెమ్మదిగా పెరుగుతోంది. అమ్మమ్మల కాలం నుండి వెల్లుల్లిని ఔషధంగా వాడుతూనే ఉన్నాం. కానీ, ఇప్పుడు ఆధునిక టెక్నాలజీతో రూపుదిద్దుకున్న ఈ నల్ల వెల్లుల్లి మాత్రం ‘సూపర్ ఫుడ్’ గా గుర్తింపు పొందింది. కేవలం రుచి కోసం మాత్రమే కాకుండా, ఆరోగ్యం కోసం కూడా దీనిని డైట్‌లో చేర్చుకోవడం మంచిదని నిపుణులు సూచిస్తున్నారు.