వేడెక్కుతున్న భూమి..ధనిక దేశాలకు పట్టదా? ఐరాస సీరియస్!

మన భూగోళంలో ఊహకందని రీతిలో ఉష్ణోగ్రతలు పెరుగుతున్నాయి. ప్రమాద ఘంటికలు దగ్గరపడ్డాయి.  ఉష్ణోగ్రతలు 1.5 డిగ్రీలు దాటిపోయే సమయాన్ని వీలైనంత తక్కువగా, చిన్నదిగా మార్చడమే ఇప్పుడు మన ముందున్న లక్ష్యమని ఐరాస ప్రధాన కార్యదర్శి ఆంటోనియో గుటెర్రెస్ తెలిపారు. ఈ వేసవిలో నమోదైన వేడి, ఉక్కపోత, భయానక అడవుల కార్చిచ్చు, ఆకస్మిక వరదలే భవిష్యత్తులో భూమి ఎంత వేడిగా మారబోతోందో చెప్పే శాంపిల్ అని ఆందోళన వ్యక్తం చేశారు. కేవలం 1.5 డిగ్రీలు దాటడమంటే ప్రపంచం అంతం అవుతుందని కాదని, అయితే ప్రతి అర డిగ్రీ పెరుగుదల మానవాళిపై తీవ్ర ప్రభావం చూపుతుందని అన్నారు.

ఒకవేళ భూమి వేడి ఇలాగే పెరిగి 1.8 డిగ్రీలకు చేరుకుంటే మాత్రం మళ్లీ ఎప్పటికీ బాగుచేసుకోలేని పెద్ద నష్టమే వస్తుంది. విపరీతమైన తుపానులు, వర్షాలు, కరువు, తినడానికి తిండి, తాగడానికి మంచి నీళ్లు కూడా దొరకని కష్టకాలం వస్తుందని గట్టిగా హెచ్చరించారు. మంచు కొండలు కరిగి సముద్ర నీరు పొంగిపొర్లడంతో, సముద్ర తీరాల్లో నివసించే లక్షలాది మంది ప్రజలు ఇళ్లు కోల్పోయి శరణార్థులుగా మారే ప్రమాదం ఉంది. అంతేకాదు, ప్రపంచంలోనే అత్యంత ముఖ్యమైన అమెజాన్ అడవులు పూర్తిగా దెబ్బతినడం, సముద్రంలోని నీటి ప్రవాహాల తీరు మారడం వంటి పెనుమార్పులు సంభవించే అవకాశం ఉందని ఐరాస నివేదిక హెచ్చరిస్తోంది.