ఇజ్రాయెల్‌కు వెళ్లే విమానాల్లో పాక్ పైలట్లు.. దెబ్బకు వెనక్కి వచ్చిన విమానం!

2026 సెప్టెంబర్ 30న దుబాయ్ నుంచి టెల్ అవీవ్‌కు వెళ్తున్న ఫ్లై దుబాయ్ విమానంలో జరిగిన ఘటన తర్వాత ఇజ్రాయెల్ అధికారులు ఈ నిబంధనల అమలును మరింత కఠినతరం చేసినట్లు సమాచారం. ఆ విమానంలో ఒమన్‌కు చెందిన కో-పైలట్ భారతీయ కెప్టెన్‌పై దాడి చేసి, విమాన నియంత్రణను తన ఆధీనంలోకి తీసుకునేందుకు ప్రయత్నించినట్లు ఆరోపణలు వచ్చాయి. ఒమన్‌కు ఇజ్రాయెల్‌తో దౌత్య సంబంధాలు లేవు. ఈ ఘటన నేపథ్యంలో ఇజ్రాయెల్‌కు విమానాలు నడిపే విదేశీ విమానయాన సంస్థలు తమ సిబ్బంది జాతీయతకు సంబంధించిన నిబంధనలను మరింత జాగ్రత్తగా పరిశీలిస్తున్నట్లు తెలుస్తోంది. ఫ్రెంచ్ పరిశోధనాత్మక మీడియా సంస్థ మెడియాపార్ట్, విమానయాన సమాచార సంస్థ సీహెచ్-ఏవియేషన్ అక్టోబర్ 13న ప్రచురించిన నివేదికల ప్రకారం.. ఎయిర్ ఫ్రాన్స్, యునైటెడ్ ఎయిర్‌లైన్స్ తమ పైలట్లు, క్యాబిన్ సిబ్బందికి ఈ ఆంక్షల గురించి సమాచారం అందించాయి. ఇజ్రాయెల్ నిబంధనలకు అనుగుణంగా వ్యవహరిస్తున్నట్లు ఎయిర్ ఫ్రాన్స్ ధ్రువీకరించగా, యునైటెడ్ ఎయిర్‌లైన్స్ సిబ్బంది విధుల కేటాయింపు ప్రక్రియలో ఈ నిబంధనలను చేర్చినట్లు నివేదికలు పేర్కొన్నాయి.

పైలట్ జాతీయతతో వెనుదిరిగిన ఇథియోపియన్ ఎయిర్‌లైన్స్ విమానం

ఇజ్రాయెల్ నిబంధనల ప్రభావం ఇటీవల మరో ఘటనలో స్పష్టమైంది. మంగళవారం ఇథియోపియన్ ఎయిర్‌లైన్స్‌కు చెందిన ఓ విమానంలో ఇండోనేషియా పైలట్ ఉన్నట్లు గుర్తించిన ఇజ్రాయెల్ అధికారులు, ఆ విమానాన్ని వెనక్కి మళ్లించాలని ఆదేశించినట్లు సమాచారం. ది జెరూసలేం పోస్ట్ కథనం ప్రకారం.. విమానం ప్రయాణం ప్రారంభించి సుమారు గంట గడిచింది. అప్పటికీ అది ఇథియోపియా గగనతలంలోనే ఉంది. ఈ సమయంలో ఇజ్రాయెల్ అధికారుల నుంచి వెనక్కి వెళ్లాలనే ఆదేశాలు అందాయి. దీంతో విమానం ఇథియోపియా రాజధాని అడిస్ అబాబాకు తిరిగి వెళ్లింది. అక్కడ ఇండోనేషియా పైలట్ స్థానంలో మరో పైలట్‌ను నియమించారు. అనంతరం విమానం మళ్లీ బయలుదేరి టెల్ అవీవ్‌లో దిగింది. ముస్లింలు అధికంగా ఉండే ఇండోనేషియాకు ఇజ్రాయెల్‌తో దౌత్య సంబంధాలు లేవు. ఈ నేపథ్యంలో ఆ దేశ పౌరులు కూడా సంబంధిత ఆంక్షల పరిధిలోకి వస్తున్నారు. అయితే తమ విమానం విషయంలో జరిగిన పరిణామాన్ని ఇథియోపియన్ ఎయిర్‌లైన్స్ పొరపాటుగా అభివర్ణించింది. ఇజ్రాయెల్‌కు వెళ్లే విమానాల్లో విధులు నిర్వహించేందుకు ఆ పైలట్‌కు అనుమతి లేదనే విషయం తమకు ముందుగా తెలియదని సంస్థ తెలిపినట్లు నివేదిక పేర్కొంది.

31 దేశాల పౌరులపై ఆంక్షలు?

మెడియాపార్ట్, ఇజ్రాయెల్ మీడియా నివేదికల ప్రకారం.. ముస్లింలు అధికంగా ఉండే 31 దేశాలకు చెందిన పౌరులపై ఈ పరిమితులు వర్తిస్తున్నాయి. ఈ జాబితాలో పాకిస్థాన్, ఇరాన్, ఒమన్, సౌదీ అరేబియా, అల్జీరియా, ట్యునీషియా, బంగ్లాదేశ్, అఫ్గానిస్థాన్, ఇరాక్, లెబనాన్, నైజర్ తదితర దేశాలు ఉన్నట్లు సమాచారం. ఈ ఆంక్షలు పైలట్లు, క్యాబిన్ సిబ్బందికి వర్తిస్తాయి. సంబంధిత దేశాల పౌరసత్వం కలిగినవారు, ద్వంద్వ పౌరసత్వం ఉన్నవారు కూడా వీటి పరిధిలోకి వస్తారని నివేదికలు వెల్లడించాయి. ఇజ్రాయెల్ రవాణా, రహదారి భద్రత మంత్రిత్వ శాఖ అక్టోబర్ 1న విదేశీ విమానయాన సంస్థలకు ఈ నిబంధనల గురించి తెలియజేసినట్లు ఇజ్రాయెల్ ప్రసార సంస్థ ఎన్12 పేర్కొంది. ఈ ఆంక్షలు సెప్టెంబర్ 30న ఫ్లై దుబాయ్ విమానంలో జరిగిన ఘటనకు ముందే అమల్లో ఉన్నప్పటికీ, గతంలో వాటిని ఇంత కఠినంగా అమలు చేయలేదని నివేదికలు చెబుతున్నాయి. ఇప్పటివరకు విదేశీ విమానయాన సంస్థలే సంబంధిత దేశాల సిబ్బందిని ఇజ్రాయెల్‌కు వెళ్లే విమానాల్లో నియమించకుండా చూసుకుంటాయని అధికారులు భావించినట్లు సమాచారం.

అయితే ఇటీవల జరిగిన పరిణామాల నేపథ్యంలో ఇజ్రాయెల్ అధికారులు మరింత కఠినంగా వ్యవహరిస్తున్నట్లు తెలుస్తోంది. దీంతో విమానయాన సంస్థలు తమ సిబ్బంది జాతీయతను పరిశీలించి, నిబంధనలకు అనుగుణంగా విధులు కేటాయించాల్సిన పరిస్థితి ఏర్పడింది. ఇజ్రాయెల్ నిబంధనలపై తమ ఉద్యోగులకు ఎయిర్ ఫ్రాన్స్ సమాచారం అందించింది. సంబంధిత నిబంధనలను పాటిస్తున్నట్లు ఖతార్‌లోని దోహా కేంద్రంగా పనిచేసే అల్ జజీరా వార్తా సంస్థకు వెల్లడించింది. ‘విమానయాన సంస్థలు తమ విమానాలు రాకపోకలు సాగించే దేశాల ప్రవేశ నిబంధనలను కస్టమర్లతో పాటు ఉద్యోగుల విషయంలోనూ తప్పనిసరిగా పాటించాలి’ అని ఎయిర్ ఫ్రాన్స్ పేర్కొన్నట్లు అల్ జజీరా తెలిపింది. టెల్ అవీవ్‌కు వెళ్లే విమానాల కోసం ఇజ్రాయెల్ అధికారులు ప్రవేశపెట్టిన కొత్త నిబంధనల గురించి సంబంధిత ఉద్యోగులకు సమాచారం అందించినట్లు సంస్థ వెల్లడించింది. అంతేకాకుండా ఉద్యోగులు తమకు రెండో పౌరసత్వం ఉంటే ఆ వివరాలను కూడా వెల్లడించాలని ఎయిర్ ఫ్రాన్స్ సూచించినట్లు మెడియాపార్ట్ నివేదించింది. ఈ వివరాలను వెల్లడించకపోతే క్రమశిక్షణా చర్యలు తీసుకునే అవకాశం ఉందని హెచ్చరించినట్లు పేర్కొంది.

అయితే సిబ్బంది స్వచ్ఛందంగా తమ రెండో పౌరసత్వ వివరాలను వెల్లడించే విధానాన్ని ప్రవేశపెట్టాలనే ప్రతిపాదనను విమాన సిబ్బంది సంఘం ఆల్టర్ వ్యతిరేకించినట్లు సమాచారం. జాతీయత ఆధారంగా ఇలాంటి వివరాలు కోరడం వివక్షకు దారితీస్తుందని ఆ సంఘం తన సభ్యులకు పంపిన ప్రకటనలో అభిప్రాయపడినట్లు నివేదిక పేర్కొంది. అమెరికాకు చెందిన యునైటెడ్ ఎయిర్‌లైన్స్ కూడా తమ పైలట్లు, క్యాబిన్ సిబ్బందికి ఈ ఆంక్షల గురించి సమాచారం అందించింది. సంబంధిత దేశాలకు చెందిన ఉద్యోగులు తమకు కేటాయించిన విధుల్లో మార్పులు చేసుకోవాల్సి రావచ్చని సూచించినట్లు నివేదికలు వెల్లడించాయి. ఇజ్రాయెల్‌కు వెళ్లే, అక్కడి నుంచి వచ్చే విమానాల్లో ఆంక్షల పరిధిలోకి వచ్చే సిబ్బందిని నియమించకుండా ఉండేందుకు సంస్థ తన సిబ్బంది విధుల ప్రణాళికా వ్యవస్థలో ఈ నిబంధనలను చేర్చుతోంది. ఆంక్షలు వర్తించే దేశాల జాబితా పూర్తిస్థాయిలో ఉండకపోవచ్చని ఉద్యోగులకు పంపిన అంతర్గత సమాచారంలో హెచ్చరించినట్లు కూడా నివేదికలు పేర్కొన్నాయి. చెక్ రిపబ్లిక్‌లో అతిపెద్ద విమానయాన సంస్థగా పేరొందిన స్మార్ట్‌వింగ్స్ కూడా ఇజ్రాయెల్ నిబంధనలను పాటిస్తామని స్పష్టం చేసింది. అయితే, ఇప్పటివరకు తమ విమానాల నిర్వహణ లేదా సిబ్బంది విధుల కేటాయింపుపై ఎలాంటి ప్రభావం పడలేదని తెలిపినట్లు సమాచారం.

జాతీయత ఆధారంగా విధిస్తున్న ఆంక్షల కారణంగా విమానయాన సంస్థలు సిబ్బంది నియామకం, విధుల కేటాయింపు, అంతర్జాతీయ మార్గాల్లో విమానాల నిర్వహణ వంటి అంశాలను మరింత జాగ్రత్తగా పరిశీలించాల్సి వస్తోంది. ఒకే విమానయాన సంస్థలో వివిధ దేశాలకు చెందిన పైలట్లు, క్యాబిన్ సిబ్బంది పనిచేస్తుంటారు. అలాంటి పరిస్థితుల్లో ప్రతి దేశానికి సంబంధించిన ప్రవేశ నిబంధనలను పాటిస్తూ సిబ్బందిని కేటాయించడం సంస్థలకు అదనపు సవాలుగా మారవచ్చు. ముఖ్యంగా ద్వంద్వ పౌరసత్వం ఉన్న ఉద్యోగుల విషయంలోనూ పరిమితులు వర్తిస్తాయని నివేదికలు పేర్కొనడంతో, సిబ్బంది వ్యక్తిగత వివరాల సేకరణ, గోప్యత, జాతీయత ఆధారంగా వివక్ష వంటి అంశాలపై చర్చకు అవకాశం ఏర్పడింది. అయితే ఈ ఆంక్షల వల్ల అన్ని అంతర్జాతీయ విమానాలపై ప్రభావం పడుతుందని చెప్పలేం. ప్రస్తుతం ప్రధానంగా ఇజ్రాయెల్‌కు రాకపోకలు సాగించే విమానాల్లో సిబ్బంది కేటాయింపులపైనే ఈ నిబంధనలు ప్రభావం చూపుతున్నట్లు నివేదికలు సూచిస్తున్నాయి.