‘జెర్సీ’ గాయాలు: అప్పుడు నానికి.. ఇప్పుడు షాహిద్‌కు

గతేడాది టాలీవుడ్‌లో వచ్చిన మంచి చిత్రాల్లో ‘జెర్సీ’ ఒకటి. క్రికెట్ నేపథ్యంలో వచ్చిన ఈ చిత్రం నాని కెరీర్‌లో గుర్తుండిపోయే సినిమా లిస్ట్‌లో ఒకటిగా నిలిచింది. ఈ సినిమాకు విమర్శకుల ప్రశంసలే కాదు.. బాక్సాఫీస్ వద్ద మంచి వసూళ్లు కూడా వచ్చాయి. ఇక ఇప్పుడు ఈ చిత్రాన్ని హిందీలో రీమేక్ చేస్తున్నారు. షాహిద్ కపూర్ హీరోగా నటిస్తోన్న ఈ రీమేక్‌కు గౌతమ్ తిన్ననూరి(తెలుగులోనూ ఆయనే దర్శకుడు) దర్శకత్వం వహిస్తున్నారు. దిల్ రాజు, గీతా ఆర్ట్స్, అమన్ గిల్ సంయుక్తంగా ఈ మూవీని నిర్మిస్తున్నారు.

ఇక గతేడాది డిసెంబర్‌లో ఈ మూవీ సెట్స్ మీదకు వెళ్లగా.. చండీగఢ్‌లో చిత్రీకరణను చేస్తున్నారు. అయితే ఈ మూవీ కోసం షాహిద్ క్రికెట్‌ సన్నివేశాన్ని సాధన చేస్తున్నప్పుడు అనుకోకుండా బంతి ఆయన మొహానికి తగిలింది. దీంతో కింద పెదవికి బలంగా దెబ్బ తగలడంతో.. 13 కుట్లు పడ్డాయి. ఇక ఈ విషయాన్ని సోషల్ మీడియాలో తెలిపిన షాహిద్.. ‘‘మీ సానుభూతికి ధన్యవాదాలు. నా పెదవికి కుట్లు పడ్డాయి. త్వరగా కోలుకుంటా. జెర్సీ నా రక్తంలో కొంత తీసుకుంది. ఇలాంటి స్క్రిప్ట్ కోసం అంత మాత్రమైనా చేయాలి’’ అని ట్వీట్ చేశారు. కాగా పెదవులకు కుట్లు పడటంతో సినిమా షూటింగ్‌కు గ్యాప్ ఇచ్చారు. దీంతో ముంబయికి తన భార్య మీరాతో కలిసి వెళ్లారు షాహిద్. ఈ సందర్భంగా ఎయిర్‌పోర్ట్‌లో తీసిన ఫొటోలో ముఖానికి మాస్క్ వేసుకొని కనిపించారు ఈ హీరో. అయితే జెర్సీని తెలుగులో తెరకెక్కించే సమయంలో నాని గాయపడ్డారు. బంతి నాని ముక్కుకు బలంగా తగలడంతో ఆయన ముక్కు విరిగి పక్కకు వెళ్లింది. ఈ విషయాన్ని నాని కూడా ఓ సందర్భంలో చెప్పిన విషయం తెలిసిందే.