లలితా సప్తమి, అపరాజిత సప్తమి: ప్రాముఖ్యత, పూజా విధానం.. సంపద పెరగాలంటే ఇలా చేయండి!
Lalitha Saptami and Aparajita Saptami Telugu: భాద్రపద శుక్లపక్ష సప్తమిని లలితా సప్తమి లేదా అపరాజిత సప్తమిగా జరుపుకుంటారు. శ్రీకృష్ణుడు, రాధ, లలిత దేవిలను ఈ రోజు పూజించడం వల్ల సకల సంబంధాలలో ఆకర్షణ శక్తి పెరుగుతుందని జ్యోతిష్య పండితులు తెలిపారు. కలకండ లేదా వెన్న నివేదించి, "ఓం హ్రీం లలితా రాధా శ్రీకృష్ణాయ స్వాహా" అనే మంత్రాన్ని పఠించడం ద్వారా శుభ ఫలితాలు పొందవచ్చు.
Updated on: Sep 17, 2026 | 10:43 PM
Lalitha Saptami and Aparajita Saptami Telugu: భాద్రపద శుక్లపక్ష సప్తమిని లలితా సప్తమి లేదా అపరాజిత సప్తమిగా జరుపుకుంటారు. అయితే ఈ రెండు పేర్ల మధ్య స్వల్ప వ్యత్యాసం ఉందని జ్యోతిష్య పండితులు వివరించారు. వాస్తవానికి, ఈ రోజు ఉత్తర భారతంలో, ముఖ్యంగా బృందావనం, మధుర వంటి ప్రదేశాలలో విశేషంగా పూజించే పండగ అని ఆయన పేర్కొన్నారు. లలిత దేవి శ్రీకృష్ణుడి అష్టసఖులలో ఒకరు. రాధాదేవికి, శ్రీకృష్ణుడికి మధ్య రాయబారం నడిపిన సఖి ఈవిడే. అసలు అష్టసఖులలో లలిత దేవికి మొదటి స్థానం ఉందని, అయితే రాధాదేవి ప్రాధాన్యత తర్వాత పెరిగిందని వివరించారు. లలితా సప్తమి తరువాత రోజు రాధాష్టమి వస్తుంది. ఈ రెండు పండగలను శ్రీకృష్ణాష్టమి వలెనే అత్యంత వైభవంగా జరుపుకుంటారు. కాలక్రమేణా, లలితా సప్తమిని లలితాదేవి (అమ్మవారి రూపం) పూజకు అనుసంధానించబడింది. అమ్మవారిని ఏ రూపంలో పూజించినా తప్పు కాదని, అందుకే ఈ రోజు లలితా సహస్రనామ పారాయణం చేసే సంప్రదాయం కూడా వచ్చిందని ఆయన పేర్కొన్నారు.
పూజా విధానం, ఆరాధన:
ఈ రోజు నిజానికి శ్రీకృష్ణుడు, రాధా దేవి, లలిత దేవిలను కలిపి ఆరాధించాలి. ఒకవైపు లలిత దేవి, మరోవైపు రాధా దేవి, మధ్యలో శ్రీకృష్ణుడిని ఉంచి పూజలు చేయాలి. అయితే, లలితాకృష్ణుల పటం లభించడం కష్టం కాబట్టి, రాధాకృష్ణుల పటం లేదా బాలకృష్ణుడి పటం ముందు పూజలు చేయవచ్చని తెలిపారు.
ఆకర్షణ శక్తి వృద్ధి:
ఈ పూజ చేయడం వల్ల అన్ని సంబంధాలలో, అంటే భార్యాభర్తల మధ్య, తల్లిదండ్రులకు పిల్లల మధ్య, స్నేహితుల మధ్య, అలాగే వృత్తి జీవితంలో కూడా ఆకర్షణ శక్తి గణనీయంగా పెరుగుతుంది. ఆకర్షణ లేకపోతే కలహాలు ఏర్పడతాయని, కాబట్టి సంపద ఆకర్షణ శక్తిని పెంచుకోవడానికి ఈ పూజ చాలా ముఖ్యమని ఆయన నొక్కిచెప్పారు. రాజకీయ నాయకులు, సినిమా నటులు, మార్కెటింగ్ రంగంలో ఉన్నవారు, లేదా సాధారణ జీవితంలో ప్రతి ఒక్కరికీ ఆకర్షణ శక్తి అవశ్యకమని ఆయన వివరించారు.
నివేదన, మంత్ర పఠనం:
లలితా సప్తమి రోజున శ్రీకృష్ణుడికి కలకండ లేదా వెన్నను నివేదించాలి. తీపి పదార్థాలు మధురమైన ఆకర్షణను సూచిస్తాయి కాబట్టి, ఈ రోజు కేవలం తీపి పదార్థాలనే పెట్టాలని సూచించారు. “ఓం హ్రీం లలితా రాధా శ్రీకృష్ణాయ స్వాహా” అనే మంత్రాన్ని పఠించాలి. ఈ మంత్రాన్ని స్త్రీ, పురుషులు ఎవరైనా పఠించవచ్చని, “స్వాహా” అనేది శక్తిని ఆవాహన చేసుకోవడానికి ఉపయోగపడే పదం అని స్పష్టం చేశారు. మంత్ర పఠనానికి ఎటువంటి భేదాలు లేవని, ఎవరైనా, ఎప్పుడైనా మంత్రాలను మననం చేయవచ్చని ఆయన తెలిపారు.
దీపారాధన:
శ్రీకృష్ణుడి పటం ముందు ఏడు వత్తులతో నెయ్యి దీపాన్ని వెలిగించడం ద్వారా ఆకర్షణ శక్తి మరింత పెరుగుతుంది. అప్పుడప్పుడు లేదా ప్రతి నెలకు ఒకసారి ఇలా దీపం పెట్టడం వల్ల ఇంట్లో సమస్యలు తొలగిపోయి, ఉద్యోగంలో కూడా ఆకర్షణ పెరుగుతుందని ఆయన వివరించారు.
ప్రత్యమ్నాయ పద్ధతులు:
పూజలు, మంత్ర పఠనం కష్టంగా భావించే వారి కోసం ఒక తేలికైన మార్గాన్ని సూచించారు. “లవ్ 528 రాక్ రోజ్” లేదా కేవలం “లవ్ 528” అని మననం చేయడం ద్వారా కూడా ఆకర్షణ శక్తిని పొందవచ్చని ఆయన పేర్కొన్నారు. “528” అనేది డబ్బు ఆకర్షణకు కూడా ఉపయోగపడే ఒక సంఖ్య అని, ఇది విపరీతమైన శక్తిని పెంచుతుందని ఆయన వివరించారు. స్విచ్ వర్డ్స్ కు ఎటువంటి నియమాలు ఉండవని, ఎప్పుడైనా, ఎవరైనా పఠించవచ్చని తెలియజేశారు.
(Disclaimer: ఈ కథనంలోని పూజా విధానాలు, మంత్రాలు, ఆధ్యాత్మిక విశ్వాసాలు సంప్రదాయాలు, విశ్వాసాల ఆధారంగా అందించబడ్డాయి. వీటికి శాస్త్రీయ ఆధారాలు ఉన్నాయని భావించరాదు. వ్యక్తిగత నమ్మకాలకు అనుగుణంగా ఆచరించండి.)
