ఇరాన్ మైండ్ గేమ్‌తో బొక్క బోర్లాపడ్డ అమెరికా.. 10 వేల మంది సైనికులున్నా ఆగని నౌకలు!

హోర్ముజ్ జలసంధి వేదికగా జరుగుతున్న భౌగోళిక రాజకీయ యుద్ధంలో ఇరాన్ తన వ్యూహ చతురతతో అమెరికాను ఆత్మరక్షణలో పడేసింది. అమెరికా విధించిన కఠినమైన దిగ్బంధనాన్ని తుత్తునియలు చేస్తూ, ఇరాన్ తన వాణిజ్య ప్రభావాన్ని చాటుకుంటోంది.

హోర్ముజ్ జలసంధిని పూర్తిగా మూసివేసి ఇరాన్‌ను ఆర్థికంగా దెబ్బతీయాలని అమెరికా భావించింది. కానీ, దిగ్బంధనం ప్రారంభమైన మొదటి రోజే 10,000 మంది అమెరికా సైనికుల కళ్లెదుటే 20 భారీ నౌకలు ఆ మార్గం గుండా ప్రయాణించడం వాషింగ్టన్‌కు గట్టి షాక్ ఇచ్చింది. ఈ నౌకల్లో అధిక భాగం చైనా, లైబీరియాకు చెందినవి కావడం గమనార్హం.

ఇరాన్ తన వ్యూహంలో భాగంగా చైనాను కీలక భాగస్వామిగా మార్చుకుంది. ఇరాన్ మొదట చైనా నౌకలను ‘ఖేష్మ్’ ద్వీపానికి చేర్చి, అక్కడి నుండి సురక్షిత మార్గం గుండా తెలివిగా హోర్ముజ్ వెలుపలకు పంపిస్తోంది. చైనా నౌకలపై దాడి చేస్తే, ప్రతిచర్యగా దక్షిణ చైనా సముద్రంలో చైనా అలజడి సృష్టిస్తుందని అమెరికాకు తెలుసు. ప్రపంచ వాణిజ్యంలో 33% వాటా ఉన్న ఆ ప్రాంతంలో ఉద్రిక్తతలు అమెరికాకు కోలుకోలేని దెబ్బ. అందుకే, ఇరాన్ సరుకుతో వెళ్తున్న చైనా నౌకలను అమెరికా అడ్డుకోలేకపోతోంది.

ఇరాన్ తన సరుకు రవాణాలో ‘లోకేషన్ షిఫ్టింగ్’ అనే వినూత్న పద్ధతిని వాడుతోంది. ఉదాహరణకు, ‘అలీసియా’అనే ఓడ రికార్డుల ప్రకారం ఇరాక్ నుండి సరుకు తీసుకోవాల్సి ఉండగా, గుట్టుచప్పుడు కాకుండా ఇరాన్ నుండి సరుకును తరలించింది. ఇతర దేశాల జెండాలు ఉన్న నౌకలను వాడటం ద్వారా అమెరికా దాడుల నుండి ఇరాన్ తప్పించుకుంటోంది.

క్షీణిస్తున్న పట్టు, విఫలమవుతున్న క్షిపణి వ్యతిరేక దాడులు అమెరికాను ఆలోచనలో పడేశాయి. ఇరాన్ తన సైనిక వ్యవస్థను స్థానిక స్థాయిలో విభజించి అంతర్గత తిరుగుబాటు ముప్పును కూడా అడ్డుకుంది. ఈ పరిణామాల నేపథ్యంలో, అమెరికా అధ్యక్షుడు డొనాల్డ్ ట్రంప్ యుద్ధం త్వరలోనే ముగుస్తుందని, శాంతి చర్చలకు సిద్ధమని సంకేతాలిచ్చారు. అయితే, ఇక్కడ కూడా ఇరాన్ తన షరతులకే మొగ్గు చూపుతూ చర్చల పట్టికలో పైచేయి సాధించింది. మొత్తానికి, కేవలం ఆయుధ బలంతోనే కాకుండా, అంతర్జాతీయ వాణిజ్య చిక్కుముడులను వాడుకుని ఇరాన్ ఈ ‘హోర్ముజ్ యుద్ధం’లో అమెరికాను నిలువరించగలిగింది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..