‘ప్రతి విద్యార్థి రెండు భాషలు నేర్చుకోవాలి.. ఒకటి మాట్లాడటానికి, మరొకటి ఆలోచించడానికి!’
ఐఐఎస్‌సీ బెంగళూరుకు చెందిన ప్రొఫెసర్‌ ప్రతోష్‌ ఏపీ అభిప్రాయం ప్రకారం, ప్రతి విద్యార్థి రెండు భాషలు నేర్చుకోవాలి. ఒకటి ఇతరులతో సమర్థంగా మాట్లాడి భావాలను వ్యక్తీకరించడానికి ఉపయోగపడితే, మరొకటి గణితం ద్వారా కచ్చితంగా ఆలోచించడం, తార్కికంగా సమస్యలను విశ్లేషించడం నేర్పుతుంది. ముఖ్యంగా కృత్రిమ మేధ (AI) ప్రాధాన్యం పెరుగుతున్న ప్రస్తుత కాలంలో విద్యార్థులకు గణిత ఆలోచనా నైపుణ్యాలు, కమ్యూనికేషన్‌ సామర్థ్యాలు రెండూ ఎంతో అవసరమని ఆయన సూచించారు..
Updated on: Oct 30, 2026 | 4:14 PM
దేశంలోని పాఠశాలల్లో భాషా విద్యపై మరోసారి చర్చ మొదలైంది. జాతీయ విద్యా విధానం (NEP 2020) నేపథ్యంలో విద్యార్థులు ఎన్ని భాషలు నేర్చుకోవాలి? ఏ భాషలకు ప్రాధాన్యం ఇవ్వాలి? అనే అంశాలపై భిన్నాభిప్రాయాలు వ్యక్తమవుతున్నాయి. ఈ క్రమంలో బెంగళూరులోని ఇండియన్‌ ఇన్‌స్టిట్యూట్‌ ఆఫ్‌ సైన్స్‌ (ఐఐఎస్‌సీ) ప్రొఫెసర్‌ ప్రథోష్‌ ఏపీ చేసిన వ్యాఖ్యలు ఆసక్తికరంగా మారాయి. ప్రతి విద్యార్థి తప్పనిసరిగా రెండు భాషలు నేర్చుకోవాలని ఆయన అభిప్రాయపడ్డారు. అందులో ఒకటి ఇతరులతో మాట్లాడటానికి, భావాలను వ్యక్తపరచడానికి ఉపయోగపడితే.. మరొకటి కచ్చితంగా ఆలోచించడానికి, తార్కికంగా విశ్లేషించడానికి తోడ్పడాలని వివరించారు. ప్రొఫెసర్‌ ప్రథోష్‌ ఏపీ అభిప్రాయం ప్రకారం.. గణితం కేవలం పరీక్షల్లో మార్కులు సాధించడానికి ఉపయోగపడే సబ్జెక్టు మాత్రమే కాదు. కచ్చితంగా ఆలోచించడం, తార్కికంగా విశ్లేషించడం, ప్రపంచాన్ని లోతుగా అర్థం చేసుకోవడానికి ఉపయోగపడే భాష. విద్యార్థులకు స్పష్టంగా ఆలోచించే సామర్థ్యంతోపాటు తమ ఆలోచనలను ఇతరులకు అర్థమయ్యేలా వివరించే నైపుణ్యం కూడా అవసరమని ఆయన పేర్కొన్నారు.
ప్రొఫెసర్‌ రెండు రకాల భాషల మధ్య తేడాను వివరించారు. మొదటిది ప్రపంచంతో సంభాషించడానికి ఉపయోగపడే భాష. అది ఇంగ్లిష్‌, హిందీ లేదా మరేదైనా భాష కావచ్చు. మన భావాలను వ్యక్తపరచడానికి, ఆలోచనలను వివరించడానికి, కథలు చెప్పడానికి, మన పనిలోని విలువను ఇతరులకు తెలియజేయడానికి ఈ భాష ఉపయోగపడుతుంది. రెండోది కచ్చితంగా ఆలోచించడానికి ఉపయోగపడే భాష. తన దృష్టిలో ఆ భాష గణితమని ప్రొఫెసర్‌ స్పష్టం చేశారు. అంటే ఒక భాష ద్వారా మన ఆలోచనలను ఇతరులకు తెలియజేయగలిగితే.. గణితం ద్వారా వాటిని స్పష్టంగా, తార్కికంగా విశ్లేషించగలమన్నది ఆయన అభిప్రాయం.
సాధారణ భాషల్లో మాట్లాడేటప్పుడు కొన్నిసార్లు మనం ఉపయోగించే పదాలకు సరైన అర్థాన్ని నిర్వచించకుండా మాట్లాడుతుంటామని ప్రొఫెసర్‌ వివరించారు. ఒక సమస్యను అర్థం చేసుకున్నామని భావించినప్పటికీ.. దానిని లోతుగా విశ్లేషించినప్పుడు మన ఆలోచనల్లో లోపాలు, వైరుధ్యాలు బయటపడవచ్చని చెప్పారు. గణితం విద్యార్థులకు కచ్చితత్వంతో ఆలోచించడం నేర్పుతుందని పేర్కొన్నారు. ఒక అంశాన్ని స్పష్టంగా నిర్వచించడం, కొన్ని ప్రాథమిక అంచనాలను ఏర్పరచుకోవడం, తార్కిక దశలను అనుసరించడం, చివరకు సరైన నిర్ణయానికి రావడం వంటి నైపుణ్యాలను గణితం అభివృద్ధి చేస్తుంది. అంతేకాకుండా మనం తీసుకున్న నిర్ణయాలను ఇతరులు పరిశీలించి, ధ్రువీకరించే అవకాశం కూడా ఉంటుంది.
తన అభిప్రాయాన్ని వివరించడానికి ప్రొఫెసర్‌ ఒక ఉదాహరణ ఇచ్చారు. ఒక ఇంజినీర్‌తో ‘ఈ ప్రక్రియను మరింత సమర్థవంతంగా మార్చాలి’ అని చెబితే.. సమర్థత అంటే ఏమిటనే ప్రశ్న ఎదురవుతుంది. పని వేగంగా పూర్తి చేయడమా? ఖర్చు తగ్గించడమా? తక్కువ వనరులను ఉపయోగించడమా? లేక కచ్చితత్వాన్ని పెంచడమా? అనే విషయాలను ముందుగా స్పష్టంగా నిర్వచించాలి. అప్పుడే ఆ సమస్యను విశ్లేషించి పరిష్కారాన్ని కనుగొనడం సాధ్యమవుతుంది. గణితం నేర్పించే కచ్చితత్వం ఇలాంటి సందర్భాల్లో ఎంతో ఉపయోగపడుతుందని ఆయన వివరించారు. ఈ తరహా ఆలోచనా విధానం గణితానికే పరిమితం కాకుండా సైన్స్‌, పరిశోధన, వ్యాపారం, రోజువారీ జీవితంలో తీసుకునే నిర్ణయాలకు కూడా ఉపయోగపడుతుంది.
కచ్చితంగా ఆలోచించడం ఎంత ముఖ్యమో.. ఆ ఆలోచనలను ఇతరులకు అర్థమయ్యేలా వివరించడం కూడా అంతే ముఖ్యమని ప్రొఫెసర్‌ ప్రథోష్‌ పేర్కొన్నారు. ఎంత గొప్ప ఆలోచనలు ఉన్నప్పటికీ వాటి విలువను ఇతరులకు వివరించలేకపోతే ప్రయోజనం ఉండదని చెప్పారు. అందువల్ల విద్యార్థులు తమ పనిని వివరించడం, వాదనలను సమర్థంగా వినిపించడం, ఆలోచనలను ఇతరులకు సులభంగా అర్థమయ్యేలా చెప్పడం నేర్చుకోవాలని సూచించారు. ప్రస్తుతం ఆర్టిఫిషియల్‌ ఇంటెలిజెన్స్‌ (ఏఐ) ద్వారా రైటింగ్‌, కోడింగ్‌, సమాచార విశ్లేషణ వంటి పనులు సులభమవుతున్నాయి. ఇలాంటి పరిస్థితుల్లో విద్యార్థులు సరైన సమస్యలను గుర్తించడం, వాటికి సాధ్యమైన పరిష్కారాలను తార్కికంగా విశ్లేషించడం, తమ ఆలోచనలను స్పష్టంగా ఇతరులకు వివరించడం నేర్చుకోవాలి. భవిష్యత్తులో ఈ నైపుణ్యాలే ఎంతో కీలకంగా మారనున్నాయని ఆయన అభిప్రాయం.
భారతదేశంలో పాఠశాలల్లో భాషల బోధనపై చర్చ జరుగుతున్న తరుణంలో ప్రొఫెసర్‌ ప్రథోష్‌ ఏపీ సూచనలు ప్రాధాన్యం సంతరించుకున్నాయి. విద్యార్థులు ఎన్ని భాషలు నేర్చుకుంటున్నారనే దానితోపాటు.. వాటి ద్వారా ఏం నేర్చుకుంటున్నారు? వారి ఆలోచనా శక్తి, కమ్యూనికేషన్‌ నైపుణ్యాలు ఎంతగా అభివృద్ధి చెందుతున్నాయి? అనే అంశాలపై కూడా దృష్టి పెట్టాల్సిన అవసరం ఉందని ఆయన అభిప్రాయం సూచిస్తోంది. ‘స్పష్టంగా మాట్లాడటం నేర్చుకోండి.. కచ్చితంగా ఆలోచించడం అలవాటు చేసుకోండి’ అనే ఆయన సందేశం విద్యార్థులకే కాకుండా విద్యా విధాన రూపకర్తలకు కూడా ఆలోచించాల్సిన అంశంగా నిలుస్తోంది.
