సోషల్ మీడియా ఇన్‌ఫ్లుయెన్సర్ నాగమణి మిస్సింగ్ మిస్టరీ.. భర్త సంచలన ప్రకటన.. అసలేం జరిగింది?
సోషల్ మీడియాలో రీల్స్ చేస్తూ గుర్తింపు తెచ్చుకున్న ఇన్‌ఫ్లుయెన్సర్ నాగమణి అదృశ్యం తీవ్ర కలకలం రేపుతోంది. భర్త రాజు పోలీసులకు ఫిర్యాదు చేసినా ఐదు నెలలుగా ఎలాంటి ఆచూకీ లభించలేదు. కొందరి వ్యక్తుల ప్రమేయంపై భర్త అనుమానాలు వ్యక్తం చేస్తుండగా, అత్తింటివారే కారణమని పుట్టింటివారు ఆరోపిస్తున్నారు. భార్య ఆచూకీ తెలిపిన వారికి లక్ష రూపాయల బహుమతి ఇస్తానని భర్త పోస్టర్లు వేయించడం ప్రస్తుతం చర్చనీయాంశమైంది.
Updated on: Oct 10, 2026 | 4:35 PM
డిజిటల్ మీడియా ప్రపంచంలో రోజుకో కొత్త ఘటన వైరల్ అవుతుంటుంది. ముఖ్యంగా సోషల్ మీడియాలో రీల్స్ చేస్తూ పాపులర్ అయిన సెలబ్రిటీల జీవితాల్లో జరిగే పరిణామాలు ఎప్పుడూ చర్చనీయాంశమవుతుంటాయి. తాజాగా అన్యోన్యంగా సాగిపోతున్న ఓ ఇన్‌ఫ్లుయెన్సర్ దంపతుల జీవితంలో చోటుచేసుకున్న అనూహ్య పరిణామం అందరినీ విస్మయానికి గురిచేస్తోంది. కేవలం నాలుగు నెలల పసిపాపను వదిలి ఇన్‌ఫ్లుయెన్సర్ నాగమణి అదృశ్యమైన ఉదంతం ఇప్పుడు తీవ్ర చర్చకు దారితీసింది.
కాకినాడ జిల్లా కోటనందూరు మండలం బొద్దవరం గ్రామానికి చెందిన బద్ధ రాజు, విజయనగరం జిల్లా తెర్లాం మండలం నెమలాం గ్రామానికి చెందిన నాగమణి ఇద్దరూ సోషల్ మీడియాలో ఇన్‌ఫ్లుయెన్సర్లుగా రాణిస్తున్నారు. రకరకాల రీల్స్ చేస్తూ డిజిటల్ మాధ్యమాల్లో మంచి గుర్తింపు తెచ్చుకున్న వీరి పరిచయం ప్రేమగా మారి పెద్దల అంగీకారంతో పెళ్లికి దారితీసింది. రెండేళ్ల క్రితం ఒక్కటైన ఈ దంపతులకు ఒక పాప కూడా జన్మించింది. సోషల్ మీడియాలో ఎంతో యాక్టివ్‌గా ఉంటూ తమ సంతోషకరమైన జీవితాన్ని పంచుకుంటున్న ఈ జంట జీవితంలో ఊహించని విషాదం చోటుచేసుకుంది.
భర్త రాజు తెలిపిన వివరాల ప్రకారం.. గత జూన్ నెలలో నాగమణి ఇంట్లో నుంచి వెళ్లి మళ్లీ తిరిగి రాలేదు. ఆమె అదృశ్యమైన సమయంలో వారి పసిపాప వయసు కేవలం నాలుగు నెలలు మాత్రమే. చిన్నారికి తల్లి పాలు అవసరం ఉన్న సమయంలో ఇలా భార్య అదృశ్యం కావడంతో రాజు తీవ్ర దిగ్భ్రాంతికి గురయ్యాడు. గతంలో కూడా చిన్నపాటి కారణాలకే వెళ్లి రెండు రోజుల్లో తిరిగొచ్చేదని భావించినా, ఈసారి నెలలు గడుస్తున్నా జాడ కానరాకపోవడంతో పోలీసులను ఆశ్రయించాడు. ఫిర్యాదు చేసి ఐదు నెలలు గడుస్తున్నా ఇప్పటివరకు ఎలాంటి ఆచూకీ లభించలేదు.
ఈ అదృశ్యం వెనుక కొన్ని బలమైన కారణాలు ఉన్నాయని బద్ధ రాజు అంటున్నాడు. హైదరాబాద్‌కు చెందిన నరసింహులు అనే వ్యక్తితో పరిచయం ఉందని, షేక్ ఇస్మాయిల్ అనే వ్యక్తి ఫోన్‌పే ద్వారా డబ్బులు పంపించేవాడని ఆయన ఆరోపిస్తున్నారు. మరోవైపు నాగమణి తల్లిదండ్రులు మాత్రం అత్తింటివారే కారణమని ఆరోపిస్తుండటంతో ఈ కేసు మరింత జటిలమైంది.
భార్యను ఎలాగైనా వెతికి పట్టుకోవాలనే తపనతో బద్ధ రాజు వినూత్న మార్గాన్ని ఎంచుకున్నాడు. నాగమణి ఆచూకీ కచ్చితంగా చెప్పిన వారికి రూ. 1,00,000 (లక్ష రూపాయల) బహుమతి అందజేస్తానని ఊరూరా పోస్టర్లు వేయించాడు. ప్రస్తుతం ఈ పోస్టర్లు సోషల్ మీడియాలో వైరల్ అవుతున్నాయి. పోలీసుల పూర్తి స్థాయి దర్యాప్తు ద్వారానే ఈ మిస్సింగ్ మిస్టరీ వీడాల్సి ఉంది.
