షాకింగ్: కరోనా వ్యాక్సిన్ ప్రయోగం విఫలం.. ఇక కష్టమేనా!

కరోనా.. కరోనా.. కరోనా.. ప్రస్తుతం యావత్ ప్రపంచాన్ని ఈ మహమ్మారి అతలాకుతలం చేస్తోంది. ఎప్పుడు? ఎలా? ఈ వైరస్ వ్యాప్తి చెందుతుందోనని ప్రజలు తీవ్ర భయాందోళనకు గురవుతున్నారు. ఇదిలా ఉంటే ఈ వైరస్‌ను కట్టడి చేసేందుకు లండన్ ఆక్స్‌ఫర్డ్‌ యూనివర్సిటీ.. ఆస్ట్రాజెనక అనే ఫార్మా కంపెనీతో ఒప్పందం కుదుర్చుకుని వ్యాక్సిన్ కనిపెట్టే ప్రయత్నాలు కొనసాగిస్తున్న సంగతి తెలిసిందే. ChAdOx1 nCoV-19 అనే కరోనా వ్యాక్సిన్‌పై ప్రస్తుతం వర్సిటీ ప్రయోగాలు చేస్తోంది.

ఇటీవల ఈ మందును కోతులపై ప్రయోగించింది. అయితే కోతుల్లో ప్రయోగించిన ఈ మెడిసిన్ విఫలం అయ్యింది. కోతుల్లో కేవలం ఈ వ్యాక్సిన్ న్యుమోనియాను మాత్రమే అపగలిగింది గానీ.. కరోనా సంక్రమణ తీవ్రతను తగ్గించలేకపోయింది. దీనితో ఈ వ్యాక్సిన్‌పై మరింత లోతుగా అధ్యయనం చేయాల్సి ఉందని శాస్త్రవేత్తలు అంటున్నారు.

ఈ పరిశోధనలో భాగమైన వైరాలజీ ప్రొఫెసర్ జోనాథన్ బాల్ మాట్లాడుతూ… ఆక్స్‌ఫర్డ్‌ వ్యాక్సిన్ వాస్తవానికి వైరస్ వ్యాప్తిని నిరోధించలేదు. కరోనా వ్యాక్సిన్ ఇచ్చిన కోతుల్లోనూ, ఇవ్వని వాటిల్లోనూ వైరస్ లోడ్ ఒకేలా ఉందన్నారు. మానవులతో కూడా ఇదే జరిగితే ఈ వ్యాక్సిన్ కరోనా వైరస్ వ్యాప్తిని ఆపలేదని స్పష్టం చేశారు. మనుషులపై ట్రయిల్స్ మొదలుపెట్టిన తర్వాతే ఈ మెడిసిన్‌పై పూర్తిగా క్లారిటీ వస్తుందని బాల్ సూచించారు. కాగా, త్వరలోనే ఈ వ్యాక్సిన్‌ను మనుషులపై ప్రయోగించేందుకు ఆక్స్‌ఫర్డ్‌ వర్సిటీ ప్రయత్నాలు చేస్తోంది. మరి అప్పుడు ఫలితాలు ఎలా వస్తాయో వేచి చూడాలి. అటు పూర్తిస్థాయిలో కరోనాను నియంత్రించేందుకు వ్యాక్సిన్ వస్తుందా? రాదా? అని ఇప్పటికే కొందరిలో ప్రశ్నలు తలెత్తాయి.