ఇంటర్‌ పాసైన అమ్మాయిలకు రూ.30 వేలు పొందే ఛాన్స్.. సంతూర్‌ స్కాలర్‌షిప్‌ 2026-27కు ఇలా దరఖాస్తు చేయండి

సంతూర్‌ స్కాలర్‌షిప్‌ 2026-27 ప్రకటన విడుదలైంది. ఇంటర్‌ పూర్తి చేసి డిగ్రీ మొదటి సంవత్సరంలో చేరిన అర్హులైన బాలికలకు విప్రో సంస్థ రూ.30,000 ఆర్థిక సాయం అందిస్తోంది. ఆంధ్రప్రదేశ్‌, మహారాష్ట్రకు చెందిన ఆర్థికంగా వెనుకబడిన విద్యార్థినులు అక్టోబర్‌ 15, 2026లోగా ఆన్‌లైన్‌లో దరఖాస్తు చేసుకోవాలి..

Santoor Scholarship For Intermediate Pass Girls

Srilakshmi C |
Updated on: Oct 09, 2026 | 6:16 AM

గ్రామీణ ప్రాంతాల్లోని ఆర్థికంగా వెనుకబడిన బాలికలు ఉన్నత విద్యను అభ్యసించేందుకు విప్రో సంస్థకు చెందిన విప్రో కన్స్యూమర్ కేర్ అండ్ లైటింగ్ గ్రూప్‌ (WCCLG), విప్రో కేర్స్‌ సంయుక్తంగా సంతూర్‌ స్కాలర్‌షిప్‌ కార్యక్రమాన్ని నిర్వహిస్తున్నాయి. తాజాగా 2026-27 విద్యా సంవత్సరానికి సంబంధించి స్కాలర్‌షిప్‌ ప్రకటన వెలువడింది. ఇంటర్మీడియట్‌ పూర్తి చేసి, డిగ్రీ మొదటి సంవత్సరంలో చేరిన అర్హులైన విద్యార్థినులు ఈ స్కాలర్‌షిప్‌ కోసం దరఖాస్తు చేసుకోవచ్చు. ఎంపికైన వారికి ఒకేసారి రూ.30,000 ఆర్థిక సాయం అందుతుంది.

అర్హతలు ఇవే..

ఆంధ్రప్రదేశ్‌, మహారాష్ట్ర రాష్ట్రాలకు చెందిన ఆర్థికంగా వెనుకబడిన బాలికలు దరఖాస్తు చేసుకోవచ్చు.
పదో తరగతి, ఇంటర్మీడియట్‌ విద్యను ప్రభుత్వ పాఠశాలలు, కళాశాలల్లోనే పూర్తిచేసి ఉండాలి.
2025-26 విద్యా సంవత్సరంలో ఇంటర్మీడియట్‌ లేదా తత్సమాన కోర్సు పూర్తిచేసి ఉండాలి.
2025-26 విద్యా సంవత్సరంలోనే ఏదైనా బ్యాచిలర్‌ డిగ్రీ మొదటి సంవత్సరంలో చేరి ఉండాలి.
కనీసం మూడేళ్లు లేదా అంతకంటే ఎక్కువ వ్యవధి ఉన్న డిగ్రీ కోర్సుల్లో ప్రవేశం పొంది ఉండాలి.

స్కాలర్‌షిప్‌ ఎంతంటే?

ఈ కార్యక్రమం కింద ఎంపికైన విద్యార్థినులకు రూ.30,000 మొత్తాన్ని ఒకేసారి స్కాలర్‌షిప్‌గా అందిస్తారు. ఈ నగదును ట్యూషన్‌ ఫీజు, హాస్టల్‌ ఖర్చులు, మెస్‌ ఫీజు, ప్రయాణ ఖర్చులు, పుస్తకాలు, స్టేషనరీ, డిజిటల్‌ పరికరాలు తదితర విద్యా సంబంధిత అవసరాల కోసం వినియోగించుకోవచ్చు.

గత ఏడాది ఆంధ్రప్రదేశ్‌, తెలంగాణ, కర్ణాటక, ఛత్తీస్‌గఢ్‌ రాష్ట్రాల నుంచి ఈ స్కాలర్‌షిప్‌ పొందిన విద్యార్థినులు అర్హత ప్రమాణాలకు అనుగుణంగా తమ అండర్‌గ్రాడ్యుయేట్‌ చదువులు పూర్తయ్యే వరకు స్కాలర్‌షిప్‌ ప్రయోజనాన్ని కొనసాగించవచ్చు. అర్హులైన విద్యార్థినులు ఆన్‌లైన్‌ ద్వారా దరఖాస్తు చేసుకోవాలి. దరఖాస్తు చేసుకునే ముందు అర్హతలు, అవసరమైన పత్రాలు, ఇతర నిబంధనలను అధికారిక ప్రకటనలో పరిశీలించాలి. గ్రామీణ ప్రాంతాల్లోని పేద విద్యార్థినులకు ఉన్నత విద్యను కొనసాగించేందుకు ఈ స్కాలర్‌షిప్‌ ఆర్థికంగా తోడ్పడుతుంది. అర్హత ఉన్న విద్యార్థినులు చివరి తేదీలోగా దరఖాస్తు చేసుకోవాలి.