TSPSC Group I Recruitment 2022: త్వరలో 503 పోస్టులకు టీఎస్‌పీఎస్సీ గ్రూప్‌-1 నోటిఫికేషన్‌ జారీ! ఐతే అంతకంటేముందే..

TSPSC Group 1 Recruitment 2022 Notification: తెలంగాణ రాష్ట్రంలో గ్రూప్‌-1 నోటిఫికేషన్‌ జారీకి టీఎస్‌పీఎస్సీ కసరత్తు ముమ్మరం చేస్తోంది. గ్రూప్‌-1లో 503 పోస్టుల భర్తీకి వివిధ ప్రభుత్వ శాఖల నుంచి ప్రతిపాదనలు స్వీకరించిన కమిషన్‌ వాటిని క్రోడీకరిస్తోంది. మొత్తం 12 శాఖల నుంచి 19 రకాల పోస్టులకు ప్రతిపాదనలు అందగా.. వాటిలో నాలుగైదు రకాల పోస్టులకు ఆయా విభాగాల నుంచి సవరణ ప్రతిపాదనలు అందాల్సి ఉంది. అవి రాగానే ప్రకటన జారీ చేయాలని కమిషన్‌ భావిస్తోంది. గ్రూప్‌-1లో 503 పోస్టులకు ఆర్థికశాఖ అనుమతిచ్చిన మరుసటి రోజు నుంచి కమిషన్‌ ఆయా విభాగాధిపతులతో ప్రత్యేక సమావేశాలు నిర్వహించింది. పొరపాట్లకు తావులేకుండా ప్రతిపాదనలను సకాలంలో అందించేందుకు ప్రొఫార్మా సైతం అందించింది. అయినా నాలుగైదు విభాగాల ప్రతిపాదనల తయారీలో సాంకేతిక పొరపాట్లు తలెత్తాయి. వాటిని సవరించాలని కమిషన్‌ సూచించింది. ఆ సమాచారం అందితే త్వరలోనే గ్రూప్‌-1 ప్రకటన జారీ అయ్యే అవకాశాలున్నాయి.

ఓటీఆర్‌ నమోదు చేసుకున్న అభ్యర్థులు మాత్రమే అర్హులు! రాష్ట్రపతి నూతన ఉత్తర్వుల ప్రకారం వన్‌టైం రిజిస్ట్రేషన్‌ (OTR)లో సవరణలకు 15 రోజుల క్రితం కమిషన్‌ అవకాశం ఇచ్చిన విషయం తెలిసిందే. కమిషన్‌ వద్ద 25 లక్షల మంది ఓటీఆర్‌ అందుబాటులో ఉండగా.. ఇప్పటివరకు 1.2 లక్షల మంది మాత్రమే సవరించుకున్నారు. రాష్ట్రపతి నూతన ఉత్తర్వుల ప్రకారం ఓటీఆర్‌ సవరించుకున్న, నమోదు చేసుకున్న అభ్యర్థులు మాత్రమే టీఎస్‌పీఎస్సీ జారీ చేసే ప్రకటనలకు దరఖాస్తు చేసుకునేందుకు వీలుంటుంది. ఈ మేరకు ఓటీఆర్‌ సవరించాలని రోజుకు లక్ష మందికి కమిషన్‌ ఈ-మెయిళ్లు పంపిస్తోంది. చివరి నిమిషం వరకు వేచి ఉండటం కన్నా, ముందే సిద్ధం చేసుకోవాలని సూచిస్తోంది. వేసవి సెలవుల్లో పాఠశాలలు మూసివేస్తారని, ఉద్యోగార్థులు బోనఫైడ్‌ సర్టిఫికెట్లు పొందేందుకు ఇబ్బందులు ఉంటాయని.. ఇప్పుడే అవసరమైన సర్టిఫికెట్లు సమకూర్చుకుని, ఓటీఆర్‌లో అప్‌లోడ్‌ చేసుకుంటే భవిష్యత్తు అవసరాలకు ఉపయోగపడతాయని అధికారులు సూచించారు.

Also Read:

విద్యార్ధులకు అలర్ట్! TSRJC CET 2022 దరఖాస్తు గడువు పెంపు! ఎప్పటివరకంటే..