Amazon: ఆ దేశంలోని అమెజాన్‌ ఆఫీస్‌పై ఇరాన్‌ దాడి! వెబ్‌ సేవలకు అంతరాయం!

అమెరికా, ఇరాన్ ఉద్రిక్తతల నేపథ్యంలో గల్ఫ్ ప్రాంతంలో టెక్ మౌలిక సదుపాయాలపై దాడులు పెరుగుతున్నాయి. తాజా ఘటనలో బహ్రెయిన్‌లోని అమెజాన్‌ భవనంపై ఇరాన్‌కు చెందిన డ్రోన్ దాడి జరిగినట్లు సమాచారం. ఈ దాడి కారణంగా అమెజాన్‌ వెబ్‌ సర్వీస్‌ సేవలకు అంతరాయం కలిగింది. ఇదే తరహా దాడి ఇటీవల యూఏఈలోని అమెజాన్ డేటా సెంటర్‌పై కూడా జరిగినట్లు నివేదికలు పేర్కొంటున్నాయి. ఈ పరిణామాలు కేవలం భద్రతా సమస్యలకే పరిమితం కాకుండా ప్రపంచ టెక్ రంగంపై విస్తృత ప్రభావం చూపే అవకాశం ఉందని నిపుణులు హెచ్చరిస్తున్నారు. ముఖ్యంగా స్ట్రెయిట్‌ ఆఫ్‌ హార్ముజ్‌ వద్ద చమురు ట్యాంకర్లపై జరిగిన దాడుల తరహాలోనే, ఇప్పుడు డేటా సెంటర్లపై దాడులు కొత్త ఆర్థిక సంక్షోభానికి దారితీయవచ్చని భావిస్తున్నారు.

ప్రస్తుతం గల్ఫ్ దేశాలు, సిలికాన్ వ్యాలీ మధ్య ఏర్పడిన సాంకేతిక భాగస్వామ్యం కూడా ఈ పరిస్థితులతో ప్రమాదంలో పడింది. OpenAI, NVIDIA వంటి AI కంపెనీలు గల్ఫ్ దేశాల నుంచి భారీ పెట్టుబడులు పొందుతున్నాయి. ఈ నిధులు AI డేటా సెంటర్లు, చిప్‌లు, క్లౌడ్ మౌలిక సదుపాయాల అభివృద్ధికి కీలకంగా మారాయి. అయితే ఈ యుద్ధం కొనసాగితే ఆ పెట్టుబడులు నిలిచిపోయే ప్రమాదం ఉందని విశ్లేషణలు సూచిస్తున్నాయి. గల్ఫ్ దేశాల సార్వభౌమ సంపద నిధులు, సౌదీ అరేబియాకు చెందిన PIF, అబుదాబికి చెందిన ADIA, ముబడాలా, ఖతార్‌కు చెందిన QIA — ఇప్పటికే బిలియన్ల డాలర్లను AI రంగంలో పెట్టుబడిగా పెట్టాయి. కానీ ప్రస్తుత భౌగోళిక అస్థిరత కారణంగా ఈ నిధుల ప్రవాహం తగ్గే అవకాశం ఉంది.

ఇదే సమయంలో ఇరాన్ కూడా స్పష్టంగా హెచ్చరికలు జారీ చేసింది. Microsoft, Google, IBM వంటి అమెరికన్ టెక్ సంస్థల మౌలిక సదుపాయాలను లక్ష్యంగా చేసుకునే అవకాశముందని పేర్కొంది. దీంతో గల్ఫ్ ప్రాంతం ఇకపై AI డేటా సెంటర్లకు సురక్షిత స్థలం కాదన్న భావన పెరుగుతోంది. అబుదాబిలో ప్రతిపాదిత ‘స్టార్‌గేట్’ వంటి బిలియన్ డాలర్ల ప్రాజెక్టులు ఆలస్యం కావచ్చు లేదా రద్దయ్యే ప్రమాదం ఉందని విశ్లేషకులు భావిస్తున్నారు. మొత్తం మీద ఈ యుద్ధం కొనసాగితే గల్ఫ్‌లో AI పెట్టుబడులు, టెక్ భాగస్వామ్యాలు, భవిష్యత్ ప్రాజెక్టులపై దీర్ఘకాలిక ప్రభావం పడే అవకాశం ఉంది.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి