Krishna Vamsi : ఎన్టీఆర్‏తో ఆ సినిమా.. ఎందుకు ప్లాప్ అయ్యిందో ఇప్పటికీ అర్థం కాదు.. డైరెక్టర్ కృష్ణవంశీ..

దర్శకుడు కృష్ణవంశీ ఇటీవల ఓ ఇంటర్వ్యూలో తన సినీ జీవితంలోని పలు ఆసక్తికర విషయాలను వెల్లడించారు. ముఖ్యంగా జూనియర్ ఎన్టీఆర్ నటించిన రాఖీ సినిమా గురించి, దాని సామాజిక ప్రభావం గురించి, రైటర్స్, నటీనటులతో తన అనుభవాలను పంచుకున్నారు. రాఖీ సినిమా మహిళలపై వేధింపులు అనే సున్నితమైన సామాజిక సమస్యను ప్రధానాంశంగా తీసుకుందని కృష్ణవంశీ పేర్కొన్నారు. ఈ సమస్య కొత్తదేమీ కాదని, వందల సంవత్సరాలుగా సమాజంలో ఉందని అన్నారు. అప్పట్లో మీడియా లేకపోవడం వల్ల ఇలాంటి సంఘటనలు ఎక్కువగా వెలుగులోకి రాలేదని, ఇప్పుడు మీడియా ప్రభావం వల్ల ఎక్కువగా ప్రచారమవుతున్నాయని అన్నారు. రాఖీ కథను పదేళ్ల ముందు బాలకృష్ణ అనే వ్యక్తి చెప్పారని, మొదట సొంత కథలనే చేస్తానని చెప్పినా, తర్వాత జూనియర్ ఎన్టీఆర్ లాంటి పవర్‌ఫుల్ స్టార్‌కి సరిపడా కథ కోసం దీనిని తిరిగి వెలికితీసినట్లు వివరించారు. ఎన్టీఆర్ మల్టీ టాలెంటెడ్, అద్భుతమైన డాన్సర్, డైలాగ్స్ చెప్పడంలో, జ్ఞాపకశక్తిలో, నటనలో తిరుగులేని వాడని అన్నారు. రాఖీ సినిమాలో సుహాసినిని కాలితో తన్నే సన్నివేశం గురించి మాట్లాడుతూ, ఆ సన్నివేశానికి అవసరమైన భావోద్వేగాల కోసమే అలా చిత్రీకరించామని, నటులు సయాజీ షిండే, సుహాసినిల అద్భుతమైన సమయస్ఫూర్తితో అది సాధ్యమైందని తెలిపారు. సయాజీ షిండే అసాధారణ నటుడని, మంచి మనిషి అని చెప్పుకొచ్చారు.

రైటర్స్ గురించి మాట్లాడుతూ, దివంగత శాస్త్రిగారి లోటు పూరించలేనిదని, ఆయన లేనిది తన సినిమాలు లేవని అన్నారు. అయితే, చంద్రబోస్, అనంత శ్రీరామ్, సుద్దాల అశోక్ తేజ, శివకుమార్, శక్తి, లక్ష్మీ భూపాల్ వంటి బ్రిలియంట్ రైటర్స్‌తో తాను పనిచేశానని, కొత్త కథలతో ముందుకు వెళ్లడానికి ఇటువంటి రచయితలు ఎప్పుడూ అందుబాటులో ఉంటారని చెప్పారు. రంగమార్తాండ సినిమాకు శాస్త్రిగారే రాసి ఉన్నారని, ఆ తర్వాత కొత్త ప్రాజెక్ట్‌లకు కొత్త రచయితలతో పనిచేయాలని భావిస్తున్నట్లు తెలిపారు.

నటీనటుల గురించి ప్రస్తావిస్తూ, సౌందర్య, సోనాలి బింద్రే, మహేశ్వరి, టబు, సంఘవి, గీత, ఇషా కొప్పీకర్, శివాని, కాజల్ అగర్వాల్, సింధు మేనన్, జెనీలియా డిసౌజా, భావన వంటి అనేక మంది గొప్ప నటీమణులతో పనిచేశానని, వారందరూ తనకు ఇష్టమైనవారేనని అన్నారు. ముఖ్యంగా రమ్యకృష్ణ గురించి మాట్లాడుతూ, రంగమార్తాండలో ఆమె నటన తనను ఎంతగానో ఆకట్టుకుందని చెప్పారు. బాహుబలిలోని శివగామి పాత్రకు బలమైన డైలాగ్స్, స్టేజింగ్ వంటివి తోడైతే, రంగమార్తాండలో కేవలం కళ్ళతోనే అద్భుతమైన భావాలను పలికించారని అన్నారు. రమ్యకృష్ణ చాలా సరదాగా ఉండే వ్యక్తి అని, స్మార్ట్, షార్ప్‌గా ఉంటారని, అలాగే వంట చేయడాన్ని కూడా ఎంతో ఆస్వాదిస్తారని, షూటింగ్‌లలో కూడా స్వయంగా వంటకాలు సిద్ధం చేసుకుంటారని కృష్ణవంశీ వివరించారు. ఆమె చేసే చికెన్ బిర్యానీ, రసాలు చాలా ఇష్టమని తెలిపారు.

ఎక్కువ మంది చదివినవి : Tollywood : గ్లామర్ సీన్స్ చేస్తానని ఏడ్చేశాను.. నాకెందుకు అలాంటి సీన్స్ రాలేదు.. టాలీవుడ్ హీరోయిన్..

ఎక్కువ మంది చదివినవి :  Cinema : రూ.150 కోట్లు పెట్టి పరమ చెత్త సినిమా తీశారు.. ఇండస్ట్రీలో అతిపెద్ద డిజాస్టర్.. ఇప్పటికీ కోలుకోని నిర్మాత..