Jobs in Tourism: టూరిజంలో కోట్లాది ఉద్యోగాలు.. నిరుద్యోగులూ బీ రెడీ..
ఐటీ ఉద్యోగాల్లో కోతలు.. ఆర్ధిక మాంద్యం.. కొత్త ఉద్యోగాలకు అవాకాశం లేని పరిస్థితులు.. ఇలాంటి వార్తలు కుప్పలు తెప్పలుగా వస్తున్న వేళ నిరుద్యోగులకు ఆశాకిరణం లాంటి వార్త ఒకటి ఉంది. ఈ ఏడాది దేశ పర్యాటక పరిశ్రమలో 8.8 కోట్ల కొత్త ఉద్యోగాలు వస్తాయని అంచనా వేస్తున్నారు..
Updated on: May 13, 2023 | 6:40 PM
ఐటీ ఉద్యోగాల్లో కోతలు.. ఆర్ధిక మాంద్యం.. కొత్త ఉద్యోగాలకు అవాకాశం లేని పరిస్థితులు.. ఇలాంటి వార్తలు కుప్పలు తెప్పలుగా వస్తున్న వేళ నిరుద్యోగులకు ఆశాకిరణం లాంటి వార్త ఒకటి ఉంది. ఈ ఏడాది దేశ పర్యాటక పరిశ్రమలో 8.8 కోట్ల కొత్త ఉద్యోగాలు వస్తాయని అంచనా వేస్తున్నారు. ఈ పరిశ్రమ స్థూల దేశీయోత్పత్తి (GDP)కి రూ. 11.48 లక్షల కోట్లు (5%) అందించనుంది. మొత్తం ఉద్యోగాల్లో ఈ రంగం వాటా 13%. అడ్వెంచర్ టూరిజం సెగ్మెంట్ వచ్చే దశాబ్దంలో మెడికల్, వెల్నెస్, ఆధ్యాత్మికం, బిజినెస్ ట్రావెల్తో భారతదేశంలో అభివృద్ధి చెందుతుంది. డిజిటల్ చెల్లింపు సంస్థ వీసా , ప్రొఫెషనల్ ఎంప్లాయిమెంట్ సంస్థ EY నివేదికలో ఈ విషయం తెలిపింది.
26 రెట్లు అధికంగా ఖర్చు చేస్తున్న ఫారిన్ టూరిస్టులు..
‘చార్టింగ్ ది కోర్స్ ఫర్ ఇండియా: టూరిజం మెగాట్రెండ్స్ అన్ప్యాక్డ్’ పేరుతో విడుదల చేసిన రిపోర్ట్ లో దేశీయ పర్యాటకుల కంటే భారత్లో విదేశీ పర్యాటకులు 26 రెట్లు ఎక్కువ ఖర్చు చేస్తున్నారని పేర్కొంది ఆ సంస్థ.. ప్రపంచవ్యాప్తంగా ట్రావెల్ పరిశ్రమ 2023లో కోవిడ్ ప్రభావం నుంచి పూర్తిగా కోలుకుంటుందని కూడా రిపోర్ట్ లో చెప్పారు. ఈ సంవత్సరం ఇది కోవిడ్కు ముందు ఉన్న స్థాయిలో 85-95%కి చేరుకుంటుంది. దీని వల్ల భారత్కు కూడా పెద్ద ప్రయోజనం ఉంటుంది.
అయితే విదేశీ పర్యాటకులను ఆకర్షించేందుకు ప్రభుత్వం చేస్తున్న వ్యయం వేగంగా తగ్గుతోంది. 2021-22 ఆర్ధికసంవత్సరంలో 524 కోట్ల రూపాయలు ఇందుకోసం ఖర్చు చేశారు. అది 2022-23లో 341 కోట్ల రూపాయాలుగా ఉంది. ఇక ఈ ఆర్థిక సంవత్సరం అంటే 2023-24 కోసం 167 కోట్ల రూపాయలు మాత్రమే కేటాయించారు. అయితే, ఇదే సమయంలో పుణ్యక్షేత్రాల అభివృద్ధిపై వ్యయం 67% పెరిగింది. ఇదిలా ఉంటే, 2023-24 సంవత్సరానికి సాధారణ బడ్జెట్ లో పర్యాటక రంగానికి 2,400 కోట్ల రూపాయలను కేటాయించారు.
2023 బడ్జెట్లో, కేంద్రం విదేశాల్లో ప్రచార కార్యక్రమాలపై 50% వ్యయాన్ని తగ్గించింది. స్వదేశ్ దర్శన్ పథకానికి ఈ ఏడాది టూరిజం బడ్జెట్ కంటే 50% ఎక్కువ కేటాయించారు. 2023 బడ్జెట్లో ఎలాంటి మార్పు లేకుండా టూరిజం కోసం రూ.2,400 కోట్లు ఉంచారు. పర్యాటక మంత్రిత్వ శాఖ లండన్, టోక్యో, బీజింగ్, దుబాయ్, సింగపూర్, న్యూయార్క్ వంటి 7 పెద్ద నగరాల్లోని పర్యాటక కార్యాలయాలను మూసివేసింది. ఈ ప్రదేశాల్లోని రాయబార కార్యాలయాల్లోని హోం వ్యవహారాల మంత్రిత్వ శాఖలోని ఉద్యోగుల ద్వారా మంత్రిత్వ శాఖ ఈ పనిని పూర్తి చేస్తుంది. అయినప్పటికీ, 2030 నాటికి 25 మిలియన్ల మంది పర్యాటకులను దేశానికి తీసుకురావాలని లక్ష్యంగా పెట్టుకున్నారు. ఈ నేపధ్యంలో రాబోయే రోజుల్లో పర్యాటక రంగంలో ప్రత్యక్షంగానూ.. పరోక్షంగానూ ఉపాధి అవకాశాలు మరింత పెరిగే ఛాన్స్ ఉందని నిపుణులు చెబుతున్నారు.
మరిన్నికెరీర్ & ఉద్యోగాలు వార్తల కోసం ఇక్కడ క్లిక్ చేయండి
