అయ్యో పాపం.. కళ్ళు చిదంబరం కళ్ళ వెనక ఇంతా కథ ఉందా.! తెలిస్తే షాక్ అవుతారు

కళ్ళు చిదంబరం.. ఈ నటుడి గురించి తెలియని తెలుగు ప్రేక్షకులు ఉండరు. తెలుగు సినీ చరిత్రలో ఒక విలక్షణమైన గుర్తింపు పొందిన నటుడు ఆయన. కళ్ళు చిదంబరం కేవలం ఒక సినీ నటుడిగానే కాకుండా, నాటక రంగంలో జీవితాన్ని అంకితం చేసిన నిజాయితీ గల కళాకారుడిగా, విద్యావంతుడిగా, విశాఖపట్నం పోర్ట్ ట్రస్ట్‌లో సివిల్ ఇంజనీర్‌గా కూడా సేవలందించారు. ఆయన జీవితం నాటక కళ పట్ల ఆయనకున్న అపారమైన ప్రేమకు, నిబద్ధతకు అద్దం పడుతుంది. కళ్ళు చిదంబరం, చిన్ననాటి నుంచే నాటకాలపై ఆసక్తి పెంచుకున్నారు. సివిల్ ఇంజనీరింగ్‌లో పట్టా పొంది, విశాఖపట్నం పోర్ట్ ట్రస్ట్‌లో అసిస్టెంట్ ఇంజనీర్‌గా ఉద్యోగంలో చేరారు. ఉద్యోగం చేస్తూనే, తన కళా దాహాన్ని తీర్చుకోవడానికి నాటకాలను కొనసాగించారు. పాఠశాల దశ నుంచే 36 నాటకాలకు పైగా ప్రదర్శించిన ఆయన, వందలాది నాటకాలకు దర్శకత్వం వహించి, కళాకారులను ప్రోత్సహించారు. విశాఖపట్నంలో “నటీనటుల సమాఖ్య”ను స్థాపించి, ఎంతో మంది ఔత్సాహిక కళాకారులకు మార్గదర్శిగా నిలిచారు. వైజాగ్ నాటక రంగంలో ఆయనను “కింగ్” అని పిలిచేవారు.

ఆయన పేరు ముందున్న కళ్ళు అనే పదం వెనుక ఒక ఆసక్తికరమైన కథ ఉంది. వాస్తవానికి ఆయన కళ్ళు మామూలుగానే ఉండేవి. నాటక ప్రదర్శనలలో నిరంతరం హావభావాలు ప్రదర్శించడం, పాత్రలో లీనమై ఎక్కువ ఒత్తిడి ఇవ్వడం వల్ల ఆయన కళ్ళు పక్కకు వెళ్లిపోయాయి. ఇది వైద్యానికి కూడా అందని స్థితికి చేరి, ఆయనకు ఒక ప్రత్యేకమైన రూపాన్ని ఇచ్చింది. ఈ రూపాన్నే ఆయన తన సినీ ప్రయాణంలో సానుకూలంగా మార్చుకున్నారు. 1988లో విడుదలైన కళ్ళు చిత్రంలో అంధుడి పాత్రలో ఆయన అద్భుత నటనకు ప్రేక్షకుల ప్రశంసలు, అవార్డులు లభించాయి. ఆ సినిమాతోనే కళ్ళు చిదంబరం అనే పేరు ఆయనకు స్థిరపడింది.

సినీ రంగంలోకి 43 సంవత్సరాల వయస్సులో అడుగుపెట్టిన చిదంబరం, దాదాపు 400 చిత్రాలలో నటించారు. అప్పుల అప్పారావు, అమ్మోరు, గోవిందా గోవిందా వంటి చిత్రాలలో ఆయన పాత్రలు చిరస్మరణీయం. రామ్ గోపాల్ వర్మ ఆయనను ఎంతో ప్రోత్సహించారు. గోవిందా గోవిందా చిత్రంలో శ్రీదేవి మొదట ఆయనతో నటించడానికి భయపడినా, రామ్ గోపాల్ వర్మ కళ్ళు చిదంబరం యొక్క విద్యా అర్హతలు, నాటక రంగంలో ఆయనకున్న గౌరవాన్ని వివరించి ఒప్పించగలిగారు. చిదంబరం సినీ రంగంలో ఎంత బిజీ అయినా, ఉద్యోగాన్ని మాత్రం వదల్లేదు. తన జీవితానికి ఆధారం, అన్నం పెట్టింది ఉద్యోగమే అని బలంగా నమ్మిన ఆయన, రిటైర్మెంట్ వరకు పోర్ట్ ట్రస్ట్‌లో కొనసాగారు. తన కుటుంబానికి ఆర్థిక భద్రత కల్పించడం, తనపై నమ్మకంతో ఉద్యోగం ఇచ్చిన వారికి సేవ చేయడం తన బాధ్యతగా భావించారు. 2013 నుంచి ఊపిరితిత్తుల వ్యాధితో బాధపడుతున్నా, నాటకాల కోచింగ్‌ను ఆపలేదు. తన చివరి రోజుల్లోనూ కళా సేవలోనే గడిపారు. 2015లో విశాఖపట్నంలోని కేర్ హాస్పిటల్‌లో తుది శ్వాస విడిచారు. ఆయన మరణం విశాఖపట్నం నాటక రంగానికి తీరని లోటును మిగిల్చింది. కళ్ళు చిదంబరం కేవలం ఒక నటుడు కాదు, కళా సేవకు జీవితాన్ని అంకితం చేసిన ఒక మహోన్నత వ్యక్తి.

ఇవి కూడా చదవండి

జీవితం మీద నిరాశ కలిగితే స్మశానానికి వెళ్లి కూర్చుంటా..

ఆ సినిమా సక్సెస్ మీట్‌లో అవమానించారు..

చిరంజీవి, బాలయ్యకు మించి క్రేజ్.. కానీ

మా నాన్నకు ఇద్దరు భార్యలు..

మరిన్ని సినిమా వార్తల కోసం ఇక్కడ క్లిక్ చేయండి.