Chicken Prices: మళ్లీ పెరిగిన చికెన్, కోడి గ్రుడ్ల ధరలు.. వామ్మో.. ఒకేసారి ఎంతంటే..?

తెలుగు రాష్ట్రాల్లో చికెనె ధరలు భగ్గుమంటున్నాయి. తెలంగాణ, ఆంధ్రప్రదేశ్‌లలో చికెన్ ధరలు మళ్లీ కొండెక్కుతున్నాయి. నాన్‌వెజ్ ప్రియులకు ఇది బ్యాడ్‌న్యూస్‌గా చెప్పవచ్చు. గత వారంతో పోలిస్తే ఈ వారం చికెన్ ధరలు కిలోపై రూ.20 నుంచి రూ.30 వరకు పెరిగాయి. ఈ పెరుగుదలతో రాష్ట్రంలోని ప్రధాన నగరాల్లో చికెన్ ధరలు గణనీయంగా పెరిగాయి. గత వారంలో కిలో చికెన్ రూ.250 నుంచి రూ.260 వరకు ఉండగా.. ఇప్పుడు ఏకంగా రూ.290 వరకు చేరుకున్నాయి. ప్రస్తుత పెరుగుదల చూస్తుంటే.. కొద్ది రోజుల్లో రూ.300 క్రాస్ చేయనుందని చెప్పవచ్చు. త్వరలో దసరా, దీపావళి పండుగ రానన్న చికెన్ ధరలకు రెక్కలొస్తున్నాయి. రోజురోజుకి ధరలు పెరిగిపోతున్నాయి.  గత నెలలో తగ్గగా.. ఇప్పుడు పండుగ సీజన్ వస్తున్న క్రమంలో ధరలు సామాన్యులను బెంబేలెత్తిస్తున్నాయి. ప్రస్తుతం తెలుగు రాష్ట్రాల్లో చికెన్ ధరలు ఎలా ఉన్నాయో చూద్దాం.

ప్రస్తుతం హైదరాబాద్‌లో కిలో స్కిన్ లెస్ ధర రూ.287గా ఉండగా.. డ్రస్స్‌డ్ చికెన్ రూ.254, రిటైల్ లైవ్ బర్డ్ రూ.164, ఎక్స్ ఫారం లైవ్ బర్డ్ రూ.137 వద్ద కొనసాగుతోంది. ఇక కరీంనగర్ జోన్‌లో కూడా ఇవే ధరలు కొనసాగుతున్నాయి. అటు ఏపీలో కూడా చికెన్ ధరలు పెరిగాయి. విజయవాడ జోన్‌లో కిలో స్కిన్ లెస్ చికెన్ రూ.284 వద్ద కొనసాగుతుండగా.. డ్రస్స్‌డ్ చికెన్ ధర రూ.251గా ఉంది. ఇక రిటైల్ లైవ్ బర్డ్ రూ.162, ఫారం దగ్గర లైవ్ బర్డ్ రూ.135 వద్ద కొనసాగుతోంది.

కోడి గ్రుడ్ల ధరలు పెరిగాయ్..

ఇక చికెన్‌తో పాటు కోడి గ్రుడ్ల ధరలు కూడా పెరిగాయి. విజయవాడ జోన్‌లో 12 గ్రుడ్ల రిటైల్ ధర రూ.80గా ఉంది. ఇక హైదరాబాద్, కరీంనగర్ జోన్‌లో 12 గ్రుడ్ల రిటైల్ ధర రూ.74 వద్ద కొనసాగుతోంది.

ధరల పెరుగుదలకు కారణాలు

పౌల్ట్రీ ఉత్పత్తి, సరఫరాలో వచ్చిన వ్యత్యాసాలే ఈ ధరల పెరుగుదలకు ప్రధాన కారణమని వ్యాపారులు పేర్కొంటున్నారు. ఇప్పటికే నిత్యావసర వస్తువుల ధరల పెరుగుదలతో సతమతమవుతున్న సామాన్యులకు.. చికెన్ ధరల పెరుగుదల మరింత భారం మోపుతోంది. పండుగ సీజన్ క్రమంలో సాధారణంగా పెరిగే డిమాండ్, సరఫరాలో జాప్యం వంటి కారణాలతో ధరలు పెరుగుతున్నాయని విశ్లేషకులు చెబుతున్నారు. ఈ ధరల పెరుగుదల సామాన్యుల బడ్జెట్‌పై తీవ్ర ప్రభావం చూపుతోంది.