Mythri Clinic: ప్రభుత్వ ఆసుపత్రుల్లో ట్రాన్స్‌జెండర్లకు ప్రత్యేకం.. అందుబాటులోకి ఉచిత వైద్య సేవలు..

ట్రాన్స్‌జెండర్లు గౌరవప్రదంగా జీవించడానికి కేంద్ర, రాష్ట్ర ప్రభుత్వాలు ప్రత్యేక చర్యలు తీసుకుంటున్నాయి. వారిని ఇటీవల రాష్ట్ర ప్రభుత్వం హైదరాబాద్‌లో ట్రాఫిక్‌ వాలంటీర్లుగా నియమిస్తామని ప్రకటించగా, మైత్రి క్లినిక్ ల పేరుతోప్రత్యేక వైద్యసేవలు కూడా అందుబాటులోకి రానున్నాయి.

సమాజంలో ఎలాంటి వివక్ష లేకుండా ట్రాన్స్‌జెండర్ల జీవితాల్లో వెలుగులు నింపేందుకు కేంద్ర, రాష్ట్ర ప్రభుత్వాలు ప్రత్యేక పథకాలను ప్రవేశ పెడుతున్నాయి. సాధారణంగా ప్రభుత్వ, ప్రైవేట్ ఆస్పత్రుల్లో మహిళలు, పురుషుల కోసం వైద్యులు సేవలందిస్తున్నాయి. అదే మాదిరిగా ట్రాన్స్ జెండర్ల కోసం ప్రత్యేక వైద్య సేవలందించేందుకు ప్రభుత్వం ఏర్పాట్లు చేస్తోంది. జిల్లా కేంద్రాల్లోని ప్రభుత్వ జనరల్ ఆస్పత్రుల్లో ట్రాన్స్ జెండర్ల కోసం మైత్రి క్లినిక్ పేరుతో వైద్య విభాగాన్ని ఏర్పాటు చేశారు. రాష్ట్ర వ్యాప్తంగా మెడికల్ కళాశాలలకు అనుబంధంగా ఉన్న ఆస్పత్రుల్లో ట్రాన్స్‌జెండర్లకు క్లినిక్ లను ఏర్పాటు చేయాలని ప్రభుత్వం నిర్ణయం తీసుకుంది. ఇందులో భాగంగా సూర్యాపేట, యాదాద్రి జిల్లా కేంద్రాల్లోని ప్రభుత్వ జనరల్ ఆస్పత్రిల్లో ప్రత్యేక వార్డు, ఓపీ సేవలను అందుబాటులోకి తెచ్చారు. ఈ సేవలను త్వరలో అధికారికంగా ప్రారంభించనున్నారు.

వారంలో రెండు రోజులు ఓపీ సేవలు..

జిల్లా కేంద్రాల్లోని ప్రభుత్వ ఆస్పత్రుల్లో ట్రాన్స్ జెండర్ల కోసం ఏర్పాటు చేస్తున్న మైత్రి క్లినిక్ లో వారంలో రెండు రోజులు ఓపీ సేవలందించనున్నారు. ఉదయం 11 నుంచి మధ్యాహ్నం ఒంటి గంట వరకు ఓపీ సేవలు.. అందనున్నాయి. ఒకవేళ క్లినిక్ కు వచ్చే వాళ్ల సంఖ్య పెరిగితే దాన్ని బట్టి పని దినాల సంఖ్య పెంచాలని వైదాధికారులు భావిస్తున్నారు.

మైత్రి క్లినిక్ లలో ప్రత్యేక వైద్య సిబ్బంది..

ట్రాన్స్ జెండర్లకు మైత్రి క్లినిక్ లో సేవలందించేందుకు ప్రత్యేకంగా వైద్యులను నియమించారు. మొత్తం ఐదుగురు డాక్టర్లను నియమించి వారికి ప్రత్యేకంగా శిక్షణ ఇస్తున్నారు. ఇందులో గైనకాలజిస్ట్, స్కిన్ స్పెషలిస్ట్, మానసిక వైద్యుడు, జనరల్ ఫిజిషియన్, నర్సు ఉంటారు. ప్రత్యేకంగా ఏర్పాటు చేసిన వార్డులోనే రిజిస్ట్రేషన్ ప్రక్రియ ఉంటుంది. వీరి కోసం ప్రత్యేకంగా వైద్యులు, సిబ్బంది అందుబాటులో ఉంటారు. వైద్యులు రాసి ఇచ్చే మందులను తీసుకునేందుకు సైతం ప్రత్యేకంగా సెంటర్ ఏర్పాటు చేయనున్నారు. వైద్య సేవల కోసం వచ్చే ట్రాన్స్ జెండర్లను ఎలా రిసీవ్ చేసుకోవాలి. వారితో మాట్లాడే విధానం తదితర విషయాలపై ప్రత్యేకంగా నియమించిన వైద్యులకు శిక్షణ ఇస్తున్నారు.

మైత్రి క్లినిక్ ల ఏర్పాటుపై ట్రాన్స్ జెండర్ల సంతోషం…

తమ కోసం మైత్రి క్లినిక్ ఏర్పాటు చేయాలని ప్రభుత్వం నిర్ణయం తీసుకోవడంపై ట్రాన్స్ జెండర్లు సంతోషం వ్యక్తం చేస్తున్నారు. వైద్యం కోసం ఆస్పత్రులకు వెళ్లాలంటే ఇబ్బంది ఉండేదని, జ్వరం వచ్చి ఆస్పత్రికి వెళ్లినా ఇబ్బందులు ఎదురయ్యేవనీ ట్రాన్స్ జెండర్లు చెబుతున్నారు. మైత్రి క్లినిక్ లతో తమకు వైద్య సేవల కష్టాలు తొలగిపోతాయని అంటున్నారు.

మరిన్ని తెలంగాణ వార్తల కోసం ఇక్కడ క్లిక్ చేయండి..