మెట్ గాలా 2026కి దూరంగా గ్లోబల్ బ్యూటీ.. ఫ్యాషన్ వేడుక గైర్హాజరుకు కారణమిదే

Priyanka Chopra At Metgala

న్యూయార్క్‌లోని మన్హట్టన్‌లో జరిగే ఈ వేడుకకు ప్రపంచవ్యాప్తంగా విపరీతమైన క్రేజ్ ఉంటుంది. ఈ ఏడాది ‘ఫ్యాషన్ ఈజ్ ఆర్ట్’ అనే సరికొత్త థీమ్‌తో ఈ ఫ్యాషన్ ప్రదర్శన ప్రారంభం కానుంది. ఈ క్రమంలో గ్లోబల్ బ్యూటీ ప్రియాంక మెట్ గాలాకు ఎందుకు రాలేకపోతోందో, అలాగే ఈ సారి మెట్ గాలా 2026 థీమ్ విశేషాలు ఏమిటో తెలుసుకుందాం.

ఎందుకు దూరమైంది?

సదరు భారతీయ గ్లోబల్ స్టార్ నటి ఈసారి మెట్ గాలా వేడుకను దాటవేయడానికి బలమైన కారణాలు ఉన్నాయి. ప్రస్తుతం ఆమె తన అత్యంత ప్రతిష్టాత్మకమైన అంతర్జాతీయ సిరీస్ ‘సిటాడెల్’ తదుపరి సీజన్ ప్రమోషన్లలో భాగంగా ప్రపంచవ్యాప్తంగా పర్యటిస్తోంది. ఈ సిరీస్ మే 6న విడుదల కానుంది. ఆ తర్వాత వెంటనే ఆమె లాస్ ఏంజిల్స్‌లో జరిగే ‘గోల్డ్ హౌస్ గాలా’ వేడుకకు ప్రయాణం కావాల్సి ఉంది. అక్కడ ఆమెకు వరుసగా రెండవ ఏడాది ‘గ్లోబల్ వాన్‌గార్డ్ అవార్డు’ దక్కనుంది. ఈ బిజీ షెడ్యూల్స్ కారణంగానే ఆమె ఈసారి మెట్ గాలా మెట్లపై కనిపించడం లేదని సన్నిహిత వర్గాలు తెలిపాయి.

గత మెట్ గాలా జ్ఞాపకాలు

మెట్ గాలా చరిత్రలోనే అత్యంత అద్భుతమైన ఫ్యాషన్ లుక్స్‌తో గతంలో ప్రియాంక ఎన్నోసార్లు ఇంటర్నెట్‌ను షేక్ చేసింది.

• ఆమె 2017లో మొదటిసారి రాల్ఫ్ లారెన్ ట్రెంచ్ కోట్‌తో మెట్ గాలా వేదికపై అడుగుపెట్టి అందరినీ ఆశ్చర్యపరిచింది.
• 2018లో బర్గండీ రంగు రాల్ఫ్ లారెన్ గౌనులో మెరిసింది.
• 2019లో డియోర్ హాట్ కోచర్ దుస్తులతో అందరి దృష్టిని ఆకర్షించింది.
• 2023లో బ్లాక్ అండ్ వైట్ వాలెంటినో దుస్తులతో, 2025లో బాల్మైన్ సూట్, బల్గారీ నగల కలయికతో ఫ్యాషన్ ప్రియులను ఫిదా చేసింది.

మెట్ గాలా 2026 విశేషాలు

అసోసియేటెడ్ ప్రెస్ నివేదిక ప్రకారం, ఈ ఏడాది మెట్ గాలా డ్రెస్ కోడ్ థీమ్ ‘ఫ్యాషన్ ఈజ్ ఆర్ట్’. ఈ ప్రదర్శనలో పాల్గొనే ప్రముఖులు ఫ్యాషన్‌ను ఒక కళారూపంగా ప్రతిబింబించేలా తమ దుస్తులను డిజైన్ చేయించుకోవాల్సి ఉంటుంది. ఈ ఏడాది ఇప్పటికే కిమ్ కర్దాషియాన్, బియాన్స్, నికోల్ కిడ్మన్, వీనస్ విలియమ్స్ వంటి దిగ్గజాలు అతిథుల జాబితాలో ఖరారయ్యారు. ఏదేమైనా ప్రతిసారి తన అద్భుతమైన ప్రదర్శనతో మెట్ గాలాను ఏలిన ప్రియాంకా చోప్రా ఈ ఏడాది లేకపోవడం ఆమె అభిమానులకు కొంత నిరాశ కలిగించే విషయమే.