పూణేలో కరోనా వైరస్ వ్యాక్సీన్ తయారీ.. అక్టోబర్ నాటికి మార్కెట్లో ఎంట్రీ ?

పూణేలోని సీరమ్ ఇన్స్ టిట్యూట్ కరోనా నివారణ  వ్యాక్సీన్ తయారీకి సిధ్ధమైంది. ఇందుకు ఈ సంస్థ ఆక్స్ ఫర్డ్ యూనివర్సిటీతో ఒప్పందం కుదుర్చుకుంది.  ఈ వ్యాక్సీన్ తయారీలో ఆ యూనివర్సిటీ ఇప్పటికే ముందడుగు వేసిన విషయం గమనార్హం. దీంతో ఆ సంస్థ  సహకారాన్ని తాము తీసుకోదలిచామని సీరమ్ ఇన్స్ టిట్యూట్ సీఈఓ ఆదార్ పూనావాలా తెలిపారు. వచ్ఛే రెండు, మూడు వారాల్లో దీని తయారీని ప్రారంభిస్తున్నామని ఆయన చెప్పారు. హ్యూమన్ క్లినికల్ ట్రయల్స్ విజయవంతమైతే అక్టోబరు కల్లా మార్కెట్లోకి ఈ వ్యాక్సీన్ అందుబాటులోకి రానుందని అయన వెల్లడించారు. ఆక్స్ ఫర్డ్ యూనివర్సిటీకి చెందిన డాక్టర్ హిల్ తో తాము కలిసి పని చేస్తున్నామని, రెండు, మూడు వారాల్లో ఉత్పత్తిని ప్రారంభిస్తామని ఆయన అన్నారు. ఆరు నెలల పాటు నెలకు 50 లక్షల డోసులు ఉత్పత్తి చేయాలన్నది లక్ష్యమని, ఆ తరువాత నెలకు దీన్ని కోటి డోసులకు పెంచుతామని ఆయన పేర్కొన్నారు. గతంలో మలేరియా వ్యాక్సీన్ తయారీ కోసం తమ సంస్థ ఆక్స్ ఫర్డ్ యినివర్సిటీతో కలిసి పని చేసిన విషయాన్ని ఆయన గుర్తు చేశారు.