Chiranjeevi: చిరంజీవి మీద విషప్రయోగం.. 38 ఏళ్ళ కింద జరిగిన ఈ ఘటన మీకు తెలుసా..?

ఏంటి చిరంజీవి మీద విషప్రయోగం జరిగిందా అని ఆశ్చర్యపోతున్నారు కదా..? ఇప్పుడంటే సోషల్ మీడియా యుగం కాబట్టి అన్నీ ఇట్టే తెలిసిపోతున్నాయి కానీ ఒకప్పుడు అవన్నీ ఎక్కడున్నాయి..? అందుకే చాలా విషయాలు బయటికి కూడా రాలేదు. టాలీవుడ్ ఖ్యాతిని శిఖరాగ్రానికి చేర్చిన మెగాస్టార్ చిరంజీవి ప్రస్థానం పూలపాన్పులా సాగలేదనేది అక్షర సత్యం. ఆయన సుప్రీమ్ హీరో స్థాయి నుంచి మెగాస్టార్ హోదాకు చేరుకుంటున్న తరుణంలో ఎన్నో అవాంతరాలను, కుట్రలను ఎదుర్కోవాల్సి వచ్చింది. వాటిలో అత్యంత భయానకమైనది ఆయనపై జరిగిన ఒక ప్రాణాపాయ కుట్ర. సుమారు 28 ఏళ్ళ క్రితం ఆయనను చంపడానికి జరిగిన ఒక విషప్రయోగం అప్పట్లో దేశవ్యాప్తంగా పెను సంచలనం సృష్టించింది. ఈనాటి తరానికి పెద్దగా పరిచయం లేని ఆ నాటి దారుణ ఘటన తాలూకు వివరాలు ఇప్పటికీ ఇండస్ట్రీలో ఒక చేదు జ్ఞాపకంలా మిగిలిపోయాయి.

ఈ ఉదంతం ఎన్టీఆర్ ముఖ్యమంత్రిగా ఉన్న 1988వ సంవత్సరంలో చోటు చేసుకుంది. ఆ సమయంలో వరుసగా సూపర్ హిట్లు సాధిస్తూ టాలీవుడ్ నంబర్ వన్ హీరోగా చిరంజీవి తన స్థానాన్ని సుస్థిరం చేసుకుంటున్నారు. సరిగ్గా అదే సమయంలో మద్రాస్ బేస్ కోర్టు పరిసరాల్లో ‘మరణ మృదంగం’ సినిమా షూటింగ్ శరవేగంగా జరుగుతోంది. తమ అభిమాన నటుడిని నేరుగా చూసేందుకు ఆ రోజు లొకేషన్‌కు ప్రేక్షకులు పెద్ద ఎత్తున తరలివచ్చారు. ఆ జనసందోహంలోనే ఒక గుర్తుతెలియని వ్యక్తి తన పుట్టినరోజు నెపంతో చిరంజీవి వద్దకు చేరుకున్నాడు. చిరంజీవి చేతుల మీదుగా తన బర్త్‌డే కేక్ కట్ చేయించుకోవాలనేది తన చిరకాల కోరిక అని ఆ ఆగంతుకుడు నమ్మబలికాడు. అభిమానుల పట్ల ఎప్పుడూ ఆప్యాయత చూపే చిరు, ఏమాత్రం సందేహించకుండా అందుకు అంగీకరించారు.

ఆ తర్వాత కేక్ కోసిన ఆ వ్యక్తి, అందులోని ఒక భాగాన్ని బలాత్కారంగా హీరో నోట్లోకి నెట్టే ప్రయత్నం చేశాడు. చిరంజీవి సున్నితంగా వారిస్తున్నప్పటికీ, అతడు వినకుండా మరింత బలవంతం చేయడంతో ఆ కేక్ ముక్క కింద పడిపోయింది. నేలరాలిన ఆ కేక్ ముక్కల నుంచి గోధుమ వర్ణంలో ఉన్న ఒక అనుమానాస్పద ప్యాకెట్ బయటపడటంతో అక్కడున్న చిత్ర బృందం ఒక్కసారిగా ఉలిక్కిపడింది. ఆ కొద్దిపాటి కేక్ పెదాలకు అంటగానే చిరంజీవి పెదవుల రంగు వింతగా మారిపోవడం అందరినీ మరింత భయాందోళనలకు గురిచేసింది. ఇది కచ్చితంగా విషప్రయోగమే అని గ్రహించిన యూనిట్ సభ్యులు ఏమాత్రం ఆలస్యం చేయకుండా ఆయన్ను హుటాహుటిన సమీపంలోని ఆసుపత్రికి తరలించి అవసరమైన వైద్య పరీక్షలు చేయించారు. అదృష్టవశాత్తూ తృటిలో పెను ప్రమాదం తప్పిందని వైద్యులు నిర్ధారించారు.

మరుసటి రోజు ఉదయం ఈ ఉదంతం జాతీయ, రాష్ట్ర స్థాయి పత్రికలన్నింటిలోనూ పతాక శీర్షికల్లో ప్రచురితమై తీవ్ర కలకలం రేపింది. చిరంజీవి ఎదుగుదలను ఏమాత్రం జీర్ణించుకోలేని కొందరు గిట్టనివాళ్లే ఈ పన్నాగం పన్నారంటూ పెద్ద ఎత్తున వదంతులు వ్యాపించాయి. చివరకు సినీ పరిశ్రమకు చెందిన కొందరు పెద్దలు జోక్యం చేసుకోవడంతో ఈ వివాదం నెమ్మదిగా సద్దుమణిగింది. మెగాస్టార్ తన సినీ ప్రయాణంలో కేవలం తెరమీద విలన్లనే కాకుండా, నిజ జీవితంలోనూ ఎన్నెన్నో కుట్రలను ఎదిరించి నిలబడ్డారనడానికి ఈ సంఘటనే ఒక సజీవ సాక్ష్యం. అప్పట్నుంచి చిరంజీవి విషయంలో జాగ్రత్తలు మరింతగా పెరిగిపోయాయి. ఇంత జరిగినా కూడా మెగాస్టార్ మాత్రం ఫ్యాన్స్ విషయంలో ఎప్పుడూ అశ్రద్ధ చేయలేదు.