Tollywood : సెన్సార్ రిజెక్ట్ చేసింది.. కట్ చేస్తే.. బాక్సాఫీస్ షేక్ చేసిన సినిమా.. ఇప్పటికీ టీవీలకు అతుక్కుపోతారు..

తెలుగు సినిమా చరిత్రలో ఎప్పటికీ చెరగని రికార్డు క్రియేట్ చేసుకున్న కామెడీ క్లాసిక్ చిత్రం “జంబలకిడి పంబ”. ఇప్పటికీ ఈ సినిమా వస్తుందంటే చాలు జనాలు టీవీలకు అతుక్కుపోతుంటారు. అయితే ఆ సినిమా నిర్మాణ వెనుక అనేక ఆసక్తికర విషయాలు ఉన్నాయి. నిర్మాతలు జె. పుల్లా రావు, జె. భగవాన్, స్టార్ ప్రొడ్యూసర్ డివివి దానయ్యతో కలిసి ఈ సాహసోపేతమైన చిత్రాన్ని నిర్మించారు. “ఆడవాళ్ళు మగవాళ్ళలా, మగవాళ్ళు ఆడవాళ్ళలా” అనే వినూత్న కాన్సెప్ట్‌తో రూపొందిన ఈ సినిమా ప్రస్థానాన్ని వారు తాజాగా ఓ ఇంటర్వ్యూలో పంచుకున్నారు. నిర్మాతల కథనం ప్రకారం, ఈవీవీ సత్యనారాయణ ఈ కాన్సెప్ట్‌ను చాలా కాలంగా తన దగ్గర పెట్టుకున్నారు. జంధ్యాల దగ్గర పనిచేసిన సమయంలో, ఈవీవీ “మొగుడు పెళ్ళాల” సినిమా టైటిల్స్‌లో ఈ “లింగ మార్పిడి” నేపథ్యాన్ని ఉపయోగించి మంచి స్పందన పొందారు. ఇదే ఆయనకు “జంబలకిడి పంబ” పూర్తి కథను తెరకెక్కించడానికి ప్రేరణగా నిలిచింది. అయితే, కథా చర్చల సమయంలో, ఈ ప్రత్యేకమైన పాయింట్ నేరుగా చెప్పడం వల్ల కథ ముందుకు సాగక ఒక దశలో ఆగిపోయింది.

ఎక్కువ మంది చదివినవి : Sampath Raj : అలాంటి హీరోను ఎక్కడా చూడలేదు.. ఆయన యాక్టింగ్ చూసి ఫిదా అయిపోయా.. నటుడు సంపత్ రాజ్..

ఈ సమయంలోనే రచయిత దివాకర్ బాబు రంగప్రవేశం చేశారు. ఆయన, కథను ముందు సాధారణంగా ప్రారంభించి, ఆ తర్వాత ఒక మందు ప్రభావంతో పాత్రలను మార్చాలనే అద్భుతమైన స్క్రీన్ ప్లేను అందించారు. అంతేకాదు, అప్పటిదాకా ఉన్న ఫస్ట్ హాఫ్‌ను సెకండ్ హాఫ్‌గా మార్చి, కొత్తగా ఫస్ట్ హాఫ్‌ను రాయించారు. దివాకర్ బాబు అందించిన ఈ స్క్రీన్ ప్లే, సినిమా విజయంలో కీలక పాత్ర పోషించింది. “జంబలకిడి పంబ” అనే వినూత్నమైన టైటిల్‌ను కూడా దివాకర్ బాబే సూచించారు. వాస్తవానికి, ఈవీవీ ఈ సినిమాకు ముందు “రివర్స్ గేర్” అనే టైటిల్‌ను అనుకున్నారు, కానీ స్నేహితుల సలహా మేరకు ఆ టైటిల్‌ను మార్చారు. ఈవీవీ ఎటువంటి మొహమాటం లేకుండా మంచి సలహాలను స్వీకరించే మనస్తత్వం ఉన్న వ్యక్తి అని నిర్మాతలు పేర్కొన్నారు. సినిమా తొలి కాపీ సిద్ధమయ్యాక, పలువురు ప్రివ్యూ చూసినవారు ఈ కాన్సెప్ట్ అర్థం చేసుకోవడం కష్టమని, ప్రేక్షకులు స్వీకరించరని తీవ్ర అభ్యంతరాలు వ్యక్తం చేశారు. అంతేకాదు, సెన్సార్ బోర్డు కూడా ఈ సినిమాపై అభ్యంతరాలు చెప్పింది. దీంతో నిర్మాతలు రివైజింగ్ కమిటీని ఆశ్రయించారు. అప్పటి చైర్మన్ సుబ్రహ్మణ్యం రెడ్డి సినిమాను చూసి, “సినిమా చాలా బాగుంది, బయట చెప్పినట్లుగా ఏమీ లేదు” అని ప్రశంసించి, క్లీన్ సర్టిఫికెట్ ఇచ్చారు.

ఎక్కువ మంది చదివినవి : Trending Song: వామ్మో.. ఇదేం క్రేజ్ రా బాబూ.. యూట్యూబ్‏ను షేక్ చేస్తున్న పక్కా ఫోక్ సాంగ్.. ఇన్ స్టాలో దుమ్మురేపుతున్న రీల్స్..

ఈవీవీ సత్యనారాయణ, నిర్మాతలకు తోడుగా తన భార్య సరస్వతి కుమారి పేరు మీద పార్ట్‌నర్‌గా జతకలిశారు. హీరో నరేష్‌ను ఈ సినిమాకు ఎంపిక చేసుకోవడం వెనుక కూడా ఒక ఆసక్తికర కారణం ఉంది. జంధ్యాల దగ్గర పనిచేసిన అనుభవం ఉండటంతో, నరేష్‌తో నిర్మాతలు, ఈవీవీకి మంచి అనుబంధం ఉండేది. మొదటి నుండి నరేష్‌తోనే ఈ సినిమా తీయాలని నిర్ణయించుకున్నారు. “జంబలకిడి పంబ” విజయం నరేష్ కెరీర్‌కు ఒక మలుపు అని, అంతకు ముందు రాజేంద్ర ప్రసాద్‌తో కామెడీ సినిమాల్లో ఉండే పోటీలో నరేష్ కు ఈ సినిమాతో వాణిజ్యపరంగా మరింత పట్టు లభించిందని నిర్మాతలు గుర్తు చేసుకున్నారు. ఈ సినిమా అద్భుత విజయం సాధించి, తెలుగు సినిమా చరిత్రలో ఒక విచిత్రమైన, విభిన్నమైన కాన్సెప్ట్‌తో ప్రేక్షకుల మదిలో నిలిచిపోయింది.

ఎక్కువ మంది చదివినవి : Sirivennela Sitaramasastri : మనిషి జీవితంలో ఎదగటానికి ఈ లక్షణాలు ఉంటే చాలు.. సిరివెన్నెల సీతారామ శాస్త్రి..

ఎక్కువ మంది చదివినవి : Vadde Naveen: ఒకప్పుడు లవర్ బాయ్.. వడ్డె నవీన్ కొడుకును చూశారా.. ? వైరలవుతున్న ఫోటోస్..