ఇక్కడ పాక్ దుమ్ము దులుపుతున్న భారత్.. అక్కడ BLA యోధుల మెరుపు దాడి!

భారతదేశంతో తూర్పు సరిహద్దులో ఉద్రిక్తత మధ్య, పాకిస్తాన్ ఇప్పుడు పశ్చిమ సరిహద్దులో కూడా తీవ్రమైన సంక్షోభాన్ని ఎదుర్కొంటోంది. బలూచిస్తాన్‌లో స్వాతంత్ర్యం కోరుతూ బలూచ్ తిరుగుబాటుదారులు పాకిస్తాన్ భద్రతా దళాలపై దాడులను ముమ్మరం చేశారు. బలూచిస్తాన్‌లోని ఐదు చోట్ల BLA యోధులు పాకిస్తాన్ సైన్యంపై మెరుపు దాడి చేశారు. BLA దాడి చేసిన పాక్ ఆర్మీ స్థావరాలలో క్వెట్టా, ఉతల్, సోహ్‌బత్‌పూర్, పంజ్‌గుర్ ఉన్నాయి. మీడియా కథనాల ప్రకారం, కనీసం మూడు ప్రధాన సాయుధ బలూచ్ గ్రూపులు ప్రావిన్స్‌లోని అనేక ప్రాంతాలపై నియంత్రణను ప్రకటించుకున్నాయి.

గత రెండు రోజులుగా బలూచిస్తాన్‌లో పాకిస్తాన్ సైన్యం, తిరుగుబాటు గ్రూపుల మధ్య జరిగిన ఘర్షణల సందర్భంగా అనేక పేలుళ్లు, కాల్పుల సంఘటనలు సంభవించాయి. సోషల్ మీడియాలో షేర్ అవుతున్న చిత్రాలు, వీడియోలలో, పాకిస్తాన్ జాతీయ జెండాను తొలగించి, బలూచ్ జెండాను చాలా చోట్ల ఎగురవేశారు. శుక్రవారం(మే 09), బలూచ్ తిరుగుబాటుదారులు క్వెట్టాలో ఫైజాబాద్ ప్రాంతంలో పాకిస్తాన్ ఆర్మీ కాన్వాయ్‌పై దాడి చేయగా, సిబిలోని ఆర్మీ క్యాంప్‌పై గ్రెనేడ్‌లతో దాడి చేశారు. గురువారం నాడు, క్వెట్టాలో నాలుగు వేర్వేరు ప్రదేశాలలో గుర్తు తెలియని సాయుధ దుండగులు దాడులు చేశారు.

బలూచిస్తాన్ స్థానిక మీడియా కథనాల ప్రకారం.. ‘రేడియో జ్రుంబేష్ ఇంగ్లీష్’ ప్రకారం, బలూచ్ లిబరేషన్ ఆర్మీ (BLA) పాకిస్తాన్ దళాలు, వారి మిత్రదేశాలను లక్ష్యంగా చేసుకుని కెచ్, మస్తుంగ్, కాచిలలో కనీసం ఆరు మెరుపు దాడులు నిర్వహించింది. ఈ మేరకు బలూచ్ రచయిత మీర్ యార్ బలూచ్ సోషల్ మీడియా X ఖాతాలో పేర్కొన్నారు. బలూచ్ ప్రజలు ఇప్పుడు తమ సొంత జెండాలను ఎగురవేసి పాకిస్తాన్ జెండాలను తొలగిస్తున్నారన్నారు. ప్రపంచం తమ దౌత్య కార్యకలాపాలను పాకిస్తాన్ నుండి ఉపసంహరించుకుని స్వతంత్ర బలూచిస్తాన్‌కు తరలించాల్సిన సమయం ఆసన్నమైందని మీర్ యార్ బలూచ్ పేర్కొన్నారు.

పాకిస్తాన్ ప్రభుత్వం, పాక్ సైన్యం బలూచిస్తాన్ పై నియంత్రణ కోల్పోతున్నాయని పాకిస్తాన్ మాజీ ప్రధాన మంత్రి షాహిద్ ఖాకాన్ అబ్బాసి చేసిన ప్రకటన తర్వాత ఈ దాడులు జరిగాయి. భద్రతా దళాలు లేకుండా సీనియర్ ప్రభుత్వ అధికారులు బలూచిస్తాన్‌లో ప్రయాణించలేరని కూడా ఆయన అన్నారు. ఇదిలావుంటే, కెచ్ జిల్లాలోని దష్టుక్ ప్రాంతంలో బిఎల్‌ఎ ఉగ్రవాదులు రిమోట్ కంట్రోల్డ్ ఐఇడితో పాకిస్తాన్ సైన్యానికి చెందిన బాంబు నిర్వీర్యం బృందాన్ని లక్ష్యంగా చేసుకుని దాడి చేసి ఒక సైనికుడిని చంపారు.

భారతదేశం చేపట్టిన ఆపరేషన్ సింధూర్‌కు పాకిస్తాన్ ప్రతిస్పందించడంలో బిజీగా ఉన్న సమయంలో ఈ సంఘటన జరిగింది. ఈ ఆపరేషన్ కింద, పాకిస్తాన్ ఆక్రమిత కాశ్మీర్ (POK)లోని ఉగ్రవాద స్థావరాలపై భారతదేశం లక్ష్యంగా దాడులు నిర్వహించింది. అప్పటి నుండి, పాకిస్తాన్ అనేక డ్రోన్, రాకెట్ దాడులను విఫలం చేసింది.

మరిన్ని అంతర్జాతీయ వార్తల కోసం ఇక్కడ క్లిక్ చేయండి..