5 కేజీల LPG సిలిండర్లపై గుడ్‌న్యూస్‌ చెప్పిన కేంద్రం! ఇక గ్యాస్‌ కష్టాలు తీరినట్టే?

ఇరాన్‌లో కొనసాగుతున్న యుద్ధ పరిస్థితుల ప్రభావంతో ఎల్పీజీ సరఫరాలో ఒత్తిడి పెరుగుతున్న నేపథ్యంలో కేంద్ర ప్రభుత్వం కీలక నిర్ణయం తీసుకుంది. వలస కార్మికులకు ఉపశమనం కలిగించేందుకు 5 కేజీల ఎల్పీజీ సిలిండర్ల రోజువారీ కేటాయింపును రెట్టింపు చేయాలని నిర్ణయించింది. ఛోటుగా పిలవబడే ఈ 5 కేజీల ఫ్రీ ట్రేడ్ ఎల్పీజీ సిలిండర్లు ప్రత్యేకంగా పట్టణ, పాక్షిక పట్టణ ప్రాంతాల్లో పనిచేసే వలస కార్మికులను దృష్టిలో ఉంచుకుని ప్రవేశపెట్టబడ్డాయి. సాధారణ గ్యాస్ కనెక్షన్ కోసం చిరునామా రుజువు అవసరం కాగా, ఈ చిన్న సిలిండర్‌ను కేవలం గుర్తింపు పత్రంతోనే కొనుగోలు చేయవచ్చు. దీంతో బ్లాక్ మార్కెట్‌పై ఆధారపడే పరిస్థితి తగ్గుతుందని అధికారులు భావిస్తున్నారు.

ఈ అదనపు కేటాయింపులు మార్చి 2-3 తేదీలలో నమోదైన సరఫరా డేటాను ఆధారంగా తీసుకుని రాష్ట్రాలు, కేంద్రపాలిత ప్రాంతాలకు పంపిణీ చేయబడతాయి. ఇప్పటికే ఉన్న 20 శాతం గరిష్ట పరిమితికి అదనంగా ఈ పెంపు వర్తిస్తుంది. కేంద్రం రాష్ట్ర ప్రభుత్వాలకు రాసిన లేఖలో ఈ అదనపు 5 కేజీల సిలిండర్లను ప్రత్యేకంగా వలస కార్మికుల అవసరాల కోసం మాత్రమే వినియోగించాలని స్పష్టం చేసింది. సరఫరా వ్యవస్థను సజావుగా నిర్వహించేందుకు ఆయిల్ మార్కెటింగ్ కంపెనీల సహకారం తీసుకోనున్నారు.

ప్రభుత్వం తీసుకున్న ఈ చర్య ద్వారా వలస కార్మికులు, బలహీన వర్గాలకు తగినంత వంట ఇంధనం అందుబాటులో ఉండేలా చూడటమే లక్ష్యంగా ఉంది. ముఖ్యంగా ఎల్పీజీ కొరత సమయంలో ధరల పెరుగుదలను నియంత్రించడం, అవసరమైన వారికి సులభంగా సిలిండర్లు అందించడంపై దృష్టి పెట్టింది. మొత్తం మీద ఈ నిర్ణయం వలస కార్మికులపై ఆర్థిక భారం తగ్గించడంలో, అవసరమైన ఇంధనాన్ని సమయానికి అందించడంలో కీలకంగా మారనుంది.

మరిన్ని బిజినెస్ వార్తల కోసం ఇక్కడ క్లిక్ చేయండి