అమెరికా కాస్ట్కో స్టోర్లలో భారతీయ మామిడి పండ్ల సందడి.. కిలో ధర ఎంతో తెలిస్తే నోరెళ్ల బెట్టాల్సిందే..!
భారతీయ మామిడి పండ్ల రారాజు కేసర్ (Kesar Mangoes) అమెరికా మార్కెట్లలో సందడి చేస్తోంది. భారతీయ కేసర్ మామిడి పండ్లు ఇప్పుడు సియాటిల్తో సహా అనేక అమెరికా నగరాల్లో అమ్ముడవుతున్నాయి. ఇవి కాస్ట్కో వంటి స్టోర్లలో లభిస్తాయి. నాలుగు మామిడి పండ్ల ప్యాక్ ధర సుమారు $19.99 ఉంటుంది. ప్రపంచంలోనే మామిడి పండ్లను అత్యధికంగా ఉత్పత్తి చేసే దేశం భారతదేశం. అమెరికాలో మామిడి పండ్లకు డిమాండ్ వేగంగా పెరుగుతోంది. అమెరికాలో నివసిస్తున్న భారతీయులకు, ఇది వారి మాతృభూమిని గుర్తు చేస్తుంది.
Updated on: May 17, 2026 | 3:07 PM
భారతదేశానికి చెందిన నోరూరించే మామిడి పండ్ల రుచి ఇప్పుడు అమెరికా వాసులను మైమరపిస్తోంది. ముఖ్యంగా పశ్చిమ భారతదేశంలోని గుజరాత్ ప్రాంతంలో పండే ప్రసిద్ధ కేసర్ (Kesar Mangoes) రకం మామిడి పండ్లు అమెరికాలోని ప్రముఖ హోల్సేల్ రిటైల్ నెట్వర్క్ కాస్ట్కో (Costco) షెల్ఫ్లలో చేరాయి. మే 15 నుండి గ్రేటర్ సీయాటిల్ పరిధిలోని పలు ప్రధాన కాస్ట్కో స్టోర్లలో ఇవి అధికారికంగా అమ్మకానికి వచ్చాయి.
భారత రాయబార కార్యాలయం ప్రత్యేక కృషి:
సీయాటిల్లోని భారత కాన్సులేట్ జనరల్ (Consulate General of India) గత ఏడాది కాలంగా భారతీయ పండ్ల ఎగుమతులను ప్రోత్సహించడానికి చేసిన నిరంతర ప్రయత్నాల వల్లే ఇది సాధ్యమైంది. జూలై 2025లో నిర్వహించిన మాంగో డిప్లమసీ ప్రమోషన్ ఈవెంట్లో భాగంగా స్థానిక పంపిణీదారులు, వినియోగదారులకు దసహేరి, చౌసా, కేసరి, లంగ్డా వంటి ప్రీమియం రకాలను పరిచయం చేశారు. ఈ ప్రయత్నాల ఫలితంగానే ఇప్పుడు సీయాటిల్, కిర్క్లాండ్, ఇసాక్వా, రెడ్మండ్, ఉడిన్విల్లే, లిన్వుడ్ ప్రాంతాల్లోని కాస్ట్కో స్టోర్లలో కేసర్ మామిడి పండ్లు సందడి చేస్తున్నాయి. ఇటీవల భగ్వా రకం అనార్ (దానిమ్మ) పండ్ల విజయవంతమైన రవాణా తర్వాత ఈ మామిడి పండ్లు రావడం విశేషం.
కేసర్ మామిడి ప్రత్యేకత, ధర వివరాలు:
జియోగ్రాఫికల్ ఇండికేషన్ (GI) ట్యాగ్ పొందిన కేసర్ మామిడి పండ్లు వాటి ముదురు నారింజ రంగు గుజ్జు, అద్భుతమైన తీపి, సువాసనకు ప్రపంచవ్యాప్తంగా గుర్తింపు పొందాయి. ధర విషయానికి వస్తే, ప్రస్తుతం ఈ ప్రీమియం క్వాలిటీ కేసర్ మామిడి పండ్ల 3 కిలోల బాక్స్ ధర ఆన్లైన్, ప్రముఖ స్టోర్లలో పన్నులతో కలపకుండా దాదాపు 50 అమెరికన్ డాలర్లుగా (భారతీయ కరెన్సీలో సుమారు రూ.4,150 కి పైగా) ఉంది. కాస్ట్కో వంటి హోల్సేల్ స్టోర్లలో భారీ పరిమాణంలో లభించడం వల్ల స్థానిక ప్రవాస భారతీయులు (NRIs) తమ స్వదేశీ రుచులను ఆస్వాదించేందుకు ఎగబడుతున్నారు. అమెరికా మార్కెట్లో భారతీయ వ్యవసాయ ఉత్పత్తుల బ్రాండ్ వాల్యూను పెంచడంలో ఈ పరిణామం కీలక మైలురాయిగా నిలిచింది.
