శ్రీశైలం డ్యామ్ వద్ద ఘోరం.. డ్యూటీలో ఉన్న కానిస్టేబుల్‌ను వెంటాడి చంపేశారు..! హంతకులు ఎవరంటే?

శ్రీశైలం డ్యామ్ రక్షణ విధుల్లో ఉన్న ఒక కానిస్టేబుల్ అనూహ్య రీతిలో మరణించడం అందరినీ షాక్‌కు గురిచేస్తోంది. శత్రువుల నుంచి డ్యామ్‌ను కాపాడే నిఘా విభాగంలో పనిచేస్తున్న ఆయన, ప్రకృతిలోని చిన్న జీవులైన తేనెటీగల దాడికి బలైపోవడం అత్యంత దారుణం. నంద్యాల జిల్లా శ్రీశైలం మండలం సున్నిపెంట పరిధిలోని డ్యామ్ వద్ద పిల్లి వీరస్వామి అనే ఎస్పీఎఫ్ కానిస్టేబుల్ విధుల్లో ఉన్నారు. జలాశయం లిఫ్ట్ ప్రాంతంలో ఆయన పహారా కాస్తున్న సమయంలో, ఎక్కడి నుంచి వచ్చాయో తెలియదు కానీ ఒక్కసారిగా తేనెటీగల గుంపు ఆయనపై దాడి చేశాయి. వాటి నుంచి తప్పించుకోవడానికి ఆయన శతవిధాలా ప్రయత్నించారు.

తేనెటీగలు కమ్ముకోవడంతో ప్రాణభయంతో పరుగులు తీసిన వీరస్వామి, ఆ ఆందోళనలో ఒక్కసారిగా కింద పడిపోయారు. వందలాది తేనెటీగలు ఆయనను కుట్టడంతో పాటు, ఆ తీవ్రమైన భయం కారణంగా ఆయనకు గుండెపోటు (Heart Attack) వచ్చినట్లు తెలుస్తోంది. పక్కనే ఉన్న తోటి సిబ్బంది వెంటనే స్పందించి ఆయనను సున్నిపెంట ప్రభుత్వ ఆసుపత్రికి తరలించారు. అయితే, ఆసుపత్రికి చేరేలోపే వీరస్వామి ప్రాణాలు విడిచారు. మృతుడు వీరస్వామి స్వగ్రామం బాపట్ల జిల్లా చీరాల సమీపంలో ఉంది. ఆయనకు భార్య, ఇద్దరు పిల్లలు ఉన్నారు. విధి నిర్వహణలో ఉన్న తండ్రి ఇక లేరన్న వార్త విన్న ఆ కుటుంబం కన్నీరుమున్నీరవుతోంది. సమాచారం అందుకున్న కుటుంబ సభ్యులు వెంటనే శ్రీశైలం బయలుదేరారు.

ఈ తేనెటీగల దాడిలో వీరస్వామితో పాటు ఉన్న మరో ఇద్దరు సిబ్బందికి కూడా గాయాలయ్యాయి. ప్రస్తుతం వారు చికిత్స పొందుతున్నారు. డ్యామ్ వంటి బహిరంగ ప్రదేశాల్లో ఇలాంటి ప్రమాదాలు జరగడం పట్ల తోటి ఉద్యోగులు ఆందోళన వ్యక్తం చేస్తున్నారు. వీరస్వామి మృతి పట్ల ఎస్పీఎఫ్ ఉన్నతాధికారులు సంతాపం వ్యక్తం చేశారు.

ఇవి కూడా చదవండి

హరీష్ రాణా కన్నుమూత.. కారుణ్య మరణం అనుమతి పొందిన తొలి భారతీయుడు!

వేసవిలో ఈ 5 ప్రదేశాలకు వెళ్తున్నారా?అయితే ఒక్క నిమిషం ఆలోచించండి!

వందే భారత్ రైలు జన్మస్థలం ఎక్కడో తెలుసా? మేక్ ఇన్ ఇండియా అద్భుతం

టెక్కీల అద్భుతం..సింగపూర్‌తో రూ.80 కోట్ల ఒప్పందం, ఆనంద్

మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి..