Loan: లోన్ తీసుకున్న వ్యక్తి మరణిస్తే.. EMI ఎవరు కట్టాలి..? మీకు ఈ విషయాలు తెలుసా..?

Loan After Death

మనకు అత్యవసరంగా డబ్బు అవసరమైనప్పుడు ముందుగా గుర్తొచ్చేది లోన్స్. ప్రస్తుత కాలంలో రుణాలు తీసుకోవడం చాలా సాధారణమైపోయింది. హోమ్ లోన్స్, పర్సనల్ లోన్స్, క్రెడిట్ కార్డ్స్.. ఇలా పలు రకాల లోన్స్ అందుబాటులో ఉన్నాయి. అయితే రుణం తీసుకున్న వ్యక్తి అనుకోకుండా మరణిస్తే ఆ లోన్ బకాయిలు రద్దు అవుతాయా..? లేదా కుటుంబ సభ్యులు చెల్లించాలా..? అనే సందేహాలు చాలామందికి ఉంటాయి. బ్యాంకులు, ఆర్థిక సంస్థలు ఈ విషయంలో ఎలాంటి నిబంధనలు పాటిస్తాయో ఇప్పుడు తెలుసుకుందాం.

పర్సనల్ లోన్స్ రూల్స్:

పర్సనల్ లోన్స్, క్రెడిట్ కార్డ్ బకాయిలు అన్‌సెక్యూర్డ్ రుణాల జాబితాలోకి వస్తాయి. అంటే ఈ రుణాలకు ఎలాంటి ఆస్తి హామీగా ఉండదు. ఒకవేళ లోన్ తీసుకున్న వ్యక్తి మరణిస్తే, బ్యాంకు ఆ వ్యక్తి కుటుంబ సభ్యులను లేదా గ్యారంటర్‌ను ఈ రుణం చెల్లించమని బలవంతం చేయదు. అన్‌సెక్యూర్డ్ రుణాలు కాబట్టి బ్యాంకులు ఇతరుల నుంచి వాటిని రికవరీ చేయలేవు.

హోమ్ లోన్స్ నిబంధనలు:

హోమ్ లోన్స్ సెక్యూర్డ్ రుణాల కిందకు వస్తాయి. ఎందుకంటే ఇంటిని హామీగా పెట్టి ఈ రుణాలు తీసుకుంటారు. సాధారణంగా హోమ్ లోన్‌కు ఒక ప్రధాన రుణగ్రహీతతో పాటు ఒక కో-అప్లికెంట్ (సహ-రుణగ్రహీత) కూడా ఉంటారు. ఒకవేళ లోన్ తీసుకున్న వ్యక్తి మరణిస్తే, ఆ రుణాన్ని తిరిగి చెల్లించే బాధ్యత కో-అప్లికెంట్‌పై పడుతుంది. ఈ సందర్భంలో కో-అప్లికెంట్ వెంటనే బ్యాంకుకు ఈ విషయాన్ని తెలియజేయాలి. అప్పుడు మరణించిన వ్యక్తి పేరుపై నుంచి లోన్‌ను తొలగించి, కో-అప్లికెంట్ పేరు మీదకు లోన్ బకాయిలను బదిలీ చేసే అవకాశం ఉంటుంది.

ఇన్సూరెన్స్ ఉంటే లాభం:

హోమ్ లోన్ తీసుకునేటప్పుడు చాలా బ్యాంకులు ఇన్సూరెన్స్ కవర్ ఆప్షన్‌ను అందిస్తాయి. రుణగ్రహీత ఈ ఆప్షన్ ఎంచుకుంటే, వారు మరణించినప్పుడు ఇన్సూరెన్స్ కంపెనీ మిగిలిన లోన్ బకాయిలను చెల్లిస్తుంది. దీంతో కో-అప్లికెంట్‌కు ఎలాంటి ఆర్థిక ఇబ్బందులు ఉండవు. పర్సనల్ లోన్స్ విషయంలో ఇలాంటి ఇన్సూరెన్స్ ఆప్షన్లు తక్కువగా ఉంటాయి. అందుకే హోమ్ లోన్ తీసుకునేటప్పుడు ఇన్సూరెన్స్ కవర్ గురించి జాగ్రత్తగా తెలుసుకోవడం ముఖ్యం.

మొత్తానికి లోన్ తీసుకున్న వ్యక్తి మరణించినప్పుడు.. అది ఏ రకమైన రుణం అనే దానిపై ఆధారపడి నిబంధనలు మారుతాయి. రుణగ్రహీతలు ఈ విషయాలను ముందుగానే తెలుసుకుని, సరైన ఇన్సూరెన్స్ పాలసీలను ఎంచుకోవడం వల్ల భవిష్యత్తులో కుటుంబ సభ్యులకు ఆర్థిక భారం తగ్గుతుంది.

మరిన్ని బిజినెస్ వార్తల కోసం ఇక్కడ క్లిక్ చేయండి..