భారత్-ఆస్ట్రేలియా స్నేహానికి భారతీయ సమాజమే బలమైన స్తంభం: ప్రధాని మోదీ

ఆస్ట్రేలియా పర్యటనలో భారత ప్రధానమంత్రి నరేంద్ర మోదీకి మెల్‌బోర్న్‌లో అఖండ స్వాగతం లభించింది. ప్రవాస భారతీయులు భారీ సంఖ్యలో పాల్గొన్న ‘మెల్‌బోర్న్ మీట్స్ మోదీ’ కార్యక్రమంలో ప్రధాని మోదీ భారత్-ఆస్ట్రేలియా సంబంధాలపై కీలక వ్యాఖ్యలు చేశారు. ఆస్ట్రేలియాలోని భారతీయ సమాజం రెండు దేశాల మధ్య స్నేహ బంధానికి ముఖ్యమైన శక్తిగా నిలుస్తోందని ఆయన పేర్కొన్నారు. భారత్-ఆస్ట్రేలియా మధ్య సంబంధాలు కేవలం ప్రభుత్వాల మధ్య మాత్రమే కాకుండా ప్రజల మధ్య అనుబంధంతో మరింత బలపడుతున్నాయని మోదీ వ్యాఖ్యలు స్పష్టం చేశాయి.

మెల్‌బోర్న్‌లోని మార్వెల్ స్టేడియంలో జరిగిన ఈ కార్యక్రమానికి దాదాపు 30 వేల మంది హాజరయ్యారు. ప్రవాస భారతీయుల ఉత్సాహం, మద్దతు కార్యక్రమానికి ప్రత్యేక ఆకర్షణగా నిలిచింది. ప్రధాని మోదీ తన ప్రసంగంలో భారతీయ సమాజాన్ని భారత్-ఆస్ట్రేలియా స్నేహానికి “బలమైన స్తంభాలలో ఒకటి”గా అభివర్ణించారు. “మెల్‌బోర్న్‌లోని భారతీయ సమాజం మధ్య ఉండటం ఎంతో ఉత్సాహంగా ఉంది. వారి శక్తి, ఉత్సాహం సాటిలేనివి. వారు భారత్-ఆస్ట్రేలియా స్నేహానికి కీలకమైన బలమైన స్తంభాలు” అని ప్రధాని మోదీ పేర్కొన్నారు.

ప్రసంగంలో ప్రధాని మోదీ క్రికెట్‌ను కూడా ప్రస్తావిస్తూ భారత్-ఆస్ట్రేలియా సంబంధాలను క్రీడతో పోల్చారు. మెల్‌బోర్న్ వంటి క్రీడా నగరంలో క్రికెట్ గురించి మాట్లాడకుండా ఉండటం సాధ్యం కాదని ఆయన సరదాగా వ్యాఖ్యానించారు. క్రికెట్ రెండు దేశాల మధ్య ఒక “దౌత్య భాష”గా మారిందని చెప్పారు. భారత్-ఆస్ట్రేలియా భాగస్వామ్యాన్ని క్రికెట్ ఫార్మాట్లతో పోల్చిన ప్రధాని, “మన సమావేశాల ఎజెండా వన్డే మ్యాచ్‌లా స్పష్టంగా ఉంటుంది. నిర్ణయాలు టీ20లా వేగంగా ఉంటాయి. మన భాగస్వామ్యం టెస్ట్ మ్యాచ్‌లా దీర్ఘకాలికంగా, బలంగా ఉంటుంది” అని అన్నారు. ఈ వ్యాఖ్యలకు ప్రేక్షకుల నుంచి పెద్ద ఎత్తున స్పందన లభించింది.

భారత్-ఆస్ట్రేలియా సంబంధాలు గత కొన్నేళ్లలో మరింత బలపడుతున్నాయని ప్రధానమంత్రి నరేంద్ర మోదీ అన్నారు. 2014లో 28 ఏళ్ల తర్వాత ఆస్ట్రేలియాలో పర్యటించిన తొలి భారత ప్రధానమంత్రి తానేనని గుర్తుచేసుకున్న మోదీ, తన తాజా పర్యటనను 12 ఏళ్లలో ‘హ్యాట్రిక్’ పర్యటనగా అభివర్ణించారు. భారత్-ఆస్ట్రేలియా సంబంధాలు ఎంత వేగంగా అభివృద్ధి చెందుతున్నాయో ఈ తరచు పర్యటనలు సూచిస్తున్నాయని అన్నారు. భారత్, ఆస్ట్రేలియాలను దగ్గర చేయడంలో తన పాత్ర కంటే ప్రవాస భారతీయుల పాత్ర మరింత గొప్పదని ప్రధాని మోదీ ప్రశంసించారు. ప్రపంచవ్యాప్తంగా భారతీయ సమాజం తమ కృషి, సేవల ద్వారా భారతదేశ ప్రతిష్టను పెంచుతోందని అన్నారు.

ఈ సందర్భంగా ఆస్ట్రేలియా ప్రధానమంత్రి ఆంథోనీ అల్బనీస్‌కు మోదీ ప్రత్యేకంగా ధన్యవాదాలు తెలిపారు. అల్బనీస్‌ను “భారతదేశానికి మంచి మిత్రుడు”గా అభివర్ణించారు. ఆయనతో కలిసి ఈ కార్యక్రమంలో పాల్గొనడం ఎంతో ప్రత్యేకమైన అనుభూతిని ఇచ్చిందని అన్నారు. అహ్మదాబాద్‌లోని నరేంద్ర మోదీ స్టేడియం నుంచి మెల్‌బోర్న్‌లోని ప్రసిద్ధ క్రికెట్ వేదిక వరకు ఇద్దరు నాయకులు కలిసి ఎన్నో గుర్తుండిపోయే క్షణాలను పంచుకున్నారని ప్రధాని పేర్కొన్నారు. భారతీయ సమాజాన్ని ఉద్దేశించి అల్బనీస్ చేసిన ప్రసంగాన్ని కూడా ఆయన ప్రశంసించారు.

ఈ సందర్భంగా ‘ఆపరేషన్ సింధూర్’ను ప్రస్తావిస్తూ, ఉగ్రవాద శిబిరాలపై భారతదేశం జరిపిన దాడుల ప్రభావం దాని సరిహద్దులకు ఆవల కూడా చాలా దూరం వరకు వ్యాపించిందని అన్నారు. ఉగ్రవాద శిబిరాలలో జరిగిన పేలుళ్లు “ప్రపంచవ్యాప్తంగా ప్రతిధ్వనించాయని”, ఉగ్రవాదంపై దృఢంగా వ్యవహరించడానికి, తన జాతీయ భద్రతను కాపాడటానికి భారతదేశానికి ఉన్న సంకల్పాన్ని ఇది స్పష్టం చేస్తుందని ఆయన అన్నారు.

దేశం ఒక అభివృద్ధి చెందిన దేశంగా మారే దిశగా స్థిరంగా పయనిస్తోందని ప్రధాని మోదీ అన్నారు. ప్రతి విజయం మరింత పెద్ద ఆశయాలకు దారితీస్తుందని, ఆధునిక భారతదేశం ‘మరింత ఎదగండి, మరింత సాధించండి’ అనే నినాదాన్ని విశ్వసిస్తుందని ఆయన అన్నారు. భారతదేశాన్ని 140 కోట్ల ఆకాంక్షల దేశంగా అభివర్ణిస్తూ, దేశ ప్రజల కలలు, సంకల్పమే దేశ పురోగతికి చోదకశక్తిగా ఉందని మోదీ అన్నారు.

అభివృద్ధి చెందిన భారతదేశ నిర్మాణమే కేంద్ర ప్రభుత్వ లక్ష్యమని ప్రధాని మోదీ స్పష్టం చేశారు. జాతీయ భద్రత, ఆర్థికాభివృద్ధి పరస్పర అనుసంధానమైన అంశాలని పేర్కొన్న ఆయన, గత విజయాలతో సంతృప్తి చెందకుండా మరింత ఉన్నత లక్ష్యాలతో భారత్ ముందుకు సాగుతోందని చెప్పారు. “మరింత అభివృద్ధి చెందండి.. మరింత సాధించండి” అనే దృక్పథంతో దేశం కొత్త పారిశ్రామిక పునాదిని నిర్మిస్తోందని ప్రధాని తెలిపారు. చిప్స్ నుంచి ఓడల వరకు విస్తరించిన ఆధునిక తయారీ పర్యావరణ వ్యవస్థను భారత్ రూపొందిస్తోందని, ప్రపంచ తయారీ కేంద్రంగా ఎదగడానికి వేగంగా అడుగులు వేస్తోందని అన్నారు.

అంతరిక్ష రంగంలో భారత్ సాధించిన విజయాలను ప్రస్తావించిన ప్రధాని మోదీ, చంద్రయాన్-3 విజయాన్ని దేశ సామర్థ్యానికి నిదర్శనంగా అభివర్ణించారు. చంద్రుని దక్షిణ ధ్రువ ప్రాంతానికి సమీపంలో విజయవంతంగా ల్యాండింగ్ చేసిన తొలి దేశంగా భారత్ చరిత్ర సృష్టించిందని గుర్తు చేశారు. ఇప్పుడు గగన్‌యాన్ మిషన్ ద్వారా భారతీయ వ్యోమగాములను అంతరిక్షంలోకి పంపేందుకు దేశం సిద్ధమవుతోందని, భవిష్యత్తులో స్వంత అంతరిక్ష కేంద్రాన్ని ఏర్పాటు చేయడమే లక్ష్యమని వెల్లడించారు.

సాంకేతిక రంగంలోనూ భారత్ వేగంగా పురోగమిస్తోందని ప్రధాని పేర్కొన్నారు. ఇప్పటికే 6జీ టెక్నాలజీపై పరిశోధనలు కొనసాగుతున్నాయని, భవిష్యత్ అవసరాలకు అనుగుణంగా దేశం పెట్టుబడులు పెడుతోందని చెప్పారు. సాంకేతికత, ఆవిష్కరణలే అభివృద్ధి చెందిన భారతదేశానికి పునాది అవుతాయని అన్నారు. భారతదేశ ఆర్థిక పరివర్తనకు 140 కోట్ల మంది ప్రజలే అసలైన బలమని ప్రధాని మోదీ చెప్పారు. దేశ ప్రజల ఆశయాలు, సమిష్టి సంకల్పమే భారత ప్రగతిని ముందుకు నడిపిస్తున్నాయని ఆయన పేర్కొన్నారు. “మన గొప్ప కలలకు, ఉన్నత ఆకాంక్షలకు ప్రజలే పునాది” అని వ్యాఖ్యానించారు.

ప్రపంచవ్యాప్తంగా భారతీయ సంస్కృతి ప్రభావం మరింత విస్తరిస్తోందని ప్రధాని మోదీ అన్నారు. మెల్‌బోర్న్‌లో జరగనున్న ఇండియన్ ఫిల్మ్ ఫెస్టివల్ నిర్వాహకులకు శుభాకాంక్షలు తెలియజేస్తూ, భారతీయ సినిమా ప్రపంచ వేదికపై దేశ ప్రతిష్టను మరింత పెంచుతోందని పేర్కొన్నారు. ప్రవాస భారతీయుల పాత్రను ప్రశంసిస్తూ, భారతీయులు ప్రతి సమాజంలో పాలలో పంచదారలా కలిసిపోతారని మోదీ ఆసక్తికర ఉపమానం ఇచ్చారు. “మనం భారతీయులం పాలలో చక్కెర లాంటివాళ్లం.. ఎక్కడ ఉన్నా ఆ సమాజాన్ని మరింత మధురంగా మారుస్తాం” అని అన్నారు. పాలు ఆస్ట్రేలియావైనా, టీ భారతీయమని.. కూరగాయలు ఆస్ట్రేలియావైనా, వాటికి రుచి తెచ్చేది భారతీయ మసాలాలేనని చమత్కరించారు. అభివృద్ధి చెందిన భారతదేశ నిర్మాణంలో తయారీ, సాంకేతికత, అంతరిక్ష పరిశోధనలు, ప్రజల భాగస్వామ్యం ప్రధాన పాత్ర పోషిస్తాయని ప్రధాని మోదీ స్పష్టం చేశారు.

ఆస్ట్రేలియా ప్రధానమంత్రి ఆంథోనీ అల్బనీస్ కూడా కార్యక్రమంలో పాల్గొని భారత్‌తో సంబంధాలపై ప్రశంసలు కురిపించారు. రెండు దేశాల మధ్య భాగస్వామ్యం శక్తి, ఆశావాదంతో ముందుకు సాగుతోందని ఆయన అన్నారు. మెల్‌బోర్న్ కార్యక్రమంలో కనిపించిన ఉత్సాహం భారత్-ఆస్ట్రేలియా బంధం బలాన్ని ప్రతిబింబిస్తోందని పేర్కొన్నారు. భారతీయ ప్రవాసుల సేవలు, కృషి వల్ల ఆస్ట్రేలియా మరింత మెరుగైన దేశంగా మారిందని అన్నారు. 1991లో తాను బ్యాక్‌ప్యాకర్‌గా భారత్‌కు చేసిన తొలి పర్యటనను కూడా ఆయన గుర్తుచేసుకున్నారు. ఆ సమయంలో భారతీయుల నుంచి పొందిన ఆతిథ్యం, ఆప్యాయతను ప్రస్తావించారు. విక్టోరియా రాష్ట్ర ముఖ్యమంత్రి జసింటా అలెన్ ప్రధాని మోదీకి స్వాగతం పలుకుతూ భారత్‌ను ప్రశంసించారు. “భారతదేశం మనం వ్యాపారం చేసే దేశం మాత్రమే కాదు, మనం విశ్వసించే దేశం” అని ఆమె అన్నారు.

మెల్‌బోర్న్‌లో జరిగిన భారీ జనసమూహాన్ని చూసి ప్రధాని మోదీ ఉత్సాహంగా స్పందించారు. ఈ కార్యక్రమాన్ని “హౌస్‌ఫుల్ షో”, “బ్లాక్‌బస్టర్”గా అభివర్ణించారు. సిడ్నీలో గతంలో ప్రవాస భారతీయులతో జరిగిన సమావేశాలను గుర్తుచేసుకున్న ఆయన, మెల్‌బోర్న్ ప్రజలను కలవాలని చాలా కాలంగా ఎదురుచూస్తున్నానని తెలిపారు. ప్రసంగం ప్రారంభంలో ఆ భూమి, సంప్రదాయ యజమానులను గౌరవిస్తూ, వారి పూర్వీకులు, ప్రస్తుత తరం, భవిష్యత్ తరాలకు తన గౌరవాన్ని తెలియజేశారు. ఈ వ్యాఖ్యలకు సభికుల నుంచి పెద్ద ఎత్తున స్పందన లభించింది.మెల్‌బోర్న్‌లోని భారతీయ సమాజం చూపించిన ఉత్సాహాన్ని ప్రధాని మోదీ ప్రత్యేకంగా ప్రశంసించారు. వారి శక్తి, సహకారం భారత్-ఆస్ట్రేలియా స్నేహానికి బలమైన పునాదిగా నిలుస్తున్నాయని అన్నారు. ఈ పర్యటనలో ప్రధాని మోదీ, ఆంథోనీ అల్బనీస్ మధ్య ద్వైపాక్షిక సంబంధాలు, వాణిజ్యం, వ్యూహాత్మక భాగస్వామ్యం వంటి అంశాలపై చర్చలు జరిగాయి. మెల్‌బోర్న్ కార్యక్రమం భారత్-ఆస్ట్రేలియా ప్రజల మధ్య పెరుగుతున్న అనుబంధానికి ప్రతీకగా నిలిచింది.

Excited to be among the Indian community in Melbourne. Their energy and enthusiasm are truly unmatched. They are one of the strongest pillars of India-Australia friendship. https://t.co/dG9F5vj5jr

— Narendra Modi (@narendramodi) July 9, 2026

మరిన్ని అంతర్జాతీయ వార్తల కోసం ఇక్కడ క్లిక్ చేయండి..