Watch Video: ఖరీదైన రోల్స్ రాయిస్‌లో వచ్చాడు.. రోడ్డుపై ఫుడ్ స్టాల్ పెట్టాడు! ఒక్క వీడియోతో ఊహించని బిజినెస్
సింగపూర్‌లో ఓ చిన్న ఫుడ్ స్టాల్ వ్యాపారి చేసిన వినూత్న మార్కెటింగ్‌ ప్రయత్నం సోషల్ మీడియాలో వైరల్‌గా మారింది. ఏకంగా రోల్స్ రాయిస్ ఫాంటమ్ కారులో స్టాల్ వద్దకు వచ్చిన వీడియోతో అతడి వ్యాపారం ఒక్కసారిగా ఊపందుకుంది. రోజుకు 600 సింగపూర్ డాలర్లుగా ఉన్న అమ్మకాలు.. వీడియో వైరల్ అయిన తర్వాత 1200 డాలర్లకు పైగా పెరిగాయి..
సింగపూర్‌కు చెందిన 52 ఏళ్ల మహమ్మద్ ఎజామ్ అబ్దుల్ గని తన అత్తగారి కొత్తగా పునరుద్ధరించిన ‘సెవెన్ క్లేపాట్’ ఫుడ్ స్టాల్‌ను ప్రమోట్ చేసేందుకు వినూత్న ఆలోచన చేశాడు. ఇందుకోసం ఓ స్నేహితుడి రోల్స్ రాయిస్ ఫాంటమ్ కారును తీసుకుని స్టాల్ వద్దకు వచ్చాడు. సెప్టెంబర్ 15న ఈ దృశ్యానికి సంబంధించిన వీడియోను టిక్‌టాక్‌లో పోస్ట్ చేశాడు. అప్పర్ బూన్ కెంగ్ ఫుడ్ సెంటర్‌లోని స్టాల్ వద్దకు లగ్జరీ కారులో వచ్చి దిగుతున్న ఎజామ్ వీడియో సోషల్ మీడియాలో వైరల్ అయింది. కొద్దిరోజుల్లోనే దీనికి 5 లక్షలకు పైగా వ్యూస్, వేల సంఖ్యలో లైక్‌లు వచ్చాయి.
వీడియో వైరల్ కావడంతో రోల్స్ రాయిస్ కారు గురించి కూడా చర్చ మొదలైంది. సింగపూర్‌లో సంచలనం సృష్టించిన 3 బిలియన్ సింగపూర్ డాలర్ల మనీ లాండరింగ్ కేసులో స్వాధీనం చేసుకున్న విలాసవంతమైన కార్లలో ఇదీ ఒకటని పలువురు భావించారు. అయితే ఈ కారు ఎజామ్‌కు చెందినది కాదు. అతను తన స్నేహితుడి నుంచి కారును అరువుగా తీసుకున్నట్లు తెలిపాడు. ఈ వాహనం గతంలో మనీ లాండరింగ్ విచారణలో ఉన్న కార్లలో ఒకటేనని, అయితే ప్రస్తుత యజమాని జూలైలో జరిగిన వేలంలో దాన్ని చట్టబద్ధంగా కొనుగోలు చేశారని ఎజామ్ వివరించాడు.
15 నిమిషాల్లో తీసిన వీడియో.. ఊహించని ఫలితం
ఈ వినూత్న ప్రచార ఆలోచన ఎజామ్‌కు ఇద్దరు స్నేహితుల నుంచి వచ్చింది. వారిలో ఒకరు కార్ల డీలర్ కాగా, మరొకరు రోల్స్ రాయిస్ యజమాని. స్టాల్ వద్ద భోజనం చేస్తున్న సమయంలో లగ్జరీ కారును ఉపయోగించి ఫుడ్ బిజినెస్‌కు ప్రచారం కల్పించాలని వారు సూచించారు. దీంతో సెప్టెంబర్ 6న కేవలం ఐఫోన్‌తో సుమారు 15 నిమిషాల్లోనే వీడియోను చిత్రీకరించారు. అయితే ఈ చిన్న వీడియో ఇంత పెద్ద స్థాయిలో వైరల్ అవుతుందని ఎజామ్ కూడా ఊహించలేదు. ఈ సోషల్ మీడియా స్టంట్ వ్యాపారంపై గణనీయమైన ప్రభావం చూపింది. ఆగస్టు 15న స్టాల్ ప్రారంభించిన సమయంలో రోజుకు సుమారు 600 సింగపూర్ డాలర్ల అమ్మకాలు జరిగేవి. వీడియో వైరల్ అయిన తర్వాత రోజువారీ అమ్మకాలు 1,200 డాలర్లకు పైగా చేరుకున్నాయి.
స్టాల్ పునరుద్ధరణ కోసం ఎజామ్ సుమారు 35,000 సింగపూర్ డాలర్లు పెట్టుబడి పెట్టాడు. ఆ మొత్తాన్ని తిరిగి సంపాదించడానికి కనీసం తొమ్మిది నెలలు పడుతుందని తొలుత అంచనా వేశాడు. కానీ వైరల్ వీడియో కారణంగా సెప్టెంబర్ చివరి నాటికే ఆ పెట్టుబడిని తిరిగి రాబట్టగలిగాడు. వీడియో వైరల్ కావడంతో వుడ్‌ల్యాండ్స్, జురాంగ్, చోవా చూ కాంగ్ వంటి ప్రాంతాల నుంచి కూడా కస్టమర్లు స్టాల్‌కు వస్తున్నారని సమాచారం. ఎజామ్ తల్లి తయారు చేసిన ప్రత్యేక రెసిపీతో రూపొందించే క్లేపాట్ అస్సాం పెడాస్ డిష్‌ అక్కడ ప్రత్యేక ఆకర్షణగా మారింది. స్టింగ్‌రే లేదా రెడ్ స్నాపర్ టెయిల్ పోర్షన్‌తో లభించే ఈ వంటకం ధర 8 సింగపూర్ డాలర్ల నుంచి ప్రారంభమవుతుంది. వైరల్ వీడియోకు ప్రశంసలతో పాటు విమర్శలు కూడా వచ్చాయి. వీడియో చిత్రీకరణ సమయంలో రోల్స్ రాయిస్‌ను కొద్దిసేపు యాక్సెసిబుల్ పార్కింగ్ స్థలంలో నిలిపినట్లు కనిపించింది.
దీనిపై స్పందించిన ఎజామ్.. కార్ పార్క్ నిండిపోయిందని, పెద్ద కారును సాధారణ పార్కింగ్ స్థలంలో రివర్స్ చేయడం కష్టంగా ఉండటంతో అలా చేయాల్సి వచ్చిందని చెప్పాడు. తాను కారు దిగిన వెంటనే తన స్నేహితుడు దాన్ని అక్కడి నుంచి తీసుకెళ్లాడని వివరించాడు. తనకు మనీ లాండరింగ్‌తో సంబంధం ఉందని సూచించిన వ్యాఖ్యలను కూడా ఎజామ్ సరదాగా కొట్టిపారేశాడు. రోల్స్ రాయిస్ వీడియో చూసిన తన బంధువులు సైతం తన తల్లిని సంప్రదించి, అంత ఖరీదైన కారును తాను ఎలా కొనగలిగాడని అడిగారని నవ్వుతూ చెప్పాడు. ఎజామ్‌కు ఆహార, పానీయాల రంగంలో చాలా ఏళ్ల అనుభవం ఉంది. హాకర్ అసిస్టెంట్‌గా, కుక్‌గా, క్లబ్ బౌన్సర్‌గా, డెలివరీ డ్రైవర్‌గా కూడా పనిచేశాడు. ప్రస్తుతం తన వ్యాపారాన్ని మరింత విస్తరించేందుకు ప్రణాళికలు సిద్ధం చేస్తున్నాడు. ‘సెవెన్ కాఫీ’ పేరుతో కేఫ్‌ను ప్రారంభించి, రాబోయే రెండేళ్లలో సింగపూర్‌లో ఐదు అవుట్‌లెట్లకు విస్తరించాలని లక్ష్యంగా పెట్టుకున్నాడు. వైరల్ వీడియో తనకు మంచి ప్రచారం తెచ్చిపెట్టినా.. సోషల్ మీడియా ఇన్‌ఫ్లుయెన్సర్‌గా మారే ఉద్దేశం తనకు లేదని ఎజామ్ స్పష్టం చేశాడు. తన ఫుడ్ స్టాల్‌కు ఎక్కువ మంది కస్టమర్లను తీసుకురావడమే సోషల్ మీడియాను ఉపయోగించడంలోని ప్రధాన ఉద్దేశమని చెప్పాడు. ఒక చిన్న వీడియో.. ఒక విలాసవంతమైన కారు.. ఊహించని స్థాయిలో ప్రచారం. వ్యాపారాన్ని పెంచుకోవడానికి సోషల్ మీడియాను ఎంత సృజనాత్మకంగా ఉపయోగించవచ్చో ఎజామ్ కథ మరోసారి చూపించింది.