ప్రభాస్‌ కోసం రంగంలోకి దిగిన విజయ్‌ సంగీత దర్శకుడు..!

సగానికి పైగా షూటింగ్‌ జరుపుకున్న ప్రభాస్‌ 20వ మూవీకి సంగీత దర్శకుడు షాక్‌ ఇచ్చినట్లు ఆ మధ్య వార్తలు వచ్చిన విషయం తెలిసిందే. ఈ సినిమా కోసం ‘సైరా’ ఫేమ్ అమిత్‌ త్రివేదిని ఎన్నుకోగా.. కొన్ని కారణాల వలన ఈ ప్రాజెక్ట్ నుంచి ఆయన తప్పుకున్నారు. ఈ విషయంపై ఆయన ఓ సందర్భంలో క్లారిటీ కూడా ఇచ్చారు. ప్రభాస్‌ మూవీకి తాను పనిచేయడం లేదని ఆయన అన్నారు. దీంతో ప్రభాస్ మూవీకి సంగీతం ఎవరు అందించబోతున్నారు..? సాహోలాగే ఈ సినిమాకు కూడా అవుతుందా..? అని ఫ్యాన్స్‌ ఆందోళన చెందారు. అయితే తాజా సమాచారం ప్రకారం ప్రభాస్‌ టీమ్‌ సంగీత దర్శకుడిని ఫైనల్ చేసినట్లు తెలుస్తోంది.

కోలీవుడ్ యువ సంగీత దర్శకుడు జస్టిన్ ప్రభాకరన్‌ని ప్రభాస్ సినిమా కోసం తీసుకున్నట్లు సమాచారం. అంతేకాదు ఈ మూవీ కోసం ప్రభాకరన్ ఇప్పటికే రెండు పాటలను కూడా పూర్తి చేసినట్లు తెలుస్తోంది. ప్రభాస్ మూవీ టైటిల్‌ గానీ, ఫస్ట్‌లుక్‌ గానీ విడుదలైన సమయంలో ప్రభాకరన్‌ పేరును అధికారికంగా ప్రకటించబోతున్నట్లు టాక్. కాగా ప్రభాకరన్, విజయ్‌ దేవరకొండ నటించిన డియర్ కామ్రేడ్ చిత్రానికి సంగీతం అందించారు. ఈ సినిమా ఫ్లాప్ అయినప్పటికీ.. పాటలు మాత్రం అందరినీ ఆకట్టుకున్నాయి. ఈ క్రమంలోనే ప్రభాస్ టీమ్ అతడిని ఎంచుకున్నట్లు తెలుస్తోంది. కాగా రొమాంటిక్‌ ఎంటర్‌టైనర్‌గా ప్రభాస్ 20వ చిత్రం తెరకెక్కుతోంది. ఇందులో ప్రభాస్ సరసన పూజా హెగ్డే నటిస్తుండగా.. జగపతి బాబు, భానుశ్రీ తదితరులు కీలక పాత్రల్లో కనిపించనున్నారు. యూవీ క్రియేషన్స్, గోపికృష్ణ బ్యానర్ సంయుక్తంగా ఈ మూవీని నిర్మిస్తున్నారు. జిల్ ఫేమ్ రాధాకృష్ణ కుమార్ దర్శకత్వం వహిస్తున్నారు.

Read This Story Also: అలా చేస్తే కరోనా కేసులు తగ్గుతాయట.. ట్రంప్‌ ఆసక్తికర వ్యాఖ్యలు