AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

MS Dhoni: “ఎప్పటికీ మా తలా నువ్వే”.. ధోనీకి సహచరుల భావోద్వేగ వీడ్కోలు..!

MS Dhoni Retirement: చెన్నై సూపర్ కింగ్స్‌తో మహేంద్ర సింగ్ ధోనీ అనుబంధం మరో రూపంలో కొనసాగనుంది. ఐపీఎల్ 2027 సీజన్‌కు ముందు జట్టు మెంటార్‌గా బాధ్యతలు చేపట్టనున్నట్లు సీఎస్‌కే ప్రకటించింది. ఈ వార్తతో మాజీ సహచరులు, ప్రస్తుత క్రికెటర్లు సోషల్ మీడియాలో భావోద్వేగ సందేశాలు పంచుకున్నారు. “ఎప్పటికీ మా కెప్టెన్.. ఎప్పటికీ మా తలా” అంటూ తమ అభిమానాన్ని చాటుకున్నారు.

MS Dhoni: “ఎప్పటికీ మా తలా నువ్వే”.. ధోనీకి సహచరుల భావోద్వేగ వీడ్కోలు..!
Ms Dhoni
Venkata Chari
|

Updated on: Nov 17, 2026 | 10:25 PM

Share

MS Dhoni Retirement: భారత క్రికెట్‌లో తనకంటూ ప్రత్యేక గుర్తింపు సంపాదించుకున్న మహేంద్ర సింగ్ ధోనీ (MS Dhoni) ఐపీఎల్‌లో ఆటగాడిగా తన ప్రయాణానికి ముగింపు పలికాడు. చెన్నై సూపర్ కింగ్స్ (Chennai Super Kings) మంగళవారం ధోనీని ఐపీఎల్ 2027 నుంచి టీమ్ మెంటార్‌గా నియమిస్తున్నట్లు ప్రకటించింది. దీంతో 2008లో ప్రారంభమైన అతడి ఐపీఎల్ ఆటగాడి ప్రయాణం ముగిసినట్లయింది.

ఈ ప్రకటన వెలువడిన వెంటనే పలువురు క్రికెటర్లు, మాజీ సహచరులు ధోనీతో తమ అనుబంధాన్ని గుర్తుచేసుకుంటూ సోషల్ మీడియాలో పోస్టులు పెట్టారు. సీఎస్‌కే తరఫున ధోనీతో 12 సీజన్లు ఆడిన రవీంద్ర జడేజా “8 ka 7 ke liye respect forever” అంటూ తన అభిమానాన్ని వ్యక్తం చేశాడు.

బ్రావో, దూబే భావోద్వేగ సందేశాలు..

మాజీ వెస్టిండీస్ ఆల్‌రౌండర్ డ్వేన్ బ్రావో తన మాజీ కెప్టెన్‌కు కృతజ్ఞతలు తెలిపాడు. “థ్యాంక్యూ స్కిప్పర్.. నీ వారసత్వం ఎప్పటికీ నిలిచిపోతుంది” అంటూ ధోనీని ఉద్దేశించి సందేశం ఇచ్చాడు.

సీఎస్‌కే ఆల్‌రౌండర్ శివమ్ దూబే కూడా తన కెరీర్‌లో ధోనీ పాత్రను గుర్తుచేసుకున్నాడు. ధోనీ కెప్టెన్సీలో ఆడటం తన కల అని, సీఎస్‌కేలో ఎంపికైన తర్వాత డ్రెస్సింగ్ రూమ్‌లో తొలిసారి ధోనీని కలిసిన సందర్భం ఇప్పటికీ గుర్తుందని తెలిపాడు. మ్యాచ్‌ల సమయంలో ధోనీ ఇచ్చిన సూచనలు తన కెరీర్‌ను మార్చాయని పేర్కొన్నాడు. ఇక మైదానంలో ధోనీతో కలిసి ఆడే అవకాశం లేకపోవడం బాధగా ఉందని చెప్పాడు.

చిన్ననాటి అభిమానుల నుంచి సహచరులుగా..

సాయి సుదర్శన్ తన చిన్ననాటి జ్ఞాపకాలను పంచుకున్నాడు. చెన్నైలో చిన్న పిల్లాడిగా స్టాండ్స్‌లో కూర్చొని ధోనీని చూసిన తాను, ఆ తర్వాత అతడితో కలిసి మైదానంలో ఆడే అవకాశం పొందడం ఎంతో ప్రత్యేకమని చెప్పాడు. ఒక తరం క్రికెటర్లకు ధోనీ స్ఫూర్తిగా నిలిచాడని, ఇకపై యువ ఆటగాళ్లకు అతడి మార్గదర్శకత్వం ఉపయోగపడుతుందని అభిప్రాయపడ్డాడు.

దీపక్ చాహర్ కూడా తన కెరీర్‌లో ధోనీ అందించిన ప్రోత్సాహం, మద్దతును గుర్తుచేసుకున్నాడు. తనపై నమ్మకం ఉంచి అవకాశాలు ఇచ్చినందుకు కృతజ్ఞతలు తెలిపాడు. ధోనీ ఆటను ప్రత్యక్షంగా చూసే అవకాశం దక్కడం అదృష్టంగా భావిస్తున్నట్లు పేర్కొన్నాడు.

తుషార్ దేశ్‌పాండే తన అనుభవాన్ని ప్రత్యేకంగా పంచుకున్నాడు. ఒకప్పుడు బాల్ బాయ్‌గా ధోనీని చూసిన తాను, ఆ తర్వాత అతడితో కలిసి డ్రెస్సింగ్ రూమ్ పంచుకోవడం, ఐపీఎల్ టైటిల్ వేడుకల్లో భాగం కావడం జీవితాంతం గుర్తుండిపోయే అనుభవమని చెప్పాడు.

“చెన్నై గుండె చప్పుడు ధోనీనే”..

మాజీ భారత క్రికెటర్ ఎస్. బద్రీనాథ్ ధోనీని చెన్నై సూపర్ కింగ్స్‌కు గుండె చప్పుడుగా అభివర్ణించాడు. అతడి నాయకత్వం, వికెట్ కీపింగ్, కీలక సమయాల్లో ఫినిషింగ్‌లు, జట్టుకు అందించిన విజయాలను గుర్తుచేసుకున్నాడు. “మహేంద్ర సింగ్ ధోనీ ఎప్పటికీ సీఎస్‌కే హృదయ స్పందన. ఎప్పటికీ మా కెప్టెన్.. ఎప్పటికీ మా తలా” అంటూ భావోద్వేగంగా స్పందించాడు.

ఇర్ఫాన్ పఠాన్ ధోనీ నాయకత్వం, ఒత్తిడిలో ప్రశాంతంగా ఉండే తత్వాన్ని ప్రశంసించాడు. అతడు సృష్టించిన వారసత్వాన్ని అందుకోవడం అంత సులభం కాదని పేర్కొన్నాడు. దినేశ్ కార్తీక్, శిఖర్ ధావన్ కూడా ధోనీకి శుభాకాంక్షలు తెలిపారు. ఆటగాడిగా అతడి ప్రభావం ముగిసినా, యువ క్రికెటర్లకు మార్గదర్శిగా కొనసాగుతాడని అభిప్రాయపడ్డారు.

17 సీజన్లు.. సీఎస్‌కేతో చిరస్మరణీయ ప్రయాణం..

ధోనీ సీఎస్‌కే తరఫున 17 సీజన్లు ఆడాడు. అతడి నాయకత్వంలో చెన్నై ఐదు ఐపీఎల్ టైటిళ్లు సాధించింది. 2010, 2014లో ఛాంపియన్స్ లీగ్ టీ20 ట్రోఫీలను కూడా గెలుచుకుంది. 2016, 2017లో సీఎస్‌కేపై నిషేధం ఉండటంతో రైజింగ్ పుణె సూపర్‌జెయింట్ తరఫున ఆడిన ధోనీ, 2018లో తిరిగి చెన్నై జట్టులోకి వచ్చాడు. అదే ఏడాది జట్టును టైటిల్ విజేతగా నిలిపాడు.

2024 సీజన్‌కు ముందు కెప్టెన్సీ బాధ్యతలను రుతురాజ్ గైక్వాడ్‌కు అప్పగించినా, ఆటగాడిగా జట్టులో కొనసాగాడు. 2025లో గుజరాత్ టైటాన్స్‌తో జరిగిన మ్యాచ్ అతడి చివరి ఐపీఎల్ మ్యాచ్‌గా నిలిచింది. 2026 సీజన్‌లో కాలి కండరాల గాయం కారణంగా ఆడలేదు.

ధోనీ ఐపీఎల్ గణాంకాలు ఇవే..!

వివరాలు గణాంకాలు
మ్యాచ్‌లు 278
పరుగులు 5,439
బ్యాటింగ్ సగటు 38.30
స్ట్రైక్‌రేట్ 137.45
అర్ధ సెంచరీలు 24
సిక్సర్లు 264
సీఎస్‌కే ఐపీఎల్ టైటిళ్లు 5

ఆటగాడిగా మైదానంలో కనిపించకపోయినా, ధోనీ అనుభవం ఇకపై సీఎస్‌కే యువ ఆటగాళ్లకు మార్గదర్శకంగా మారనుంది. కెప్టెన్‌గా జట్టుకు ఎన్నో విజయాలు అందించిన తలా.. ఇప్పుడు మెంటార్‌గా మరో తరం క్రికెటర్లను తీర్చిదిద్దేందుకు సిద్ధమయ్యాడు.

మరిన్ని క్రీడా వార్తల కోసం ఇక్కడ క్లిక్ చేయండి..

Follow Us