ప్రధాని మోదీ బర్త్డే వేళ దేశవ్యాప్తంగా దీపాల వెలుగు.. మరోవైపు ‘చిప్’ పవర్పై ఫోకస్!
ప్రధానమంత్రి నరేంద్ర మోదీ 76వ జన్మదినాన్ని పురస్కరించుకుని దేశవ్యాప్తంగా ‘సేవా సంకల్ప్ అభియాన్’లో భాగంగా ఆశీర్వాద్ దియా, దీపోత్సవ కార్యక్రమాలు జరిగాయి. అదే సమయంలో మోదీ సెమీకాన్ ఇండియా-2026 సదస్సును ప్రారంభించి, సెమీకండక్టర్ స్టార్టప్లతో సంభాషించారు. రూ.1.27 లక్షల కోట్ల సెమికాన్ 2.0 పథకంతో భారత్లో చిప్ డిజైన్, ఉత్పత్తిని ప్రోత్సహిస్తూనే, అన్నపూర్ణ యోజన ద్వారా మహిళలకు ప్రయోజనాలను అందించారు.
Updated on: Sep 17, 2026 | 10:30 PM
న్యూఢిల్లీ: భారత ప్రధానమంత్రి నరేంద్ర మోదీ 76వ జన్మదినం సందర్భంగా దేశవ్యాప్తంగా పలు కార్యక్రమాలు జరిగాయి. భారతీయ జనతా పార్టీ ఆధ్వర్యంలో ‘సేవా సంకల్ప్ అభియాన్’లో భాగంగా ‘ఆశీర్వాద్ దియా’ కార్యక్రమాన్ని నిర్వహించారు. వివిధ రాష్ట్రాల్లో బీజేపీ నేతలు, కేంద్ర మంత్రులు, ఎంపీలు, పార్టీ కార్యకర్తలు ఇందులో పాల్గొన్నారు. ఈ కార్యక్రమం ద్వారా ప్రధాని మోదీకి ప్రజల ఆశీస్సులు, శుభాకాంక్షలు తెలియజేసే కార్యక్రమాలు చేపట్టారు.
మధ్యప్రదేశ్లోని ఉజ్జయినిలో భారీ దీపోత్సవం నిర్వహించారు. శిప్రా నది ఘాట్లు, మహాకాళ్ లోక్ పరిసరాల్లో పెద్ద సంఖ్యలో దీపాలను వెలిగించారు. గుజరాత్లోనూ ‘ఆశీర్వాద్ నో దివ్డో’ పేరుతో వేలాది ప్రాంతాల్లో దీపాలు వెలిగించే కార్యక్రమాలు జరిగాయి. అహ్మదాబాద్లో కేంద్ర హోంమంత్రి అమిత్ షా తదితరులు కార్యక్రమాల్లో పాల్గొన్నారు.
ఢిల్లీలో బీజేపీ మైనారిటీ మోర్చా ఆధ్వర్యంలోనూ ‘ఆశీర్వాద్ దియా’ కార్యక్రమం నిర్వహించారు. ముస్లిం సమాజానికి చెందిన కొందరు కూడా ఇందులో పాల్గొన్నట్లు వార్తా నివేదికలు తెలిపాయి. ఉత్తరప్రదేశ్లో లక్నో సహా పలు ప్రాంతాల్లో కూడా కార్యక్రమాలు నిర్వహించారు.
ఇదిలా ఉండగా.. తన జన్మదినం సందర్భంగా ప్రధాని మోదీ సెమీకాన్ ఇండియా-2026 కార్యక్రమంలో పాల్గొన్నారు. ఈ సందర్భంగా సెమీకాన్ స్టార్టప్ సీఈవోలతో ఆయన సంభాషించారు. తనకు జన్మదిన శుభాకాంక్షలు తెలిపిన ఓ యువతితో జరిగిన సరదా సంభాషణకు సంబంధించిన వీడియోను మోదీ సోషల్ మీడియాలో పంచుకున్నారు. ఆమెకు కూడా అదే రోజు పుట్టినరోజు అని తెలియడంతో ప్రధాని స్పందించిన తీరు ఆసక్తికరంగా మారింది.
View this post on Instagram
మరోవైపు పశ్చిమ బెంగాల్లో ‘అన్నపూర్ణ దివస్’ కార్యక్రమంలో ప్రధాని వీడియో కాన్ఫరెన్స్ ద్వారా పాల్గొన్నారు. అన్నపూర్ణ యోజన కింద సుమారు 1.58 కోట్ల మంది మహిళలకు ఒక్కొక్కరికి రూ.3,000 చొప్పున సెప్టెంబర్ నెలకు సంబంధించిన నగదు బదిలీ చేపట్టినట్లు ప్రభుత్వం తెలిపింది. ఈ పథకం ద్వారా అర్హులైన మహిళలకు ప్రయోజనాలు అందేలా చూడాలని ప్రధాని పేర్కొన్నారు.
ఇక ప్రధాని మోదీ జన్మదినం రోజునే న్యూఢిల్లీలోని యశోభూమిలో SEMICON India 2026 ఐదో ఎడిషన్ ప్రారంభమైంది. సెప్టెంబర్ 17 నుంచి 19 వరకు జరిగే ఈ సదస్సు ‘Silicon to Systems: Building the Ecosystem’ అనే థీమ్తో జరుగుతోంది. చిప్ డిజైన్ నుంచి తయారీ, ప్యాకేజింగ్, మెటీరియల్స్, పరిశోధన, నైపుణ్యాభివృద్ధి వరకు పూర్తి సెమీకండక్టర్ ఎకోసిస్టమ్ను అభివృద్ధి చేయడంపై దృష్టి పెట్టారు.
ఇదే సమయంలో కేంద్రం ఇప్పటికే రూ.1,27,500 కోట్లతో Semicon 2.0కు ఆమోదం తెలిపింది. చిప్ డిజైన్, కొత్త ఫ్యాబ్లు, పరికరాలు–మెటీరియల్స్, అడ్వాన్స్డ్ ప్యాకేజింగ్, పరిశోధన–అభివృద్ధి, టాలెంట్ డెవలప్మెంట్ వంటి ఆరు ప్రధాన అంశాలపై ఈ కార్యక్రమం దృష్టి సారిస్తోంది. అలా మోదీ పుట్టినరోజు సందర్భంగా ఒకవైపు దేశవ్యాప్తంగా దీపోత్సవాలు, సేవా కార్యక్రమాలు జరుగుతుండగా.. మరోవైపు భారత సెమీకండక్టర్ రంగానికి సంబంధించిన కీలక కార్యక్రమం కూడా ప్రారంభమైంది.
మరిన్ని జాతీయ వార్తల కోసం ఇక్కడ క్లిక్ చేయండి..
