సినీ ఇండస్ట్రీలో కలకలం.. డ్రగ్స్ కేసులో తెరపైకి ఇద్దరు యువ నటుల పేర్లు!
టాలీవుడ్ డ్రగ్స్ కేసులో కొకైన్ రవాణా చేస్తుండగా జూన్ 14న కబాలి నిర్మాత కేపీచౌదరిని రాజేంద్రనగర్ పోలీసులు అరెస్టు చేసిన సంగతి తెలిసిందే. ఈ కేసులో పెడ్లర్లతో పరిచయాలున్న పలువురి పేర్లు బయటకొస్తున్నాయి. ఈ జాబితాలో తాజాగా ఇద్దరు..
Updated on: Jun 25, 2023 | 10:38 AM
టాలీవుడ్ డ్రగ్స్ కేసులో కొకైన్ రవాణా చేస్తుండగా జూన్ 14న కబాలి నిర్మాత కేపీచౌదరిని రాజేంద్రనగర్ పోలీసులు అరెస్టు చేసిన సంగతి తెలిసిందే. ఈ కేసులో పెడ్లర్లతో పరిచయాలున్న పలువురి పేర్లు బయటకొస్తున్నాయి. ఈ జాబితాలో తాజాగా ఇద్దరు యువ నటుల పేర్లు సామాజిక మాధ్యమాల్లో చక్కర్లు కొడుతున్నాయి. ఐతే వారెవరన్నది పోలీసులు బయటపెట్టడం లేదు.
నిందితుడు కేపీ చౌదరి ఫోన్లలో వందల ఫొటోలు, సెల్ నంబర్లను పోలీసులు గుర్తించారు. వారిలో టాలీవుడ్, కోలీవుడ్ సినీ నటులు, రాజకీయ, వ్యాపారవర్గాలకు చెందిన బడా బాబుల పేర్లు ఉన్నట్లు నిర్ధారించారు. రిమాండ్ రిపోర్టులో పేర్కొన్న 12 మందితో ఫోన్ ద్వారా సంప్రదింపులు జరిపినట్లు పోలీసులు గుర్తించారు. అలాగే 11 అనుమానాస్పద బ్యాంకు లావాదేవీలను సైతం పోలీసులు దృష్టిసారించారు. కేపీచౌదరి దందాలో ఎంతమందికి డ్రగ్స్ విక్రయించాడు, ఎందరు కొకైన్ వినియోగిస్తున్నారనే దానిపై స్పష్టత వచ్చిన తర్వాతనే చర్యలు తీసుకుంటామని, ప్రస్తుతం ఎవరికీ నోటీసులు ఇవ్వబోమని పోలీసులు తెలిపారు.
ఇక రిమాండ్ రిపోర్టులో పేర్లున్న వారిలో కొందరు సామాజిక మాధ్యమాల ద్వారా స్పందిస్తూ.. కేపీ చౌదరి ఫోన్లో తమ నంబర్లు ఉన్నంత మాత్రాన తమను డ్రగ్స్ వాడేవారి జాబితాలో చేర్చుతారా ? అంటూ తీవ్ర ఆవేదన వ్యక్తం చేశారు. కొన్ని మాధ్యమాలు, మీడియా సంస్థలు తనపై తప్పుడు ప్రచారం చేస్తున్నాయంటూ నటి అషురెడ్డి ఇన్స్టా ఖాతాలో పోస్టు పెట్టింది. సామాజిక మాధ్యమాల్లో మరో నటి ఫొటోలు చక్కర్లు కొడుతుండటంతో సదరు నటి కూడా స్పందించింది. అవి తన వ్యక్తిగతమని, కేసులో పోలీసులకు సహకరిస్తానంటూ స్పష్టం చేసింది. ఇక ఈ కేసులో ఇప్పటివరకు బయటకు వచ్చిన వారిపై పోలీసులు ఎలాంటి చర్యలు తీసుకుంటారనేది చర్చనీయాంశంగా మారింది.
మరిన్ని సినిమా కథనాల కోసం క్లిక్ చేయండి.
