‘జార్జి రెడ్డి’కి అరుదైన గౌరవం

ఉస్మానియా యూనివర్సిటీలో విద్యార్థి నాయకుడిగా ఎన్నో ఉద్యమాలకు ఊపిరి పోసిన జార్జ్‌ రెడ్డి జీవిత కథ ఆధారంగా ఇటీవల జార్జి రెడ్డి చిత్రాన్ని తెరకెక్కించిన విషయం తెలిసిందే. జీవన్ రెడ్డి దర్శకత్వం వహించిన ఈ చిత్రంలో సందీప్ మాధవ్ ప్రధాన పాత్రలో నటించాడు. గత నెల విడుదలైన ఈ చిత్రానికి విమర్శకుల నుంచి ప్రశంసలు లభించగా.. బాక్సాఫీస్ వద్ద కూడా ఫర్వాలేదనిపించాడు జార్జిరెడ్డి. కాగా తాజాగా ఈ మూవీకి అరుదైన గౌరవం లభించింది. నాల్గవ లేక్ వ్యూ ఇంటర్నేషనల్ ఫిలిం ఫెస్టివల్‌కు జార్జి రెడ్డి ఎంపికైంది. డిసెంబర్ 22, 23వ తేదీల్లో.. నోయిడా, ఢిల్లీలో ఈ మూవీని ప్రదర్శించబోతున్నారు. దీనిపై చిత్ర యూనిట్ సంతోషం వ్యక్తం చేసింది. ఇక ఈ వేడుకకు చిత్రబృందం హాజరుకానున్నట్లు తెలుస్తోంది.

అయితే కేరళలోని పాలక్కాడ్‌లోని జన్మించిన జార్జి రెడ్డి.. నిజాం కాలేజీలో బీఎస్సీ పూర్తి చేసి ఆపై ఉస్మానియా యూనివర్సిటీలో ఎమ్మెస్సీలో చేరాడు. చిన్నప్పటి నుంచి పుస్తకాల పురుగైన జార్జి రెడ్డి క్యాంపస్‌లోని సమస్యలపై పోరాడేవాడు. విద్యార్థి సంఘ నాయకుడిగా పలు ఉద్యమాలను తన ఆధ్వర్యంలో నడిపిన జార్జి రెడ్డి.. చిన్న వయస్సులో దారుణ హత్యకు గురయ్యాడు. 1972 ఫిబ్రవరిలో జార్జి రెడ్డిని ప్రత్యర్థులు చంపిన విషయం తెలిసిందే.