పల్లె పడతులు వర్సెస్‌ పట్నం భామలు..సై అంటే సై..!

మరోవైపు మహిళల బాహుబలాన్ని పరీక్షించేలా ‘ఇటుక మోసే పోటీ’ సాగింది. మోచేయి వంచకుండా, కేవలం ఒక చేత్తో బరువైన ఇటుకను పట్టుకుని మహిళలు తమ పట్టుదలను ప్రదర్శించారు. పట్నం సోకులు.. పల్లెటూరి పట్టుదల మధ్య సాగిన ఈ పోటీలో ఎవరు ఎక్కువ సేపు నిలబడతారో అని గ్రామస్తులంతా ఉత్కంఠగా తిలకించారు. ఇక అసలైన సమరం తాడులాగుడు దగ్గర మొదలైంది పట్టణ మహిళలు ఒక జట్టుగా, పల్లెటూరి మహిళలు మరో జట్టుగా విడిపోయి.. ‘గెలుపు మాదంటే మాదే’ అంటూ తాడును లాగారు. పోటీదారులను ఉత్సాహపరుస్తూ స్థానికులు చేసిన కేరింతలు, ఈలలతో అంబడిపూడి వీధులన్నీ మార్మోగిపోయాయి. పట్నం నుంచి వచ్చిన వారు తమ హోదాను పక్కనపెట్టి, పల్లెటూరి మట్టిలో కలిసి ఆడుతూ నిజమైన సంక్రాంతి ఆనందాన్ని పొందారు. విజేతలకు నిర్వాహకులు బహుమతులు అందజేశారు.