‘సరిలేరు నీకెవ్వరు’ మేకింగ్ వీడియో.. ‘డీఎస్పీ మీరు నిజంగా రాక్‌స్టార్’..!

సూపర్‌స్టార్ మహేష్ బాబు నటించిన చిత్రం ‘సరిలేరు నీకెవ్వరు’. అనిల్ రావిపూడి దర్శకత్వం వహించిన ఈ చిత్రంలో మహేష్ ఆర్మీ మేజర్ పాత్రలో కనిపించనున్నారు. అతడి సరసన రష్మిక నటించగా.. విజయశాంతి, రాజేంద్ర ప్రసాద్, ప్రకాష్ రాజ్, సంగీత తదితరులు కీలక పాత్రలలో కనిపించనున్నారు. ఇక క్రేజీ కాంబినేషన్‌లో తెరకెక్కిన ఈ మూవీపై మహేష్ అభిమానులతో పాటు టాలీవుడ్ ప్రేక్షకులు మంచి అంచనాలు పెట్టుకున్నారు. ఈ క్రమంలో మూవీపై మరింత అంచనాలను పెట్టేందుకు ప్రమోషన్లలో వేగాన్ని పెంచింది చిత్ర యూనిట్. తాజాగా ఈ మూవీ సంగీత దర్శకుడు దేవీ శ్రీ ప్రసాద్ ఓ వీడియోను విడుదల చేశాడు.

అందులో సరిలేరు నీకెవ్వరు టైటిల్‌ సాంగ్‌కు సంబంధించిన రికార్డింగ్ సెషన్‌ను విడుదల చేశాడు. యూరప్‌లోని మెకోడినియన్ సింపోనిక్ ఆర్కెస్ట్రాతో ఈ డీఎస్పీ ఈ రికార్డింగ్ చేయించగా.. మేకింగ్ వీడియో అదరగొట్టేసింది. అంతేకాదు యూట్యూబ్‌లో ఈ వీడియో టాప్ 5లో దూసుకుపోతుంది. ఇదివరకు ఈ మూవీ నుంచి వచ్చిన పాటలకు కాస్త నెగిటివిటీ వచ్చినప్పటికీ.. వాటన్నింటికి ఈ వీడియోతో చెక్ పెట్టేశాడు దేవీ. టైటిల్ సాంగ్‌ల విషయంలో ఇప్పటికే తనదైన ముద్రను వేసుకున్న దేవీ శ్రీ ప్రసాద్.. సరిలేరు నీకెవ్వరులోనూ అదే జోరు చూపించబోతున్నట్లు అర్థమవుతోంది. ఇక ఈ పాటను శంకర్ మహదేవన్ ఆలపించడం మరో విశేషం. కాగా ఈ పాటను ఆర్మీకి డెడికేట్ చేయబోతున్నట్లు ఇప్పటికే దేవీ ప్రకటించిన విషయం తెలిసిందే. ఇదిలా ఉంటే మరోవైపు ఈ వీడియోకు నెటిజన్లు వావ్ అంటూ స్పందిస్తున్నారు. దేవీ సర్ మీరు నిజంగా రాక్‌స్టార్.. వీడియో చూస్తుంటే రోమాలు నిక్కబొడుచుకుంటున్నాయి అని వారు కామెంట్లు పెడుతున్నారు. కాగా ఈ పాట డిసెంబర్ 23న సాయంత్రం గం.5.04ని.లకు విడుదల అవ్వబోతుంది.

ఇదిలా ఉంటే సరిలేరు నీకెవ్వరు ప్రీ రిలీజ్ ఈవెంట్ కోసం ఏర్పాట్లు ప్రారంభమైనట్లు తెలుస్తోంది. మెగాస్టార్ ముఖ్య అతిథిగా ఈ వేడుకకు రాబోతుండగా.. మెగాసూపర్ఈవెంట్‌గా దీన్ని చేయాలని నిర్మాతలు ప్లాన్ చేశారు. ఈ క్రమంలో వారు అన్ని జాగ్రత్తలు తీసుకుంటున్నట్లు తెలుస్తోంది.