చాణక్య నీతి

చాణక్యుడు ప్రాచీన భారతదేశానికి చెందిన గొప్ప తత్వవేత్త, రాజకీయ నిపుణుడు, ఆర్థిక శాస్త్రవేత్త. ఆయన మౌర్య సామ్రాజ్య స్థాపకుడు చంద్రగుప్త మౌర్యుడికి గురువుగా వ్యవహరించారు. క్రీస్తుపూర్వం 4వ శతాబ్దానికి చెందిన మౌర్య సామ్రాజ్యానికి ప్రధాన వ్యూహకర్త అయిన చాణక్యుడు.. అర్థశాస్త్రం అనే ప్రసిద్ధ గ్రంథాన్ని రచించారు. రాజనీతి, ధనం, పరిపాలనపై అపారమైన జ్ఞానం ఆయన సొంతం. చంద్రగుప్తుడిని సామ్రాజ్యాధిపతిగా తీర్చిదిద్దిన మేధావి. ఆయన జీవిత అనుభవాల నుంచి వచ్చిన ఆచరణాత్మక సూక్తుల సమాహారమే చాణక్య నీతి. జీవన పాఠాలతో పాటు రాజనీతి, ధన నీతి, మిత్రత్వం, శత్రుత్వం వంటి అంశాలపై చాణక్యుడు ఆచరణాత్మక సూత్రులు చెప్పారు. అతిగా నిజాయితీగా ఉండేవాడు మూర్ఖుడిగా భావించబడతాడు అంటూ పరిస్థితికి తగిన జ్ఞానం అవసరమని చాణక్యుడు సూచించాడు. అలాగే విద్య లేని ధనం అహంకారానికి దారి తీస్తుందంటూ.. జ్ఞానంతో పాటు వినయం ముఖ్యమని పేర్కొన్నాడు. శత్రువుని చిన్నవాడిగా తక్కువ అంచనా వేయకూడదని తన రాజనీతిలో బోధించాడు. ఆలస్యం విజయానికి అడ్డంకిగా పేర్కొన్న చాణక్యుడు.. క్రమశిక్షణతో విజయం తథ్యమని బోధించాడు.