Actor Suman: ఆ ఒక్క సినిమా నన్ను రాష్ట్రపతి పక్కన కూర్చోబెట్టింది..

ప్రముఖ నటుడు సుమన్, తన సుదీర్ఘ సినీ ప్రస్థానంలో అన్నమయ్య చిత్రాన్ని ఒక దైవిక ఆశీర్వాదంగా, ఒక మలుపుగా అభివర్ణించారు.  ఓ ఇంటర్వ్యూలో ఆయన ఈ సినిమా అనుభవాలను, తన వ్యక్తిగత జీవిత తత్వాలను పంచుకున్నారు. సినీ పరిశ్రమలోకి తాను రావడానికి దేవుడు కల్పించిన కారణం వెంకటేశ్వర స్వామి పాత్రను పోషించడమేనని సుమన్ పేర్కొన్నారు. వెంకటేశ్వర స్వామి పాత్రను పోషించడం అంత సులభం కాదని సుమన్ తెలిపారు. ఈ పాత్ర కోసం అప్పటి మహా నటుడు ఎన్.టి. రామారావు గారిని ఆదర్శంగా తీసుకున్నానని, ఆయన అనుసరించిన నిష్ఠను తాను కూడా పాటించానని వెల్లడించారు. ఎనిమిది నెలల పాటు, ఉదయం 3 గంటలకు నిద్ర లేచి, చల్లని నీటితో స్నానం చేసి, శాకాహారిగా ఉంటూ, కుటుంబ జీవితానికి దూరంగా, అన్నపూర్ణ స్టూడియోస్‌కు ఉదయం 5 గంటలకే షూటింగ్‌కు చేరుకునేవారట. ఈ కఠినమైన నియమాలను పాటించడం వల్లనే ఆ పాత్రకు న్యాయం చేయగలిగానని ఆయన అన్నారు.

అన్నమయ్య చిత్ర విజయం వెనుక దర్శకుడు కె. రాఘవేంద్ర రావు  అద్భుతమైన దర్శకత్వం, నిర్మాత దొరస్వామి రాజు అంకితభావం, సాంకేతిక నిపుణులైన ఛాయాగ్రాహకుడు విన్సెంట్, సంగీత దర్శకుడు ఎమ్.ఎమ్. కీరవాణి, వెంకటేశ్వర స్వామి పాత్రకు గాత్రం అందించిన దివంగత ఎస్.పి. బాలసుబ్రహ్మణ్యం వంటి వారి సమిష్టి కృషే కారణమని సుమన్ పేర్కొన్నారు. తాను కేవలం ఒక “విగ్రహం” మాత్రమేనని, ఆ విగ్రహానికి రంగులు పూసి, అందంగా తీర్చిదిద్దింది ఈ గొప్ప బృందమేనని ఆయన వినయంగా తెలిపారు. అన్నమయ్య సినిమా ఒక సాధారణ యాక్షన్ లేదా రొమాంటిక్ చిత్రం కాదని, అది ఒక డివోషనల్ అనుభూతిని పంచుతుందని, నేటికీ టీవీలో చూసినా అదే అనుభూతి కలుగుతుందని సుమన్ అభిప్రాయపడ్డారు. ఈ సినిమా సుమన్‌కు ఒక అరుదైన గౌరవాన్ని కూడా తెచ్చిపెట్టింది. అప్పటి భారత రాష్ట్రపతి శంకర్ దయాళ్ శర్మ అన్నమయ్య సినిమాను వీక్షించాలని కోరగా, రాష్ట్రపతి భవన్‌లో ప్రత్యేక ప్రదర్శన ఏర్పాటు చేశారు. ఈ సందర్భంగా సుమన్‌ను ప్రత్యేకంగా ఆహ్వానించి, రాష్ట్రపతి పక్కనే కూర్చొని సినిమా చూసే అద్భుతమైన అవకాశం లభించింది. సినిమా చూసిన తర్వాత రాష్ట్రపతితో కలిసి భోజనం చేయడం, సత్కారం అందుకోవడం తన జీవితంలో అత్యంత మరచిపోలేని, దైవిక యోగంగా సుమన్ అభివర్ణించారు. సీబీఐ డైరెక్టర్ డి.ఆర్. కార్తికేయన్, త్రివిధ దళాధిపతులు వంటి ప్రముఖులు కూడా ఆ కార్యక్రమంలో పాల్గొన్నారని ఆయన గుర్తు చేసుకున్నారు.

తన వ్యక్తిగత జీవితంలో ఎదురైన కష్టాల నుంచి మార్షల్ ఆర్ట్స్, ధ్యానం, కర్మ సిద్ధాంతంపై తనకున్న ప్రగాఢ నమ్మకం తనకు శక్తిని ఇచ్చాయని సుమన్ పంచుకున్నారు. “ఇదొక దశ మాత్రమే, ప్రతిఒక్కరూ దాటిపోవాల్సిందే” అనే తత్వంతో తాను ముందుకు సాగానని తెలిపారు. తన కెరీర్ పట్ల పూర్తి సంతృప్తితో ఉన్నానని, “స్టార్” అనే హోదాను తాను కోరుకోనని, కేవలం “నటుడు సుమన్” అని పిలిపించుకోడానికే ఇష్టపడతానని ఆయన అన్నారు. తెలుగు, తమిళం, కన్నడ, మలయాళం, హిందీ, ఒరియా, భోజ్‌పురి, బంజారా, ఇంగ్లీష్‌తో సహా పది భాషల్లో నటించానని.. తుళు చిత్రంతో పదకొండో భాషలో కూడా నటించినట్లు సుమన్ సంతోషంగా ప్రకటించారు. డివోషనల్, యాక్షన్, రొమాంటిక్, ఫ్యామిలీ, టీవీ సీరియల్స్, వెబ్ సిరీస్‌లు, ఓటీటీ, డిజిటల్ సినిమాలతో సహా అన్ని రకాల ప్రయోగాలు చేశానని, ప్రస్తుతం సినిమా పట్ల తనకు అంతులేని అభిరుచి ఉందని సుమన్ ముగించారు.

మరిన్ని ఎంటర్టైన్మెంట్ వార్తల కోసం ఇక్కడ చూడండి..