ఈ గుర్రం తోక చూస్తే నోరెళ్లబెట్టాల్సిందే.. ఏకంగా 13 అడుగులు! గిన్నిస్ రికార్డ్ సొంతం!

సాధారణంగా ప్రపంచ రికార్డులు మనుషులు, క్రీడలు లేదా ప్రత్యేకమైన వస్తువులకు సంబంధించినవిగా ఉంటాయి. కానీ అమెరికాలోని ఒహాయోకు చెందిన ఓ గుర్రం తన అసాధారణమైన పొడవాటి తోకతో చరిత్ర సృష్టించింది. మౌంట్‌జాయ్ ఐస్ ప్రిన్సెస్ అనే ఈ ఆడ గుర్రాన్ని ప్రేమగా ‘జెన్నీ’ అని పిలుస్తారు. గుర్రాలలో ప్రపంచంలోనే అత్యంత పొడవైన తోక కలిగిన గుర్రంగా జెన్నీ గిన్నిస్ వరల్డ్ రికార్డ్స్‌లో చోటు సంపాదించింది.

జూలై 25న నిర్వహించిన అధికారిక కొలతల్లో జెన్నీ తోక పొడవు ఏకంగా 412.62 సెంటీమీటర్లు అంటే 13 అడుగుల 6 అంగుళాలుగా నమోదైంది. ఇది దాదాపు ఓ చిన్నపాటి కారు పొడవుతో సమానం. గతంలో 2007లో JJS సమ్మర్ బ్రీజ్ అనే గుర్రం 381 సెంటీమీటర్ల తోకతో నెలకొల్పిన రికార్డును జెన్నీ అధిగమించింది.

జెన్నీ అమెరికన్ సాడిల్‌బ్రెడ్ జాతికి చెందిన గుర్రం. అమెరికాలోని ఒహాయోలోని స్ప్రింగ్ వ్యాలీలో ఉన్న అశ్వ శిక్షణ కేంద్రంలో ఇది నివసిస్తోంది. మెకెంజీ లోవ్, రాచెల్ ఎస్టెస్ జెన్నీ యజమానులు. 2019లో తన 13వ పుట్టినరోజు సందర్భంగా మెకెంజీకి జెన్నీ బహుమతిగా వచ్చింది.

జెన్నీకి ఇంత పొడవైన తోకను సంరక్షించడం అంత సులభమైన విషయం కాదు. నెలకు కనీసం ఒకసారి, అవసరమైనప్పుడు తోకను శుభ్రం చేసి, షాంపూ, కండిషనింగ్, ఆరబెట్టడం, చిక్కులు తొలగించడం, జడ వేయడం వంటి పనులకు సుమారు నాలుగు నుంచి ఐదు గంటలు పడుతుందట. తోకకు ఎలాంటి నష్టం జరగకుండా ప్రత్యేకంగా జడ వేసి, ఆ తర్వాత టెయిల్ బ్యాగ్‌లో ఉంచుతారట. చిన్న వయసులో జెన్నీ తన తోకను తానే పీకేసుకునేదట. అప్పట్లో పెద్దగా పొడవు లేకపోయినా, కాలక్రమంలో అది పెరుగుతూ వచ్చింది. చివరకు ప్రపంచ రికార్డు ప్రయత్నించేంత పొడవుకు చేరుకుంది.

జెన్నీకి ఈ రికార్డు మాత్రమే ప్రత్యేకత కాదు. తన యజమానికి ఇది ఎంతో మధురమైన, తెలివైన గుర్రం. ప్రపంచ రికార్డు సాధించడంతో యజమానులు, కుటుంబ సభ్యులు, స్నేహితులు ఆనందం వ్యక్తం చేస్తున్నారు. ఇక గుర్రాలతో పాటు కుక్కలు, పిల్లులకూ పొడవైన తోకలకు సంబంధించిన ప్రత్యేక గిన్నిస్ రికార్డులు ఉన్నాయి. కానీ 412.62 సెంటీమీటర్ల తోకతో జెన్నీ మాత్రం గుర్రాల విభాగంలో కొత్త రికార్డు సృష్టించింది.

మరిన్ని ట్రెండింగ్ వార్తల కోసం ఇక్కడ క్లిక్ చేయండి..