తమ బిడ్డకు సింగపూర్‌ అని పేరు పెట్టుకున్న తల్లిదండ్రులు! ఎందుకో తెలిస్తే కన్నీళ్లు పెట్టుకుంటారు..!

గాజా యుద్ధ ప్రాంతంలో సింగపూర్‌కు చెందిన లవ్ ఎయిడ్ సింగపూర్ సంస్థ అందించిన సహాయానికి కృతజ్ఞతగా ఒక పాలస్తీనా దంపతులు తమ నవజాత శిశువుకు సింగపూర్ అని పేరు పెట్టారు. యుద్ధ సమయంలో కూడు, గుడ్డ, నీడ లేని వారికి ఈ సంస్థ అండగా నిలిచింది.

Gaza Baby Named Singapore

SN Pasha |
Updated on: Oct 23, 2025 | 9:39 PM

గాజా యుద్ధ ప్రాంతంలో ఒక హృదయ విదారక సంఘటన జరిగింది. ఈ సంఘటన ఇప్పుడు ప్రపంచవ్యాప్తంగా వార్తల్లో నిలుస్తోంది. ఈ ప్రాంతంలోని ఒక జంట యుద్ధ సమయంలో తాము పొందిన సహాయానికి కృతజ్ఞతలు తెలుపుతూ తమ బిడ్డకు ఒక దేశం పేరు పెట్టారు. యుద్ధ సమయంలో కూడు, గుడ్డ, నీడ లేని వారికి సింగపూర్‌కు చెందిన ఒక స్వచ్ఛంద సంస్థ అందించిన సహాయానికి కృతజ్ఞతగా నవజాత శిశువుకు “సింగపూర్” అని పేరు పెట్టారు.

సింగపూర్‌కు చెందిన గిల్బర్ట్ గౌ నేతృత్వంలోని లవ్ ఎయిడ్ సింగపూర్ అనే మానవతావాద సంస్థ ఈ విషయాన్ని పంచుకుంది. ఆ బిడ్డ అక్టోబర్ 16న జన్మించింది. ఆ బిడ్డ తండ్రి గాజాలో లవ్ ఎయిడ్ సింగపూర్ నిర్వహిస్తున్న సూప్ కిచెన్‌లో వంటవాడిగా పనిచేశాడు. గాజాలో జరిగిన సంఘర్షణ సమయంలో ఆ కుటుంబానికి లవ్ ఎయిడ్ సింగపూర్ సహాయం చేసింది. ఈ కారణంగా వారు తమ బిడ్డకు సింగపూర్ అని పేరు పెట్టడం ద్వారా వారికి కృతజ్ఞతలు తెలిపారు.

ఇజ్రాయెల్-హమాస్ వివాదం సమయంలో లవ్ ఎయిడ్ సింగపూర్ తన భార్య గర్భధారణ సమయంలో ఆమెకు ఎంతో సహాయం అందించిందని హమ్దాన్ హదద్ అన్నారు. “నేను చాలా సంతోషంగా ఉన్నాను. నా కూతురి ఈ భూమిపై అడుగుపెడుతుందో లేదో అని భయపడ్డాను. కానీ లవ్ ఎయిడ్ సింగపూర్ బృందం నా కూతురిని, నా భార్యను కాపాడింది. అందుకే నేను నా కూతురికి సింగపూర్ అని పేరు పెట్టాను” అని ఆయన అన్నారు.

పుట్టినప్పుడు ఆ బిడ్డ బరువు 2.7 కిలోలు ఉందని లవ్ ఎయిడ్ సింగపూర్ తెలిపింది. దీనితో ఆమె “సింగపూర్” అని పేరు పెట్టబడిన మొదటి పాలస్తీనా శిశువుగా నిలిచింది. ఆ ఛారిటీ ఆమె జనన ధృవీకరణ పత్రం ఫోటోను షేర్ చేసింది. అక్టోబర్ 18న లవ్ ఎయిడ్ సింగపూర్ బృందం ఇన్‌స్టాగ్రామ్ పోస్ట్‌లో ఈ వార్తను పంచుకుంది, అక్కడ లవ్ ఎయిడ్ సింగపూర్ బిడ్డకు మంచి ఆరోగ్యం కావాలని, తల్లిదండ్రులకు కృతజ్ఞతలు తెలిపింది.