Mobile Apps: మొబైల్‌లో ఈ యాప్స్‌ ఉంటే వెంటనే తీసేయండి.. లేదంటే మీ డబ్బు గోవిందా..!

Android App Security: ఆధునిక డిజిటల్ యుగంలో స్మార్ట్‌ఫోన్ మన జీవితంలో ఒక అంతర్భాగంగా మారింది. అయితే, దానితో పాటే పెరుగుతున్న సైబర్ బెదిరింపులు, డేటా దుర్వినియోగం, హ్యాకింగ్ భయాలు వినియోగదారులను ఆందోళనకు గురిచేస్తున్నాయి. ఈ నేపథ్యంలో ఐటీ నిపుణుడు నల్లమోతు శ్రీధర్ మొబైల్ ఫోన్ల భద్రత, యాప్ పర్మిషన్లు, వ్యక్తిగత డేటా రక్షణపై చాలాసార్లు కీలక విషయాలను వెల్లడిస్తూనే ఉన్నారు. మొబైల్‌ వాడకం, హ్యాకింగ్‌ వంటిపై జాగ్రత్తలు వివరిస్తుంటారు. ఇటీవల ఓ ఇంటర్వ్యూలో తెలిపిన వివరాల ప్రకారం…

కాల్ అంతరాయాలు, హ్యాకింగ్ అపోహలు:

చాలా మంది వినియోగదారులు ఎదుర్కొంటున్న సాధారణ సమస్యల్లో ఒకటి ఎవరికైనా కాల్ చేసినప్పుడు వేరే వ్యక్తులతో కనెక్ట్ అవ్వడం లేదా కాల్ కట్ అవ్వడం. దీన్ని హ్యాకింగ్‌గా పొరబడుతుంటారు. అయితే, ఇది ఫోన్ హ్యాక్ అవ్వడం కాదని స్పష్టం చేశారు. నెట్‌వర్క్ ఇంటర్‌ఫియరెన్స్, టెలికాం టవర్లపై ఉన్న బర్డెన్ లేదా ఓవర్‌లోడ్ వంటి సాంకేతిక కారణాల వల్ల ఇలా జరుగుతుందని వివరించారు. గతంలో టెలిఫోన్ లైన్‌లలో క్రాస్‌టాక్ (ఒకరి సంభాషణ మరొకరికి వినిపించడం) ఎలా ఉండేదో ఇది కూడా అలాంటిదేనని తెలిపారు. అందుకే దీని గురించి భయపడాల్సిన అవసరం లేదని, మీ డేటా పర్యవేక్షించబడటం లేదని హామీ ఇచ్చారు.

ఇది కూడా చదవండి: Eye Glasses: కళ్లద్దాలు వాడితే కంటి పవర్ పెరుగుతుందా? చాలా మందికి ఉన్న పెద్ద అపోహా ఏంటి?

అకస్మాత్తుగా ఆన్ అయ్యే కెమెరా, బ్లూటూత్.. అసలు కారణం:

కొంతమంది వినియోగదారులు తమ ఫోన్ కెమెరా లేదా బ్లూటూత్ అకస్మాత్తుగా, తమ ప్రమేయం లేకుండా ఆన్ అవుతోందని ఆందోళన చెందుతారు. ఇది ఫోన్ హ్యాక్ అయిందేమోనని భయపడతారు. దీనికి ప్రధాన కారణం మనం ఇన్‌స్టాల్ చేసుకునే యాప్‌లకు ఇచ్చే పర్మిషన్లేనని వివరించారు. మనం ఏదైనా యాప్‌ను ఇన్‌స్టాల్ చేసేటప్పుడు కెమెరా, మైక్రోఫోన్, లొకేషన్ వంటి వాటికి పర్మిషన్లు ఇస్తుంటాము. ఈ పర్మిషన్లు పొందిన తర్వాత ఆ యాప్ డెవలపర్ (హ్యాకర్ అయితే) ఆ సెన్సార్‌లను ఎప్పుడైనా యాక్సెస్ చేయగలరు.

దీన్ని నివారించడానికి ఆండ్రాయిడ్ ఆపరేటింగ్ సిస్టమ్‌లోని కొత్త ఫీచర్‌ను ఉపయోగించుకోవాలని ఆయన సూచించారు. యాప్ ఇన్‌స్టాల్ చేసేటప్పుడు లేదా మొదటిసారి పర్మిషన్ అడిగినప్పుడు “వన్-టైమ్” (ఒకసారి మాత్రమే) లేదా “ఓన్లీ వెన్ యూజింగ్ దిస్ అప్లికేషన్” (ఈ యాప్‌ను ఉపయోగిస్తున్నప్పుడు మాత్రమే) అనే ఆప్షన్‌ను ఎంచుకోవాలని తెలిపారు. దీనివల్ల మీరు యాప్‌ను ఓపెన్ చేసినప్పుడు మాత్రమే అది అవసరాన్ని బట్టి ఆయా సెన్సార్‌లను వాడుకోగలదు. మీరు యాప్ మూసివేసిన తర్వాత యాక్సెస్ చేయలేదు.

యాప్ సమస్యలకు ఎక్కడ ఫిర్యాదు చేయాలి?

యాప్ల ద్వారా ఎదురయ్యే సమస్యలకు ఎక్కడ ఫిర్యాదు చేయాలనేది చాలా మందికి తెలియదు. ఈ విషయంలో ఫిర్యాదు చేయడం ద్వారా పరిష్కారం లభించదని స్పష్టం చేశారు. ఎందుకంటే, ఇలాంటి సందర్భాల్లో చాలావరకు వినియోగదారులనే నిందిస్తారు. “ఆ యాప్‌ను ఎందుకు ఇన్‌స్టాల్ చేసుకున్నారు, దాని వల్ల ప్రమాదం ఉంటుందని మీకు తెలియదా?” అని ప్రశ్నిస్తారు. యాప్‌ల పనితీరు, డేటా దుర్వినియోగంపై సెంట్రల్ గవర్నమెంట్ స్థాయిలో బలమైన చట్టాలు లేదా నియంత్రణ ఫ్రేమ్‌వర్క్ లేకపోవడం వల్ల పోలీసులు లేదా ఇతర అధికారులు కూడా ఏమీ చేయలేరని ఆయన తెలిపారు. అందుకే మన జాగ్రత్తలో మనం ఉండటమే శ్రేయస్కరం.

డేటా భద్రతకు సెక్యూర్ ఫోల్డర్ ప్రయోజనాలు:

వ్యక్తిగత డేటా భద్రతకు సెక్యూర్ ఫోల్డర్ వంటి ఫీచర్లను ఉపయోగించాలని సూచించారు. శాంసంగ్ ఫోన్‌లలో డిఫాల్ట్‌గా ఉండే లేదా ఇన్‌స్టాల్ చేసుకోగలిగే ఈ సెక్యూర్ ఫోల్డర్, ఒక లాకర్ లాంటిదని, మీ ముఖ్యమైన ఫోటోలు, వీడియోలు, టెక్స్ట్ మెసేజ్‌లు, బ్యాంక్ కార్డు వివరాలు వంటి సున్నితమైన డేటాను ఇందులో భద్రపరుచుకోవచ్చని తెలిపారు. సరైన పాస్‌వర్డ్ ఎంటర్ చేస్తేనే దీన్ని యాక్సెస్ చేయవచ్చు. పాస్‌వర్డ్ లేకుండా పోలీసులు కూడా దీన్ని తెరవలేరని, ఇది అత్యంత సురక్షితమైనదని వివరించారు. సున్నితమైన డేటాను మెమరీ కార్డ్‌లో కాకుండా ఎన్‌క్రిప్ట్ చేయబడిన ఇంటర్నల్ మెమరీలోని సెక్యూర్ ఫోల్డర్‌లో సేవ్ చేసుకోవాలని సలహా ఇచ్చారు.

ప్రమాదకరమైన యాప్‌లు, సురక్షితమైన పద్ధతులు:

ఏ యాప్‌లు ప్రమాదకరమైనవి అనే ప్రశ్నకు, పరిచయం లేని యాప్‌ల పట్ల జాగ్రత్తగా ఉండాలని బదులిస్తున్నారు. Facebook, WhatsApp వంటి బాగా తెలిసిన యాప్‌లలో కూడా సెక్యూరిటీ లోపాలు ఉండవచ్చని (ఉదాహరణకు పెగాసస్), కానీ అవి సాధారణంగా ఎప్పటికప్పుడు సెక్యూర్డ్ ప్రోటోకాల్స్‌ను నిర్వహిస్తాయని తెలిపారు. ప్రధానంగా, మీ ఫోన్ నెమ్మదిగా ఉంది, బ్యాటరీ త్వరగా అయిపోతోంది, మీ ఫోన్‌లో 55 వైరస్‌లు ఉన్నాయి వంటి ప్రకటనలు చూసి యాప్‌లను ఇన్‌స్టాల్ చేయవద్దని గట్టిగా హెచ్చరించారు. ఈ యాప్‌లు మీ ఫోన్ మొత్తాన్ని నిఘా పెట్టి, మీ కెమెరా, మైక్రోఫోన్, స్టోరేజ్, ఇంటర్నెట్, జీపీఎస్ వంటి అన్ని యాక్టివిటీలను యాక్సెస్ చేసి, ఆ సమాచారాన్ని హ్యాకర్‌కు చేరవేస్తాయని, వారు ఆ డేటాను థర్డ్‌ పార్టీ మార్కెటింగ్ కంపెనీలకు అమ్ముకోవడం లేదా దుర్వినియోగం చేయడం చేస్తారని వివరించారు.

ఇది కూడా చదవండి: Gold Price: మహిళలకు గుడ్‌న్యూస్‌.. భారీగా తగ్గిన బంగారం ధరలు..!

ఫోన్‌లో ముఖ్యమైన యాప్‌లను మాత్రమే ఉంచుకోవాలని, గత ఆరు నెలలుగా ఉపయోగించని యాప్‌లను గుర్తించి, వాటిని వెంటనే అన్‌ఇన్‌స్టాల్ చేయాలని సూచించారు. ఆండ్రాయిడ్ ఆపరేటింగ్ సిస్టమ్‌లో వచ్చిన యాప్ పర్మిషన్లు రివోక్ చేసే (తిరిగి తీసివేసే) ఫీచర్ కూడా వినియోగదారులకు సహాయపడుతుందని ఆయన తెలిపారు. వ్యక్తిగత డేటా దుర్వినియోగం కాకుండా ఉండాలంటే ప్రతి ఒక్కరూ సెక్యూరిటీ, ప్రైవసీ గురించి అవగాహన పెంచుకోవడం చాలా ముఖ్యమని పేర్కొన్నారు.

ఇది కూడా చదవండి: BSNL Offer: బీఎస్‌ఎన్‌ఎల్‌ అదిరిపోయే ప్లాన్‌.. చౌకైన రీఛార్జ్‌తో 412 రోజుల వ్యాలిడిటీ..!

ఇది కూడా చదవండి: September Bank Holidays: సెప్టెంబర్‌లో బ్యాంకులకు ఎన్ని రోజులు సెలవులో తెలుసా..?

మరిన్ని బిజినెస్ వార్తల కోసం ఇక్కడ క్లిక్ చేయండి