లక్ష జీతం.. అయినా సరదా కోసం ర్యాపిడో బైక్ నడుపుతున్న సాఫ్ట్‌వేర్ ఇంజనీర్లు! స్టోరీ విన్నారంటే..
మంచి ఉద్యోగం, లక్షల్లో జీతం ఉంటే ఎవరైనా హాయిగా ఆఫీసులో కూర్చుని పని చేయాలని చూస్తారు. కానీ, పుణెకు చెందిన కొందరు సాఫ్ట్‌వేర్ ఇంజనీర్లు మాత్రం ఇందుకు భిన్నంగా ఆలోచించారు. ఏడాదికి రూ. 12 లక్షలకు పైగా వేతనం అందుకుంటున్న ఇద్దరు యువకులు, కేవలం సరదా కోసం ర్యాపిడో బైక్ ట్యాక్సీ నడపడం ప్రారంభించారు. ఈ అసాధారణ ఉదంతాన్ని వారి స్నేహితుడు సోషల్ మీడియాలో పంచుకోవడంతో, ప్రస్తుతం ఈ ఫన్నీ, వైరల్ స్టోరీ నెట్టింట తెగ హల్‌చల్ చేస్తోంది.
Updated on: Oct 13, 2026 | 3:24 PM
ప్రస్తుత రోజుల్లో మంచి ఉద్యోగం సంపాదించి, నెలకు లక్ష రూపాయల వరకు జీతం తీసుకోవడమే చాలా మంది యువకుల కల. అలాంటిది ఏటా రూ. 12 లక్షలకు పైగా వేతనం అందుకుంటున్న సాఫ్ట్‌వేర్ ఇంజనీర్లు ఎవరైనా ఖాళీ సమయంలో విశ్రాంతి తీసుకోవడమో లేదా పార్టీలు చేసుకోవడమో చేస్తారు. కానీ, పుణెకు చెందిన ఇద్దరు టెక్కీలు మాత్రం అందరికీ భిన్నంగా ఆలోచించారు. మంచి ఉద్యోగంలో ఉన్నప్పటికీ, కేవలం వినోదం, సరదా కోసం వీరు ర్యాపిడో బైక్ ట్యాక్సీలను నడుపుతున్నారు. ప్రస్తుతం ఈ ఆసక్తికరమైన ఉదంతం సోషల్ మీడియాలో విపరీతంగా వైరల్ అవుతోంది.
రూ. 12 లక్షల ప్యాకేజీ ఉన్నా..
పుణెలోని ప్రముఖ ఐటీ కంపెనీ యాక్సెంచర్‌‌లో డెవలపర్‌గా పనిచేస్తున్న నంద్ కిషోర్ అనే యూజర్ ఈ ఆసక్తికర విషయాన్ని సోషల్ మీడియా వేదికగా పంచుకున్నారు. ఆయన తెలిపిన వివరాల ప్రకారం, తనతో పాటు రూమ్‌లో ఉంటున్న ఇద్దరు సాఫ్ట్‌వేర్ ఇంజనీర్ల వార్షిక వేతనం రూ. 12 లక్షలకు పైనే ఉంది. అయినప్పటికీ, వారు ఇటీవల వారాంతంలో సరదాగా గడపడం కోసం ర్యాపిడో బైక్ ట్యాక్సీ సర్వీస్‌లో రిజిస్టర్ చేసుకున్నారు.
వారి దగ్గర ఖరీదైన స్పోర్ట్స్ బైక్‌లు కూడా ఉన్నాయని, కేవలం కొత్త అనుభూతి కోసమే వారు ఈ పనికి పూనుకున్నారని నంద్ కిషోర్ తెలిపారు. వీకెండ్‌లో కొద్దిసేపు బైక్ రైడ్స్ చేసిన ఈ టెక్కీలు మంచి సంపాదన కూడా సాధించారు. ఒక రోజు బైక్ ట్యాక్సీ నడిపిన వారిలో ఒకరికి రూ. 929 రాగా, మరొకరికి రూ. 500 వరకు ఆదాయం లభించింది. దీనికి సంబంధించిన స్క్రీన్‌షాట్‌లను కూడా ఆయన ఆన్‌లైన్‌లో షేర్ చేశారు.
Pune Software Engineers
నెటిజన్ల నుంచి ఫన్నీ కామెంట్లు:
నెలకో లక్ష సంపాదిస్తున్నా వీరు ఇలా చేయడం చూస్తుంటే, అబ్బాయిలు సరదా కోసం ఏమైనా చేయగలరనిపిస్తోంది అంటూ నంద్ కిషోర్ సరదాగా రాసుకొచ్చారు. ఈ పోస్ట్ చూసిన నెటిజన్లు రకరకాలుగా స్పందిస్తున్నారు. అదనపు సంపాదన కోసం నేను కూడా ఇలాగే చేయాలనుకుంటున్నాను, కొత్త వాళ్లతో మాట్లాడేందుకు ఇది మంచి సరదా మార్గం అని కొంతమంది కామెంట్ చేస్తుంటే, ట్రాఫిక్, కాలుష్యంలో ఎవరు మాత్రం బైక్ నడపాలని కోరుకుంటారు? అని మరికొందరు ఆశ్చర్యం వ్యక్తం చేస్తున్నారు. ఏది ఏమైతేనేం, ఈ టెక్కీల వినూత్న సరదా మాత్రం ప్రస్తుతం నెట్టింట నవ్వులు పూయిస్తోంది.
