క్రెడిట్ కార్డు బిల్లులో మినిమమ్ డ్యూ కడితే లాభమా.? నష్టమా.? ఇది చూడకపోతే మోసపోతారు..

నేటి కాలంలో క్రెడిట్ కార్డు లేని వారు చాలా తక్కువ. బ్యాంకులో అకౌంట్ ఉంటే చాలు, ఉచితంగా క్రెడిట్ కార్డులు ఇస్తామంటూ మనకు రోజూ ఫోన్లు వస్తూనే ఉంటాయి. చేతిలో డబ్బులు లేకపోయినా ఏదైనా వస్తువును కొనే వెసులుబాటు ఉండటంతో, చాలామంది క్రెడిట్ కార్డులను వరంగా భావిస్తారు. కానీ, ఈ సౌకర్యమే ఒకానొక దశలో మనల్ని అప్పుల ఊబిలోకి నెట్టేస్తుందని చాలా మందికి తెలియదు. ముఖ్యంగా క్రెడిట్ కార్డు బిల్లులో ఉండే “మినిమం డ్యూ” అనే అంశం ఒక పెద్ద మాయాజాలం.

చాలామంది క్రెడిట్ కార్డు బిల్లు రాగానే అందులో ఉన్న మొత్తం అమౌంట్ కట్టలేక, కేవలం మినిమం అమౌంట్ కట్టేసి హాయిగా ఊపిరి పీల్చుకుంటారు. “అమ్మయ్య! ఈ నెలకు గడిచిపోయింది కదా” అని రిలాక్స్ అవుతారు. కానీ అసలు ప్రమాదం ఇక్కడే మొదలవుతుంది. మీరు కట్టే ఆ మినిమం అమౌంట్ కేవలం వడ్డీకి మాత్రమే సరిపోతుంది. అసలు అలాగే ఉంటుంది. క్రెడిట్ కార్డులపై బ్యాంకులు వసూలు చేసే వడ్డీ ఏడాదికి దాదాపు 30 శాతం నుండి 45 శాతం వరకు ఉంటుంది. ఇది సాధారణ పర్సనల్ లోన్స్ కంటే చాలా ఎక్కువ.

మనం చేసే అతి పెద్ద తప్పు ఏమిటంటే, క్రెడిట్ కార్డును డెబిట్ కార్డులా వాడటం. అవసరం లేకపోయినా కేవలం ఆఫర్లు ఉన్నాయని లేదా స్టేటస్ కోసమని అనవసరమైన వస్తువులు కొనేస్తుంటాం. ఇలా చేయడం వల్ల వచ్చే నెల వచ్చే జీతం కంటే క్రెడిట్ కార్డు బిల్లు ఎక్కువైపోతుంది. అప్పుడు కేవలం మినిమం డ్యూ కడుతూ కాలం వెళ్లదీస్తుంటే, ఆ అప్పు చక్రవడ్డీతో కొండలా పెరిగిపోతుంది. ఒకానొక దశలో అది మనం తీర్చలేనంత భారం అయిపోతుంది. దీనివల్ల మన సిబిల్ స్కోర్ దారుణంగా పడిపోతుంది. భవిష్యత్తులో మనకు హోమ్ లోన్ లేదా కార్ లోన్ కావాలన్నా బ్యాంకులు నిరాకరిస్తాయి, ఒకవేళ ఇచ్చినా ఎక్కువ వడ్డీ వసూలు చేస్తాయి.

మరో ప్రమాదకరమైన విషయం ఏమిటంటే, క్రెడిట్ కార్డును ఏటీఎంలలో పెట్టి నగదు డ్రా చేయడం. ఇలా చేసిన మరుసటి క్షణం నుండే భారీ వడ్డీలు, అదనపు ఛార్జీలు పడతాయి. దీనికి సాధారణ కొనుగోళ్లకు ఉండే 40-50 రోజుల గడువు వర్తించదు. కాబట్టి ఎట్టి పరిస్థితుల్లోనూ క్రెడిట్ కార్డుతో డబ్బులు డ్రా చేయకూడదు. ఒకటికి మించి ఎక్కువ క్రెడిట్ కార్డులు వాడటం కూడా అనవసరం. అవి వాడినా వాడకపోయినా వార్షిక ఛార్జీలు పడుతూనే ఉంటాయి.

చివరగా చెప్పేదేమిటంటే, క్రెడిట్ కార్డు అనేది ఒక కత్తి లాంటిది. దాన్ని సరైన పద్ధతిలో వాడితే మేలు జరుగుతుంది, లేదంటే మన ఆర్థిక పరిస్థితిని ముక్కలు చేస్తుంది. ఎప్పుడైనా సరే క్రెడిట్ కార్డు బిల్లును పూర్తిగా కట్టేయడానికి ప్రయత్నించండి. మినిమం డ్యూ అనే ట్రాప్‌లో పడకండి. అనవసరమైన క్రెడిట్ కార్డులను బ్యాంకుకు వెళ్లి ఎన్ఓసి తీసుకుని క్లోజ్ చేయడం మంచిది. క్రమశిక్షణతో కూడిన ఖర్చులే మిమ్మల్ని ఆర్థికంగా బలోపేతం చేస్తాయి.